Read Kissi Esekiɛl 43 Bible Online

Esekiɛl 43 - Kissi bible

Esekiɛl 43

¹Mí langbanɔ kon kɔa a ya a ba dio bɛndoo, dio bɛndu óò muli hɔlla kpengii paalen le can-nde-o.

²Mí ca biilu Hala Israɛlla va sɔɔnguuo fulaa a ba paalen le can-ndo. Diom ndɔɔ va maa diom mɛmma bɛndu, mí lɛŋnden le va tengaa a biilu ndɔ kon.

³Vundule ya ce len-nden léè velan a vundule yáà ce lɔ́ɔ́ yáà hin le kobio tɛɛmbuuo-o len, vunduma miɔmma man maa velan a vundule yáà ce o peo Kebar kɔngɔ len. Mɛɛ ya ce len, mí del lɛŋ o kuumbuan o kɔl coo.

⁴Biilu Mɛlɛka-o va cɔnɔnndo a ba dio bɛndu muli hɔlla a kpengii paalen le can-nde o, mó va kɔlan luɛyɔɔ o Cɛi-Hala-o nin.

⁵O kon, mí kɔl Hala-o cua ya, mó kɔa a ya o bɛ́ɛ̀ va lenin-ndo nin. Mí ca biilu Mɛlɛka-o o piaa o Cɛi-Hala-o nin ca.

⁶Mí tuɛi vanndo pum, o va o cɛi kon nin-ndo sɔɛi o ya lo, langbanɔ hin a ya o fonda kon-ndo va ya isisi ikɛi.

⁷Mó dimul-la aa: «Po vanacieo sei, fonda kpɛŋɛ ni lemasaa co nanu ni, fonda ya handunin bɛngula niŋnda nilan coo-o pɛɛn. I vanin icali lecoo cuavaa Israɛlla tɛɛn le fɛɛn a fɛɛn. Cuavaa Israɛlla a masaa ndaa a nɔɔliaa lɛnin diola nila diandaalan a suundiaala ndalan a á masaa ndaa vu-a kumbɔɔ nanu le.

⁸Kani (masaa) va kèédei dio ndaa handɔɔ o kèédei dio nuu ikɛi, a va koŋnda ndalan handɔɔ o koŋ nuu ikɛi, cìì cɛiye ndii pilɛ kínɛí va naa tɛɛn naa ndaa ni. Lende ndáà nɔɔliaa diola nila diandaalan a dɛnnda nɔɔlɛila nda va tosaa lan ni, lelan ya lumilumi nda a kɔl ni tuwvo ni.

⁹Sunsun nin, a faŋanin suundiaala ndalan a masaa ndaa vu-a ya ikɛi few-few. O kon, i calnin nda tɛɛn le fɛɛn a fɛɛn.

¹⁰Lelan, nɔm Po vanacieo, tɛɛsial cuavaa Israɛlla mɛɛ Cɛi-Hala-o ho co yɛ, haliko mi siɛmbulan la bii nda le hakila ndalan, ma tuu mɛɛ cɛiyo ho tangulun yɛ.

¹¹Te siɛmbulan la bii pɛ nda le dɛnɛ oo dɛnɛ vɔɔn nda tosa, a tuulal nda mɛɛ cɛiyo co yɛ, mɛɛ o tangulun yɛ, mɛɛ diola ndɔla fulaalan la co yɛ, mɛɛ la luɛyaalan la co yɛ, a mɛɛ tuuliaala ndɔlan, silala ndɔlan, tɔŋnda ndɔlan kpow la co yɛ. A tuula pɛ ndu lende, a handu tuula kon nda o hɔl, haliko ma mɛɛndian tuuliaala co lon-ndan a tɔŋnda ndɔlan kpow, má tosa lende.

¹²Tɔŋ Cɛi-Hala co kon o pembei tullo-o co hoo ni: lɛŋnde balu cɛi kon-nden kpow ledianda-diandaa le co ni. A toɲa, tɔŋ cɛi kon co kon ni.

¹³Tofa vɔ mɛɛ fonda-loamaa-lasálàá va o tuvaa yɛ, a dunndo ndáà tuu ndu ni, dun kon ndóò hiow dun ndáà dema tuu-o bandei ba-piasaa lepilɛ. Soon va o fonda-loamaa-lasálà kon tumndo-o va yingilaa dunndo lepilɛ, cɔcɔɛi ndɔɛi mɛɛlu lekɔɔli-e ndíì nɔ buo suon piasan lepilɛ. Tum fonda-loamaa-lasálà kon va icali coo-o va kon ni.

¹⁴Cɔnɔnndo o soon va o toavaa lebɛngu lɛŋ-ndo háá tiiyaa o boondii va tɛɛn-nde, o va simndan dunndo lediin, buo dunndo lepilɛ, cɔnɔnndo o boondii ken tɛɛn haa o fonda-loamaa-lasálà kalaa bollen, o va simndan dunndo lehiɔɔlu, buo dunndo lepilɛ.

¹⁵Yinndacieeloo va o fonda-loamaa-lasálà kon bollen déŋ, ndóò va simndan dunndo lehiɔɔlu, kpɛɔn va n'cɔavaa mún hiɔɔlu o yinndacieele kon bollen.

¹⁶Bandii yinndacieele kon va dunndo tɔ́ a lediin, buo dunndo tɔ́ a lediin, maa kpakpa o va ni.

¹⁷Boondii ndɔɛi mɛɛlɛi lecoo ndíì va bandei dunndo tɔ́ a lehiɔɔlu, buo dunndo tɔ́ a lehiɔɔlu o kpengun ndɔn hiɔɔlon kpow, cɔcɔɛi mɛɛlɛi o bɔŋala ndɔlan ndíì va dun táláá. Soon va o toavaa lebɛngu pindo-o va dunndo lepilɛ, o kpengii paalen le can-nde helɔɔla vanáà nɛi coo le helɔɔ lecoo lan láà muli hɔlla ni.

¹⁸Mó dimul-la aa: «Po vanacieo sei, nuaa Maalii Hala dimi ni aa silalan a fonda-loamaa-lasálàá o kɔɔ la co lan ni, le paale nda cɔawnin ndu len, haliko ma va sálàla loamaalan solio lecoo, ma va vɛlɛ kooma (cɔlua sálàá) vesullo lecoo.

¹⁹Lelan, bii naw tova téndóó ma yɔngu leviaa-solia-lasálàá, a fula o polale Sadɔk len coo-a, a co sɔɔnguuo ya ikɛi le vaa o vali nuu nin-nda, le sálà co le hakio sɔlaa malɔɔ-o solio a cɔlu kon. Diom Maalii dimi-o co kon ni, Mɛlɛka pɛɛn.

²⁰O kon, mì nɔm cua kooma naw kon, mà sui man o kpɛ̀ɛ́n hiɔɔlun fonda-loamaa-lasálàá, o sɔngila hiɔɔlula boondii ndɔɛi, a o cɔcɔɛi mɛɛlɛi co o bɔŋala ndɔlan-nde. Lende n dindinin fonda-loamaa-lasálàá ni, mà tosa faleŋii baŋannde lecoo.

²¹O kon kɔɔli, a cua naw tova co le sálà co le hakio sɔlaa malɔɔ-o-o, vannda lom ndu o cɛi-kola-toandaa diandaa lekɔɔli, o fonda co o toosiaa le ken o Cɛi-Hala kon-ndo.

²²Diimandɔɔ, a cua cuin toovi nɔ lenamta loo le sálà co le hakio sɔlaa malɔɔ-o, o kon a faŋa hakio o fonda-loamaa-lasálàá coo, mɛɛ nda faŋanin ndu a sálà nda solinin a naw tovaa-o yɛ.

²³Taa cii pɛ sálà co le hakio sɔlaa malɔɔ-o soli, a bii vɛlɛ naw tova téndé nɔ lenamta loo a saa kóndó nɔ lenamta loo o cɔlua pɔmbɔa tɛɛn,

²⁴a hun cɔm Mɛlɛka nda. O kon, vanaa-solia-lasálàá cucu hɛlle nda coo, a solul Mɛlɛka sálà loamaa a nda.

²⁵O palɛi ndii ŋɔmmɛw bɛngu, lepalaa-lepala a bɛnda mà soli cuin toovio pilɛ sálà le hakio sɔlaa malɔɔ, vana bɛnda mà soli sálàá a naw tova téndóó o pilɛ a á saa kóndóó o pilɛ, cɔlua fula o cɔlua pɔmbɔa nin-nda pɛɛn, cɔlua kan nda ŋiɔn kpow a bɛnda mà nɔ lenamta le.

²⁶O palɛi ndii ŋɔmmɛw bɛngu, faleŋii baŋannde bɛnda mì i va tosanndo le fonda-loamaa-lasálàá: lende nda dindinin ndu ni, má pɔla ndu le vali Mɛlɛka-o.

²⁷Te palɛi ken cuu pɛ peelɔn lende, kandɔɔ nin a paale ŋɔmaandɔlen háá lende nin, vanaa-solia-lasálàá vanin sálàla loamaala niaalan a sálàla kɔlɲulula niaalan solio o fonda-loamaa-lasálà kon coo. O kon (ya Mɛlɛka), i nɔla niko mì cɛl niaa.» Diom Maalii dimi-o co kon ni, Mɛlɛka pɛɛn.