Read Kissi Esekiɛl 45 Bible Online

Esekiɛl 45 - Kissi bible

Esekiɛl 45

¹Tuma niaa vanin siondei malɔɔ le lɛŋnden piɔwvo a kundalan-ndo, la manda fondaa pum o diandaa o lɛŋnde len nin le Mɛlɛka. Fonda kon bɛnda mò va bandei dunndo vaalan bidiin a laŋuɛɛnu, buo dunndo vaalan tɔ́. Fonda diandaa fonda kon vanin kpow o pɛɛngula ndɔlan nin ni.

²Fonda vanin le cɛi-kola-toandaa diandaa o fonda kon nin-ndo vanin bandei dunndo kɛmɛ leŋuɛɛnu, buo dunndo kɛmɛ leŋuɛɛnu, maa kpakpa o vanin ni. Fonda fondoo balunin Cɛi-Diandaa kon pindo-o vanin dunndo beleŋuɛɛnu.

³O lɛŋnde vanin-nden lemandaa, bandei dunndo vaalan bidiin a laŋuɛɛnu, buo dunndo vaalan tɔ́ len coo, a bɛnda mà tuu fondaa pum le cɛi-kola-toandaa diandaa tangullo lecoo, le Fonda Diandaa-Diandaa toosiaa lon.

⁴Fonda-Diandaa cuannunnin o lɛŋnde len nin-ndo vanin kon ni. Fonda kon vanin le vanaa-solia-lasálàá co vallo tosaa o cɛi-kola-toandaa diandaa nin-nda, a co sɔɔnguuo Mɛlɛka ikɛi le vaa o vali ndɔɔ nin-nda, lon cɛila ndalan la vanin ni, fonda solin sálà le cɛi-kola-toandaa diandaa-o vanin kon ni.

⁵Fondaa kialunnin bandei dunndo vaalan bidiin a laŋuɛɛnu, buo dunndo vaalan tɔ́, ndu vanin lɛŋnde leviia ni, a co vallo tosaa o Cɛi-Hala-o nin-nda, a nɔnin cɛila leninndan bidiin ndon.

⁶Mí la tuu fondaa pum buo dunndo vàála ŋuɛɛnu, bandei dunndo vaalan bidiin a laŋuɛɛnu, mì kon ndu va lɛŋnden le kobio, mí fonda kon va o pɛl mandan le Fonda-Diandaa-o demullo. Le cuavaa Israɛlla kpow fonda kon ndu vanin ni.

⁷Le simlacinɔɔ ndu ndu, la bɛnda mì la kilul ndu bungan mún miun o kpengun miuŋun fonda diandaa ikɛi a o lɛŋnde co le kobio len ikɛi. Bungɛi pilɛ bɛnda mì i va a ba paalen le del-lo, mí i pilɛi va a ba paalen le can-ndo. Bungan mun ikɛ́-kɛ̀ bɛnda mì i va bandei maa bungan piɔwnun polama Israɛlla cɔnɔnndo o pɛɛngulan a ba paalen le del-lo, kɔlan háá o pɛɛngulan a ba paalen le can-ndo on.

⁸Bungɛi ndɔɛi vanin ken ni, lɛŋnde o sɔlanin Israɛl ten pɛɛn. O kon, simlacia nia a saangiaa lɛnin vanaa nia le, kɛ a malnin cuavaa Israɛlla lɛŋnden o ba mɛɛ polama ndan ma co yɛ.

⁹Nuaa Maalii Hala dimi ni aa: «Niaa simlacia Israɛl sei, la hiow ba dɛ! La pɛngi nin kɔlvesɛiyo a delɔɔcoo ho tosaa! La tosa nin sakpoyɛi a dɛnɛ sandaa! Mbɔ̀ la pɛngi nin vanaa nia yondola ndalan poondiaa o laba! Ya Maalii, ya co Mɛlɛka-o soo nuaa ni.

¹⁰O bɛnda mì la nɔ ɲɛla tuvaala n'ɲɛla sandaalan, panila sandaalan a ndeveila sandaalan.

¹¹Panio nda ndeveiyo[12] la bɛnda mì la va ɲɛ pilɔɔ kpen-kpen, fɔ mi vana tuu kon tɔ́ malan o pia baavaa[13], ɲɛ tuvaa nda kpow-kpow-vo vanin baavaa ni.

¹²Volii támái ipilɛ i bɛndanin le piinion bidiin, volii nɔ diolan aa mine-e i bɛndanin támálan belaŋɔmpum.

¹³Mɛɛ niaa bɛnda le sálàla ɲɛm-vaala niaalan faŋaa yɛ co hoo ni: le maalon a ɔrse, o bɛnda mì la yɔngu Mɛlɛka kunda ŋɔmpumndɔɔ o ɲɛ niaa koawnin-ndo nin,

¹⁴le cuɛiyan, o bɛnda mì la va kunda tɔ́ndɔɔ faŋaa o ma niaa vanin sɔlaa-an coo le yɔngoo. Cuɛiyan ma tuununnin a ndeveilan, nduyɛ fɔ ndeveiyo tɔ́ malan baavaa, te kon te kúŋndo[14] pia.

¹⁵Le cɔlua nda, o bɛnda mì la cua saa o pilɛ o kunda saa kɛmɛ lediin coo o hòóla puiyaala cuavaa Israɛlla nin. Ɲɛm niaa cuanin mun yɛ́-yɛ́-on vanin le sálà ɲɛm vaa, le sálà loamaa a le sálàla kɔlɲululan solio ni, haliko mi kon va faleŋii baŋannde le hakila niaa tosa lan. Ya Maalii, ya co Mɛlɛka-o soo nuaa ni.

¹⁶Vanaa co o lɛŋnde len nin-nda kpow a bɛnda mà faaŋiaa ɲɛm pesin mun diolan-ndon le simlacinɔ co o lɛŋnde Israɛl-ten coo-o.

¹⁷Simlacinɔ kon vanin cɔlua co le sálàla loamaalan-nda, ɲɛm co le sálàla ɲɛm-vaalan a le sálàla mamɔilan-ndon yɔngoo o kafolan coo ni, o kafola paangun sɛnɛilan coo, o kafola palɛi pɛngiaalan coo a o cuungiannda bɛndula cuavaa Israɛlla kpede coo. Ndu solinin sálàá le hakio, sálà kpeyanndo, sálà loamaa a sálàla kɔlɲululan le baŋan cuavaa Israɛlla ni.»

¹⁸Nuaa Maalii Hala dimi ni aa: «O paale taselen coo o paangii tasei nin a bɛnda ma cua naw tova téndé nɔ lenamta loo, mà faŋa hakio a ndu o cɛi-kola-toandaa diandaa nin.

¹⁹Vana-solia-lasálàá cuanin kooma cɔlu solin kon sálàá le hakio-o, mò sui man o koŋnda Cɛi-Hala-o coo, o sɔngila hiɔɔlula boondii mɛɛlɛi fonda-loamaa-lasálàá a o koŋnda dio bɛndu co o bɛɔ lenin-ndo lan coo.

²⁰Lende koni n bɛnda le tosaa o paale ŋɔmmɛwndɔle paangii ken coo ni, le vana tosa hakio o sina lepɛŋndo nin, te kon te o ve dɛnɛ ndɔ loo. Lende niaa tosanin faleŋii dindiannde o Cɛi-Hala-o coo ni.

²¹Paale tɔ́ a lehiɔɔlundɔlen o paangii tasei nin, len le vanin kafo-hiavaa-coo le niaa ni, kafo palɛi ŋɔmmɛw-vo pɛɛn. O palɛi ken kpow nin, la vanin bulu toosian a lɛvɛn too dioo.

²²Simlacinɔ kon solinin ɲinkon sálàá le hakio a naw tovaa le ndu pila a le vanaa vanin o lɛŋnde len nin-nda kpow.

²³O palɛi ŋɔmmɛvii kafo kon nin kpow, lepalaa-lepala o solulnin Mɛlɛka sálà loamaa a navaa tovaa a ŋɔmmɛw a á saa kóndóa nda ŋɔmmɛw, nda kpede a bɛnda mà nɔ lenamta le, lepalaa-lepala o bɛnda vɛlɛ mo soli cuin toovio sálà co le hakio sɔlaa malɔɔ-o.

²⁴O solinin sálàá a kpeyanndo panio tɔ́ a leŋuɛɛnu a á cuɛiyan litililan tan ŋɔmpum le naw tovaa o pilɛ a le saa kóndóó o pilɛ.

²⁵O paale tɔ́ a leŋuɛɛnundɔlen coo, o paangii ŋɔmmɛwndɔɛi nin, o soli vɛlɛ sálà pilɛ co kon le hakio-o, o soli sálà loamaa pilɛ kon a sálà ɲɛm vaa pilɛ kon a cuɛiyan, o bɛnda mò tosa kon háá palɛi ndii ŋɔmmɛw vɛlɛ.