Read Kissi Esekiɛl 46 Bible Online

Esekiɛl 46 - Kissi bible

Esekiɛl 46

¹Nuaa Maalii Hala dimi ni aa: «Dio bɛndu co o bɛɔ lenin-ndo, o muli hɔlla a ba paalen le can-ndo o bɛnda mò va o kindaa o palɛi ŋɔmpumii co le baalaa-e kpow bɛngu, kɛ o bɛnda mò va o kumbia o paale pɛngiaalen coo, o bɛnda vɛlɛ mo va o kumbia o paale kafo paangii sɛnɛilen coo.

²Simlacinɔɔ keinin a nɛi cɛi-luɛyaa tase co o dio bɛndu co lekɔɔli-o, mó luɛi, mó sim o koŋ dio kon ikɛi. O kon, vanaa-solia-lasálàá solinin sálà loamaa ndɔɔ a sálàla kɔlɲulula ndɔlan. Kon cuu pɛ, simlacinɔ kon baŋnin vulan o kèédei dio bɛndoo coo, o cii pɛ ken o fula. Ɲinkon kpɛŋ dio bɛndu kon bɛnda mò kindan te, fɔ icɔllo.

³Vanaa vanin o lɛŋnde len nin-nda vanin vulan baŋɔɔ Mɛlɛka o labɛngunin o dio bɛndu kon sondoo o palɛi pɛngiɛi coo a o palɛi kafola paangun sɛnɛilan coo.

⁴Sálà loamaa simlacinɔ kon cɔmnin Mɛlɛka o paale pɛngiaalen coo-o bɛnda mò va saa téndéa nda ŋɔmpum, a nɔ lenamta le-a a saa kóndó nɔ lenamta loo o pilɛ.

⁵O bɛnda mò yɔngu maalon kiloo beleyaa le saa kóndóó pilɛ, a ɲɛ o yeemanin le handɔɔ o saa téndéa coo le sálà n'mallo solio-o. O yɔngunin cuɛiyan litililan laŋɔmpum le maalon kiloo beleyaa.

⁶O paale kafo paangii sɛnɛilen coo, o bɛnda mò soli sálàá a naw tova téndé nɔ lenamta loo o pilɛ, saa téndéa nɔ lenamta le-a a ŋɔmpum a saa kóndó nɔ lenamta loo o pilɛ.

⁷O bɛnda mò yɔngu maalon kiloo beleyaa le sálàá solio a naw tovaa latulu, mò yɔngu vɛlɛ ɲɛ o yeemanin le sálàá solio a saa téndéa latulu-o, mò handu vɛlɛ cuɛiyan litililan laŋɔmpum lecoo le kpeyan pani beleyaa-o.

⁸Lɔ́ɔ́ simlacinɔ kon vanin luɛyɔɔ-o, o luɛinin o tongo-luɛyaa tase co o dio bɛndoo-o, lon koni o keinin vɛlɛ le fulaa ni.

⁹Lɔ́ɔ́ vanaa co o lɛŋnde len nin-nda a vanin hunɔɔ Mɛlɛka o hɔl o kafola bɛndulan coo-o, vana-vana kei pɛ o nɛi dio bɛndu co a maluaŋ-ndo le luɛyɔɔ le vulan baŋɔɔ, ndu bɛnda mò kei a nɛi dio bɛndu co a ba too-o le fulaa, vana-vana kei pɛ o nɛi dio bɛndu co a ba too-o le luɛyɔɔ, ndu bɛnda mò kei o nɛi dio bɛndu co a maluaŋ-ndo le fulaa. Vana-vana bɛnda mò mulin mò fula a nɛi o kei le luɛyɔɔ-o le, kɛ a nɛi co ndu o hɔl sakpo-o o bɛnda le fulaa ni.

¹⁰O telen pilɔɔ nda luɛinin nda simlacia ni, mà fula vɛlɛ nda ndaa o telen pilɔɔ.

¹¹O palɛi lakafoei a o palɛi bɔɔŋiannda bɛnduei coo, sálàá solinnin a maalon kiloo beleyaa le naw tovaa o pilɛ, kiloo beleyaa le saa kóndóó, a ɲɛ o yeemanin le sálàá solio a saa téndéa latulu-o. O bɛnda vɛlɛ mo yɔngu cuɛiyan litililan laŋɔmpum le maalon kiloo beleyaa.

¹²Te simlacinɔ kon solul pɛ Mɛlɛka sálà loamaa o kelu o kɔl ndɔɔ nin a yeemɛi ndɔɛi-yo, te kon te o solul pɛ ndu sálà kɔlɲulu o kelu le solio a yeemɛi ndɔɛi-yo, a bɛnda ma kumbil ndu dio bɛndu muli hɔlla a kpengii paalen le can-nde-o, haliko (mo luɛi) mo soli sálà loamaa ndɔɔ a sálà kɔlɲulu ndɔɔ mɛɛ o dema tosa o paale pɛngiaalen coo yɛ. O cii pɛ lan soli lende, o fula, a koma mingi dio bɛndu kon kinda kpáŋ telen o fulanin-ndo.

¹³Lepalaa-lepala, nɔm, a bɛnda ma solul Mɛlɛka sálà loamaa a saa téndé nɔ vɔsio pilɛ-o o pilɛ, o nɔ lenamte loo, idii oo idii a bɛnda ma soli sálà kon a saa téndé vaa lende o pilɛ.

¹⁴Idii oo idii, a bɛnda ma handu sálà ɲɛm vaa lecoo: kpeyanndo kiloo leŋuɛɛnu a cuɛiyan litilan latiɔn le kpeyanndo pundɔɔ. Sálà ɲɛm vaa co le Mɛlɛka-o co kon ni. Silalan ndan la co va le fɛɛn a fɛɛn.

¹⁵Idii oo idii a cuanin saa téndóó o pilɛ, kpeyanndo a cuɛiyan, má soli sálà loamaa co le fɛɛn a fɛɛn-ndo a ɲɛm mun.

¹⁶Nuaa Maalii Hala dimi ni aa: «Te simlacinɔɔ ke pɛ po ndɔɔ o pilɛ yondo ndɔɔ kpengei pilɛi, mɛɛ yondo kon ndu siŋnun kɛ́ɔ le poaa po ndɔ kon, yondo kon vanin le nda.

¹⁷Kɛ te simlacinɔ kon yɔngu pɛ vana ndɔ baalaa o pilɛ ɲɔɔ pum o ɲɛm o cua o kɛ́ ndɔ ndu pilaa-o coo-o, ɲɛ kon vanin le vana ndɔ baala kon háá o vɔsi ihɔɔyaa, o kon kɔɔli, ɲɛ kon muungu le simlacinɔ kon, le poaa ndɔa kínɛí ɲɛm ndɔn lonin kɛ́ɔ ni.

¹⁸Simlacinɔɔ bɛnda mò cua ɲɛ-ɲɛ o ɲɛm co kɛ́ɔ le vanaa tɔ̀a-on coo mo hɛlu nda yondola ndalan o ba le. Kɛ o bɛnda mò cua ɲɛm o melnin poaa ndɔa kɛ́ɔ-von o ɲɛm ndɔn ndu pilan coo, haliko vana-vana fola lɛŋnden o vanaa nia tɛɛn te.»

¹⁹Mí langbanɔ kon kei vɛlɛ a ya o sondo co o dio bɛndu co a ba luaŋ-ndo-o, mó luɛi a ya o cɛila leninnda diandaala co le vanaa-solia-lasálàá lan nin, la muli hɔlla a ba luaŋ-ndo lan, mó cɔm ya fondaa pum lenin di-di a ba paalen le del-lo.

²⁰Mó dimul-la aa: ‹O fondaa ho vanaa-solia-lasálàá vanin visin sálà bɛɛndiaa isɔɔ a visin sálà co le hakio sɔlaa malɔɔ-on yawvo ni, lon koni nda vanin vɛlɛ sálàla ɲɛm-vaalan yawvo ni, vana fulanin a mun o bɛ́ɛ̀ co lekɔɔli-o nin mì vanaa tɔ̀a pilan mun te.›

²¹Mó soli ya o bɛ́ɛ̀ va lekɔɔli-o nin, mó kei a ya o sɔngila hiɔɔlula bɛɛ kon nin. Mí ca kunga kpakio o sɔngila yɛ́-yɛ́la bɛɛ kon.

²²O sɔngila hiɔɔlula bɛɛ kon o kɛ́-kɛ̀, kunga kpaki pɔmbɔ-pɔmbɔɔ va o balaa ni, kunga kpakio pilɛ va bandei dunndo belehiɔɔlu, buo dunndo beleyaa. Tan hiɔɔlu kpow bandii pilɛi a bu pilɔɔ láà nɔ o sɔngilan ni.

²³Kpaki lapowvo va o balaa o kungala hiɔɔlula lan pindo, yinndacieelelan la va lacɔavaa o kpaki lapow kon balɔɔ pindo, o kpaki kon balɔɔ ndáà hol tan cɔvɔɔ ni.

²⁴Mí langbanɔ kon dimul-la aa: ‹Fondala vanaa yaw ɲɛm dian-nda la co lan ni, lon vanaa malaa co o Cɛi-Hala-o nin-nda yaw visin cɔlua vannda soli sálàá-on ni.»