Read Kissi Esekiɛl 47 Bible Online

Esekiɛl 47 - Kissi bible

Esekiɛl 47

¹Mí langbanɔ kon mingi ya vɛlɛ o Cɛi-Hala-o sondoo. Yáà tofaa, mí ca mɛnndan fulaa o kèédei Cɛi-Hala kon bɛngu a ba paalen le can-ndo, kani a ba paalen le can-ndo cɛi kon ndóò muli hɔlla ni. Cɛi-Hala kon o ba kɛndɔɔ coo mɛmma man ma va fulaa ni mí ma va tolɔɔ o fonda-loamaa-lasálàá a ba too kpeekpei.

²O kon, mí langbanɔ kon kei a ya o nɛi dio bɛndu va a ba luaŋ-ndo o, mó balu a ya o bɛ́ɛ̀ pindo, mó tiiya a ya háá o dio bɛndu muli hɔlla a ba paalen le can-ndo-o lekɔɔli. O ba kɛndɔɔ coo kpeekpei mɛnndan ma va hiovɔɔ ni.

³Tuma langbanɔ kon fula a kpengii paalen le can-nde o, yoolen le va ndu o ba, mó tuu tiŋndo bandei dunndo vàá pilɛ, mó tɛɛnguu ya mɛnndan, mí mɛnndan ma bii ya o kpelenkpelenndon.

⁴Mó tuu vɛlɛ tiŋndo bandei dunndo vàá pilɛ, mó tɛɛnguu ya mɛnndan, mí ma bii ya háá o vulan. Mó tuu vɛlɛ tiŋndo bandei dunndo vàá pilɛ, mó tɛɛnguu ya mɛnndan, mí ma tiiya ya o caŋnda dí.

⁵Mó tuu vɛlɛ tiŋndo bandei dunndo vàá pilɛ, mí ca maa o ve lɛ pee pɔmbɔ yáà tiwba taŋɔɔ le, kani mɛnndan maa yingila taw, fɔ mì vanáà del nin a saanaa le man taŋɔɔ. O ve lɛ pee pɔmbɔ vanáà nɔla lɛ taŋɔɔ le.

⁶Mó ɲuna ya aa: «Po vanacieo sei, a ce pá ɲɛkɛndɛi?» O kon kɔɔli, mó sim ya laci, mó mingi ya o pee pɔmbɔ kon kɔngɔ.

⁷Mɛɛ o mingi ya o kɔngɔ, mí ca yɔmnde taw-taw o kɔngɔla tiɔnnda pee pɔmbɔ kon.

⁸Mó dimul-la aa: ‹Mɛnndan man ma vanin kɔlan o tàndá co a ba paalen le can-ndo-o nin o lɛŋnden nden nin, ma vanin tuusoo o bóllo Araba nin, mì má kɔa delɔɔ o mɛmma hɛlii bɛnduan coo, o kon mɛmma hɛlii bɛnduma man ma siŋnunnin makɛndɛ.

⁹Nɛɛ-nɛɛ mɛmma pe pɔmbɔ kon ma vanin keiyo, visia peea vanin yoomu lon, suwva vanin lenin sɛ́lɛ́ bɛndoo taw-taw, kani mɛmma pee pɔmbɔ kon ma tiiyanin ndon, mì mɛmma hɛlii bɛnduma man ma siŋnun makɛndɛ válán, nduyɛ ɲaa yoomaa peea vanin nɛɛ-nɛɛ pee pɔmbɔ kon tiiyanin.

¹⁰O kon, vanaa yɔɔyaa calnin o kɔngɔla mɛmma man coo, kandɔɔ Ɛin-Kedi kɔlan tiiyaa háá Ɛin-Ɛklaim, vanaa yɔɔyaa vanin yalala ndalan tondɔɔ. Suvaa kan vanin súúlan maa suvaa co o mɛmma ihɛlma bɛnduan nin-nda, a vanin sɛ́lɛ́ taw-taw.

¹¹Kɛ tɛiyun ndɔn a dalala ndɔlan la dindinnin te, a mandanin ndan le hɛlle.

¹²Yɔmii koamɛi súú-súù ka i vulnin o pee pɔmbɔ kon coo, o kɔngɔla ndɔla tiɔnndan kpede coo. Pei yɔmii ken i ɲɔfɔliaanin te, kɔmnde ndalen bɛɛ le cuunin lecoo le. Ipaangu oo ipaangu yɔmii ken vanin tàlonndan[15] solio, kani o cɛi-kola-toandaa diandaa nin mɛmma pee pɔmbɔ kon ma vanin cɔnɔnndo ni. Kɔmnde yɔmii ken le vanin le baloo dɔwnɔnndo, pei ndɛi ndi vanin le nààlan cɛwvo.»

¹³Nuaa Maalii Hala dimi ni aa: «La tofa vɔ pɛɛngula lɛŋnden nden, le niaa piɔw nin polama tɔ́ a mamiɔmma Israɛlla tɛɛn-nden pɛɛn. Polale Yosɛf len le bɛnda mì le sɔla lɛŋnden bɛmbɛ lediin.

¹⁴La bɛnda mì la loo len, mì le va kɛ́ niaa, mì la piɔw len, mì vana-vana sɔla kpen-kpen vellaa-velle, maa mɛɛ ya heelu baa mì mɛnan le fuɲaa niaa mamaa lɛŋnde kalalen yɔngoo yɛ. A toɲa la loonin lɛŋnden nden mì le siŋnun kɛ́ niaa.

¹⁵Pɛɛngula lɛŋnde len la co lan ni: pɛɛngulan a ba luaŋ-ndo la cannin a mɛmma ihɛlma bɛnduan, mì la kei a nɛi kɔɛ Hɛtlɔn-ndo, kɔlan tiiyaa háá Sedad ciee-lekɔɔ,

¹⁶mì la kɔɛ a Hamat, Berɔta, Sibraim co o pɛɛngulan yondo kobio Damas a yondo kobio Hamat tɛɛn-ndo, Hasɛr-Hatikon a kpengii pɛɛngula Havran-ndan.

¹⁷O kon, pɛɛngula cannin a mɛmma ihɛlma bɛnduan, mì la kei Hasar-Enon, mì la kɔɛ o pɛɛngulan a Damas, mì la kei Safɔn a ba luaŋ-ndo lan la vanin ndan ni.

¹⁸Pɛɛngulan a ba paalen le can-ndo la vanin ndan ni: fondaa pum o tàndá Havran-ndo a tàndá Damas-o tɛɛn, mì la kei o dɛɛlala peo Yurdɛn nin o tàndá Kalaad-o a o lɛŋnde Israɛl-ten tɛɛn. Mí la tuu cɔnɔnndo o pɛɛngulan a ba luaŋ-ndo kɔlan tiiyaa háá o mɛmma hɛlii bɛnduan. Pɛɛngulan a ba paalen le can-ndo la vanin ndan ni.

¹⁹A ba too, pɛɛngulan la cannin Tamar mì la kɔɛ o mɛnndan Meriba o tàndá Kadɛs-o nin, mì la demul pee pɔmbɔɔ Esipte, mì la kɔ del o mɛmma ihɛlma bɛnduan coo. Pɛɛngulan a ba too la vanin ndan ni.

²⁰Mɛmma ihɛlma bɛnduan ma vanin pɛɛngulan a ba paalen le del-lo ni, kandɔɔ a ba too háá Lebo-Hamat ciee-lekɔɔ, pɛɛngulan a ba paalen le del-lo la vanin ndan ni.

²¹Lɛŋnde niaa piɔwnin niaa pila tɛɛn-nden le co len ni, mɛɛ polama Israɛlla ma co yɛ niaa piɔwnin nden ni.

²²La piɔwnin nden o siondei malɔɔ, mì le siŋnun kɛ́ɔ le niaa pila a le mialaa vanin icali niaa tɛɛn-nda, a vialunin cuawva niaa tɛɛn-nda, kan nda vanin le niaa maa cuavaa pilaciee Israɛlla tɛɛn. Siòòndei malnun pɛ, nda bɛɛ a bɛnda mà sɔla kɛ́ɔ niaa ndaa latulu o polama Israɛlla tɛɛn.

²³Le hee, o polale mialaa vaa lende vanin icali tɛɛn-nden coo niaa yɔngunin nda kɛ́ ndaa ni. Ya Maalii, ya co Mɛlɛka-o soo nuaa ni.»