Read Kissi Esekiɛl 44 Bible Online

Esekiɛl 44 - Kissi bible

Esekiɛl 44

¹Mí langbanɔ kon mingi ya a kpengii dio bɛndu lekɔɔli cɛi-kola-toandaa diandaa, dio bɛndu muli hɔlla a ba paalen le can-ndo-o pɛɛn. Dio bɛndu kon va o kindaa kpáŋ.

²Mí Mɛlɛka dimul-la aa: «Dio bɛndoo ho lonin o kindaa kpáŋ, vana kumbinin ndu le, nduyɛ vana-vana keinin ndon le luɛyɔɔ le, kani lon Mɛlɛka Hala Israɛlla kei ni mó luɛi. Lelan, o lonin o kindaa kpáŋ.

³Le vana co simlacinɔɔ-o ndu ndu, le tùú o co simlacinɔɔ-o, o nɔla mó cal lon le ɲɛdiaa ndɔɔ dioo Mɛlɛka o hɔl. O keinin a nɛi co o tongo-luɛyaa tase dio bɛndu kon-ndo le luɛyɔɔ, o nɛi pilɛ kon o keinin vɛlɛ le fulaa ni.»

⁴Mí langbanɔ kon kɔa vɛlɛ a ya o dio bɛndu va a maluaŋ-ndo, o Cɛi-Hala-o laci. Mɛɛ ya tofa, mí ca mí biilu Mɛlɛka-o pia o Cɛi-Mɛlɛka-o nin ca, o kon, mí del lɛŋ o kuumbuan o kɔl coo.

⁵Mí Mɛlɛka dimul-la aa: «Po vanacieo sei, sim-ndɔ kpɛ́! Mɛɛndan ndɔ ɲɛkɛndɛi! Yaŋ-ndɔ nilan ɲɛkɛndɛi mà tuei ɲɛ-ɲɛ ya dimulnin nɔm a tɔŋndan a á silala co le Cɛi-Mɛlɛka-o lan o kɔɔ! Mɛɛndan mà sina mɛɛ luɛyɔɔ vanin luɛinɔnndo o Cɛi-Hala-o nin yɛ a mɛɛ fulaa vanin fulanndo o cɛi-kola-toandaa diandaa kon nin yɛ.

⁶O kon, má dimul vanaa nila kalua ha, cuavaa Israɛlla pɛɛn aa: «Nuaa Maalii, o co Mɛlɛka-o dimi ni aa: ‹Niaa cuavaa Israɛlla sei, dɛnnda nɔɔlɛila niaa co tosaa lan la co nin labɔɔ.

⁷Hali telen niaa co ya ɲɛdiaa nuu, visin macuɛiyon a kooma cɔlua sálàá niaa yɔngoo-o, la co vanaa súúla celennda, a kɔlta ndalan la mangalan haa le-a, a dii haa tooma le-a lueiyo o cɛi-kola-toandaa diandaa nuu nin. La nɔɔliaa cɛi biilaa nuu dɛ! La cii kpema co ya a niaa tɛɛn-ndo tɛɛmbuu a dɛnnda niaala nɔɔlɛilan kpede.

⁸Niaa pila lendu hɔlla o vali ni yɔngun niaa a ɲɛm diandan o kɔɔ-o coo le, kɛ mí la cua vanaa súúla celeŋaa kan, mí la handu nda o fonda niaa le vali nuu tosaa o cɛi-kola-toandaa diandaa nuu nin.

⁹Lelan Maalii Hala dimi maa vana súú celen oo vana súú celen, o kɔl ndɔɔ mangalan too, o dii tooma loo, o luei lɛ o cɛi-kola-toandaa diandaa nuu nin te, hali mialaa co icali Israɛlla tɛɛn-nda o pilɛ bɛɛ luei lɛ lenin te.›»

¹⁰Le leviaa faŋan o vali nuu nin, má kɔa ya levil telen Israɛlla va laasianndo, má mulul-la kɔɔ le kɔlan piɔmaa ndaa sooloo-a yɛ, yɔŋ vɔɔn ndaa toalnin nda coo.

¹¹Vanaa malaa kínɛí nda co nin va o cɛi-kola-toandaa diandaa nuu nin ni, a vanin o diola bɛndula cɛi nuu le vaa vanaa cumulaa ladioa a le vallo tosaa o cɛi nuu nin. A vanin cɔlua co le sálà loamaa-a a cɔlua co le sálàla tɔ̀lan-nda bololan kiolɔɔ le vannda, o kon kɔɔli, a vanin isisi vannda o hɔl le nda baalaa tosallo.

¹²Kani lende nda va vanaa kan baalaa tosallo o piɔmaa ndaa sooloo nin ni, nda yɔŋnun vanaa luei cuavaa Israɛlla o hakio nin-nda ni, lelan yɔŋ vɔɔn ndaa toalnin nda coo. Ya Mɛlɛka dimi lende ni, mí heelu ba nuu coocoo mí mɛnalan nda po!

¹³A sɔɔnguu lɛnin ya ikɛi le vali solia lasálàá tosaa le ya le few, a sɔɔnguu lɛnin o cɛila-kolala-toandaala nila diandaalan o ɲɛm niin diandaa-diandan ikɛi le. Siɛmbulan la toalnin nda, mí kɔmnde fula o dɛnnda ndala nɔɔlɛilan nin-nden le tol nda coo.

¹⁴I yɔngunin nda vali cɛi ni biilaa, mà tosa vali co lenin-ndo kpow a ɲɛ-ɲɛ bɛnda mò tosan lenin kpede.

¹⁵Kɛ leviaa-solia-lasálàá fula o polale Sadɔk len nin-nda, a landu hɔlla o vali cɛi-kola-toandaa diandaa nuu coo telen Israɛlla va laasianndo ya levil-lo-a, nda nda vanin sɔɔnguuo ya ikɛi le vaa o vali nuu nin. A vanin simndan ya (Mɛlɛka) o hɔl le ya visin macuɛiyon a kooma cɔlua sálàá cɔmndo. Ya Maalii, ya co Mɛlɛka-o soo nuaa ni.›»

¹⁶Kan vanin luɛyɔɔ o cɛi-kola-toandaa diandaa nuu nin ni, nda vanin sɔɔnguuo o tabali nuu ikɛi le vaa o vali nuu nin ni, nda landunin hɔlla o vali nuu coo ni.

¹⁷A va pɛ luɛyɔɔ, telen nda tiiyanin o diola bɛndula bɛɛ co lenin-ndo-o, a bɛnda mà vownun volɔɔla toosian a kola keesoo lan. Tuma nda vanin kon vallo tosaa o diola bɛndula bɛɛ co lenin-ndo a o cɛi biilaa kon nin-ndo, volɔɔla toosian a yiiŋii saa lan la bɛnda mì la va nda lekɔɔ le.

¹⁸A bɛnda mà vownun mɔsilta kola keeselan o lebol, ma vownun lɛmbɛla pɔmbɔla kola keeselan. A bɛnda mà kandan ɲɛ yɔngu nda hangullo ma lali-o o caŋ te.

¹⁹Kɛ telen nda vanin fulaa le kɔlan o bɛ́ɛ̀ co lekɔɔli-o nin-ndo vanaa tɔ̀a ikɛi-yo, a bɛnda mà soli volɔɔla nda vownun le sálàlan solio a lan lekɔɔ lan, má kɛsi lan o cɛila pɔmbɔla leninnda co o fonda diandaa nin-ndan nin, o kon ma vownun volɔɔla celen, yɔŋii nda tuisi kpaaya diondɔɔ Mɛlɛka-o vannda coo a volɔɔla solia lasálàla ndalan.

²⁰A bɛnda mà sendin tembeltan te, a bɛnda vɛlɛ ma mal bolii ndɛi yimbɔɔ yukɔn te. Kɛ a bɛnda mà va yiiŋii ndɛi kilio.

²¹Vana-solia-lasálà oo vana-solia-lasálà bɛnda mò kol mɔiyan telen o co va luɛyɔɔ o bɛ́ɛ̀ co lenin-ndo nin te.

²²Vana-solia-lasálàá va pɛ lanɔɔ yilɔɔ, o bɛnda mò yil vanalanɔ pɔnɔ ndɔ vi-o o nɔ̀u nin te, o bɛnda vɛlɛ mo yil vanalanɔ kɛyan nda pɔnɔ ndɔ-o le. Kɛ o bɛnda mò cua cuaambɔ laandu hiw-vɔ vanapɔnɔ kɔɔli loo o cuavaa Israɛlla tɛɛn, o nɔla vɛlɛ mò cua vanalanɔ pɔnɔ ndɔ vi-o te vana-solia-lasálàá pɔnɔ ndɔ kon ndóò va ni.

²³Vanaa-solia-lasálàà kan pɛɛkunin vanaa nia le yɛ́-yɛ́ɔ sinaa ɲɛ dindin le vali Mɛlɛka-o a ɲɛ co le vali Mɛlɛka loo tɛɛn, a cɔmnin nda hiyanndo ɲɛ dindu loo a ɲɛ dendu-o tɛɛn.

²⁴Te kɔɔsɔ va pɛ, nda bɛnda le yamɛi kiolɔɔ ni. A kialunin yamɛi mɛɛ dɛnɛ sandaa ya cɔm nda-o co yɛ. A kelanin vɛlɛ o tɔŋnda nilan a o silala nilan coo o kafola ndalan tosaa nin, a canin palɛi nii pɛngiɛi maa idiandaa i co ni.

²⁵Vana-solia-lasálàá bɛnda mò sɔɔnguu vana vílɛ́iyo ikɛi le, yɔŋii o siŋnun vana nɔɔlɛiyo Mɛlɛka o hɔl. Vanaa vílɛ́i o bɛnda mò sɔɔngu ikɛi o siŋnun vana nɔɔlɛi Mɛlɛka o hɔl too-a kínɛí a co haa ni: fuɲa ndɔ, kala ndɔ, po ndɔɔ, cua ndɔɔ, bɛ ndɔ (te kon te pɔmbɔ ndɔ), a yema ndɔ cel-lɔ o nɔ loo.

²⁶Kɛ o va bɛɛ kan, te vana-solia-lasálà kon cii pɛ dindinndo, o bɛnda ma cɔm palɛi ndii ŋɔmmɛw le ndu (malan o muungu o vali ndɔɔ nin).

²⁷Paale o luɛinin o Fonda-Diandaa nin-nden, o bɛnda mò soli sálà ndɔɔ le hakio. Ya Maalii, ya co Mɛlɛka-o soo nuaa ni.

²⁸Tofa vɔ kɛ́ nda sɔlanin-ndo: ya (Mɛlɛka) vanin kɛ ndaa ni. Lelan, la kenin nda lelɛŋ o lɛŋnde Israɛl-ten nin te, ya vanin kɛ́ ndaa ni.

²⁹A ɲɛm nda vanin baloo dɔwnɔnndo-on co mun ni: sálàla ɲɛm-vaalan, sálà co le hakio sɔlaa malɔɔ-o a sálàla-bɛɛndiaa-isɔɔlan, handɔɔ o ɲɛm mun coo, ɲɛ-ɲɛ solinnin sálà (le Mɛlɛka) o lɛŋnde Israɛl-ten nin, kon bɛɛ vanin le nda.

³⁰Ɲɛm hiow naŋɔɔ o ɲɛm tasen vanin fulaa o ɲɛm niaan nin-ndon, ɲɛ-ɲɛ niaa vanin faŋaa o ɲɛm niaan coo le Mɛlɛka yɔngoo, mun kpow n vanin le vanaa-solia-lasálàá. Vannda bɛnda mà va nda kpeyan hiow naŋɔɔ o kpeyannda ndalan nin-ndo yɔngoo, haliko mi duaa tol o cɛila vanaa kan coo.

³¹Vanaa-solia-lasálàá bɛnda mà de cɔlu vi a ba ndɔ-o le, a bɛnda mà de cɔlu visi biyaa sɛɛsiaa-o le, cɔlu kon va yow, o va visi, a bɛnda mà de ndu le.