Read Kissi Esekiɛl 48 Bible Online

Esekiɛl 48 - Kissi bible

Esekiɛl 48

¹Diola polama cuavaa Israɛlla la co lan a bungan nda sɔlanin-ndon ni, bungɛi polale Dan-nden le sɔlanin-nde vanin a maluaŋ o bollen coo di-di ni, bungɛi ken demulnin nɛi kei a Hɛtlon, mó kɔa Lebo-Hamat, mó kɔ kei a Hasar-Enon ndo. Lɛŋnde Damas len le co a maluaŋ o kobio Hamat ikɛi, kandɔɔ o kɔngɔ co a ba paalen le can-ndo háá o kɔngɔ co a ba le del-lo.

²Bungɛi le sɔlanin-nde demullo, kandɔɔ a ba paalen le can-ndo kɔlan a ba le del-lo.

³Bungɛi polale Nɛftali len le sɔlanin-nde vanin o bungɛi polale Asɛr len le sɔlanin-nde demullo, cɔnɔnndo a ba paalen le can-ndo kɔlan a ba le del-lo.

⁴Bungɛi polale Manase len le sɔlanin-nde vanin o bungɛi polale Nɛftali len le sɔlanin-nde vanin demullo, cɔnɔnndo a ba paalen le can-ndo kɔlan a ba le del-lo.

⁵Bungɛi polale Efraim-nden le sɔlanin-nde vanin o bungɛi polale Manase len le sɔlanin-nde demullo, cɔnɔnndo a ba paalen le can-ndo kɔlan a ba le del-lo.

⁶Bungɛi polale Rubɛn-nden le sɔlanin-nde vanin o bungɛi polale Efraim-nden le sɔlanin-nde demullo, cɔnɔnndo a ba paalen le can-ndo kɔlan a ba le del-lo.

⁷Bungɛi polale Yuda len le sɔlanin-nde vanin o bungɛi polale Rubɛn-nden le sɔlanin-nde demullo, cɔnɔnndo a ba paalen le can-ndo kɔlan a ba le del-lo ni.»

⁸O bungɛi polale Yuda len le sɔlanin-nde demullo, cɔnɔnndo a ba paalen le can-ndo kɔlan a ba le del-lo, lon bungɛi niaa kilulnin Mɛlɛka-e vanin ni. Bu bungɛi ken vanin dunndo vaalan bidiin a laŋuɛɛnu, bandii ndɔɛi ndi vanin, cɔnɔnndo a ba paalen le can-ndo kɔlan a ba le del-lo, maa bungan piɔwnunnin polama Israɛlla-on. O bungɛi ken tɛɛn déŋ cɛi-kola-toandaa diandaa vanin ni.

⁹Bungɛi niaa kilulnin ken Mɛlɛka-e vanin bandei dunndo vaalan bidiin a laŋuɛɛnu, buo dunndo vaalan tɔ́.

¹⁰Vanaa-solia-lasálàá nɔnin bungɛi diandɛi ken ni. A maluaŋ i vanin (bandei) dunndo vaalan bidiin a laŋuɛɛnu, a ba paalen le del-lo bu ndɔɔ vanin dunndo vaalan tɔ́, a ba paalen le can-ndo bu ndɔɔ vanin vaalan tɔ́, a ba too bandii ndɔɛi vanin dunndo vaalan bidiin a laŋuɛɛnu. O bungɛi ken tɛɛn déŋ cɛi-kola-toandaa diandaa Mɛlɛka-o vanin ni.

¹¹Vanaa-solia-lasálàá sɔlanin pɔlaa o polale Sadɔk len coo-a nɔnin bungɛi ken ni. Kani nda va baala nuu tosaa ni, (ya Mɛlɛka), nda nda laasian mɛɛ leviia laasian telen cuavaa Israɛlla luɛi o pɔwlan nin-ndo le.

¹²Lelan, nda sɔlanin bungɛi diandɛi-diandɛi o i nda kialunin ken o lɛŋnde len nin-nde nin ni, bungɛi ndɛi vanin o bungɛi leviia ikɛi.

¹³Leviia yɛ niko, nda sɔlanin bungɛi o bungɛi vanaa-solia-lasálàá demullo. Bungɛi ndɛi ken vanin bandei dunndo vaalan bidiin a laŋuɛɛnu, buo dunndo vaalan tɔ́. Bandii ndɔɛi kpow-kpow i vanin dunndo vaalan bidiin a laŋuɛɛnu, bu ndɔɔ kpow-kpow o vanin dunndo vaalan tɔ́.

¹⁴Fonda kon hiow diondɔɔ o lɛŋnde len nin, kani fonda solin sálà le Mɛlɛka-o o co ni, lelan leviia bɛnda mà pisi ndu le, a bɛnda mà singa ndu a ɲɛ-ɲɛ le, a bɛnda vɛlɛ bɛɛ ma vɔngul ndu le.

¹⁵Bungɛi lonin-nde vanin buo dunndo vàála ŋuɛɛnu (5000), bandei dunndo vaalan bidiin a laŋuɛɛnu (25 000). O venin lɛŋnde solin sálà le vali Mɛlɛka le, kɛ bungɛi ken vanin le kobio, le cɛila lɔlaalan tangullo a le sɔndɔkɔlta balu kobio lan ni. Kobi kon pila ndu vanin tɛɛn déŋ.

¹⁶Nuaa fondaa vanin o tuvaa ni: a ba luaŋ-ndo dunndo vàála hiɔɔlu a kɛmɛ leŋuɛɛnu (4 500), a ba too dunndo vàála hiɔɔlu a kɛmɛ leŋuɛɛnu (4 500), a ba paalen le can-ndo dunndo vàála hiɔɔlu a kɛmɛ leŋuɛɛmu (4 500).

¹⁷Fonda pulee-o vanin o kobi kon balɔɔ pindo, a maluaŋ o vanin buo dunndo kɛmɛ lediin a beleŋuɛɛnu, a ba too dunndo kɛmɛ lediin a beleŋuɛɛnu, a ba paalen le can-ndo dunndo kɛmɛ lediin a beleŋuɛɛnu, a ba paalen le del-lo dunndo kɛmɛ lediin a beleŋuɛɛnu.

¹⁸Ɲɛ tɔ̀ lonin o bandei nin-ndo vanin o bungɛi co le Mɛlɛka-e demullo, ndu vanin bandei dunndo vaalan tɔ́ (10 000) a ba paalen le can-ndo, a ba paalen le del-lo bɛɛ o vanin bandei dunndo vaalan tɔ́ (10 000), kon ndu vanin o bungɛi co le Mɛlɛka-e demullo. Fonda kon ndu vanin vaanɔnndo le vanaa vanin baalaa tosaa le kobio-a baloo dɔvɔɔ.

¹⁹Vanaa vanin baalaa tosaa le kobio-a kpow fulanin o polama cuavaa Israɛlla nin, nda vanin ciɛɔn vàá a fonda kon ni.

²⁰Bungɛi mandannin le Mɛlɛka a le kobio-e vanin bandei dunndo vaalan bidiin a laŋuɛɛnu (25 000), buo dunndo vaalan bidiin a laŋuɛɛ (25 000), buo dunndo vaalan bidiin a laŋuɛɛnu (25 000), a piɔwnin bungɛi diandɛi ken kundalan lahiɔɔlu, mà cua kundaa pilɛ mì ndu va le lɛŋnde kobio.

²¹Bungɛi tɔ̀ɛi lonin-nde vanin le simlacinɔɔ, bungɛi ken vanin o bungɛi diandɛi a o bungɛi co le kobio-e ikɛi, o bungan tɔ̀un nɔ buo dunndo vaalan bidiin a laŋuɛɛnu-on demullo háá o pɛɛngulan a ba paalen le can-ndo, o bungan tɔ̀un nɔ buo dunndo vaalan bidiin a laŋuɛɛnu-on demullo háá o pɛɛngulan a ba paalen le del-lo. Kon vanin le simlacinɔɔ ni. Fonda co le Mɛlɛka-o a cɛi-kola-toandaa diandaa co o Cɛi-Mɛlɛka-o nin-ndo vanin tɛɛn déŋ.

²²O bungɛi leviia demullo a o bungɛi kobio demullo, bungɛi vanin le simlacinɔɔ-e vanin tɛɛn déŋ, o pɛɛngulan bungɛi polale Yuda len le sɔlanin-nde a bungɛi polale Bɛnyamɛn-nden le sɔlanin-nde tɛɛn. Bungɛi simlacinɔɔ i vanin ken ni.

²³Bungan polama tɔ̀an ma sɔlanin-ndon vanin mun ni, cɔnɔnndo a ba paalen le can-ndo kɔlan a ba le del-lo, polale Bɛnyamɛn-nden le sɔlanin bungɛi lon.

²⁴Bungɛi polale Simeɔn-nden le sɔlanin-nde vanin o bungɛi polale Bɛnyamɛn-nden le sɔlanin-nde demullo, cɔnɔnndo a ba paalen le can-ndo kɔlan a ba le del-lo.

²⁵Bungɛi polale Isakar len le sɔlanin-nde vanin o bungɛi polale Simeɔm-nden le sɔlanin-nde demullo, cɔnɔnndo a ba paalen le can-ndo kɔlan a ba le del-lo.

²⁶Bungɛi polale Sabulɔn-nden le sɔlanin-nde vanin o bungɛi polale Isakar len le sɔlanin-nde demullo, cɔnɔnndo a ba paalen le can-ndo kɔlan a ba le del-lo.

²⁷Bungɛi polale Kad len le sɔlanin-nde vanin o bungɛi polale Sabulɔn-nden le sɔlanin-nde demullo, cɔnɔnndo a ba paalen le can-ndo kɔlan a ba le del-lo.

²⁸O pɛɛngulan o bungɛi polale Kad len le sɔlanin-nde a ba too, pɛɛngulan la cannin Tamar mì la kɔɛ háá o mɛnndan Meriba o tàndá Kadɛs-o ni, mì la demul pee pɔmbɔɔ Esipte, mì la kɔ del o mɛmma ihɛlma bɛnduan coo.

²⁹Mɛɛ lɛŋnden nden niaa bɛnda le piɔwvo polama Israɛlla tɛɛn o siondei malɔɔ ni, nuaa lepola oo lepola le bɛnda mì le sɔla bungɛi ndɔɛi ni. Ya Maalii, ya co Mɛlɛka-o soo nuaa ni.

³⁰Nuaa diola luɛyaalan Yerusalɛm la vanin ni. A ba luaŋ-ndo ɲɔɔ vanin bandei dunndo vàála hiɔɔlu kɛmɛ leŋuɛɛnu (4 500).

³¹Diola luɛyaala ndɔlan o kɛ́-kɛ̀ nɔnin diola polalen lepilɛ lasɛvaa lecoo. Diola luɛyaalan la vanin layàá, dioo pilɛ le polale Levii len.

³²A ba paalen le can-ndo, ɲɔɔ vanin bandei dunndo vàálan tan hiɔɔlu kɛmɛ leŋuɛɛmu (4 500), diola luɛyaalan tan yáá la vanin ndon ni: o pilɛ le polale Yosɛf len, o pilɛ vɛlɛ le polale Bɛnyamɛn-nden, o pillo le polale Dan-nden.

³³A ba too, ɲɔɔ vanin bandei dunndo vàálan tan hiɔɔlu kɛmɛ leŋuɛɛnu (4 500), diola luɛyaalan la vanin layàá lon, o pilɛ le polale Simeɔn-nden, o pilɛ le polale Isakar len, o pillo le polale Sabulɔn-nden.

³⁴A ba paalen le del-lo, ɲɔɔ vanin bandei dunndo vàálan tan hiɔɔlu kɛmɛ leŋuɛɛmu (4 500), diola luɛyaalan la vanin layàá, o pilɛ le polale Kad len, o pilɛ le polale Asɛr len, o pillo le polale Nɛftali len.

³⁵Balɔɔ pindo ɲɔɔ vanin dunndo vaalan tɔ́ a laŋɔmaa (18 000), kandɔɔ ɲinkon, kobio nɔnin diolan aa: «Mɛlɛka co nanu.»