Read Kissi Esekiɛl 5 Bible Online

Esekiɛl 5 - Kissi bible

Esekiɛl 5

¹Nɔm Po vanacieo yɛ, cua mɔɛi cɔvii luɛyaa tɛmtɛmnde, ma sendin bollen a siaiye. A cii pɛ sendi, a cua ɲɛ tuvaa, a tuu yiinde a siayii n sendinin ken nde, a piɔw ndi kundalan.

²Te palɛi n bɛnda le tosaa o kobio tilaa nin-nde cuu pɛ, a cua yiiŋii ken kundaa o pilɛ o kundalan layàá coo, a lom ndi o yinnde biyaalen nin o kobio tɛɛn. O kon kɔɔli, a cua yiiŋii kunda diinndɔɛi o layàá coo, a balu kobio pindo a ndi kilio a mɔɛi cɔwve. A cii pɛ, a cua niko kunda mɛɛlaa iyiin kon, a saŋ ndu o hoeiye nin. Ya yɛ, i tisanin ndi kɔɔli a mɔɛi cɔwve.

³Kɛ mà ɲɔla yiiŋii ken ɲɛ-pɔmbɔ, mà ŋɔw ndi o cɔcɔn doma nɔm bɛndoo nin peŋ.

⁴O kon kɔɔli, a cua vɛlɛ yiiŋii n ŋɔawnin ken o doma nɔmndo nin-nde i tiŋ, a vuu ndi o yin, a lom ndi o yinnden nin. O kon, yinnden le fula lon, le kuel cuavaa Israɛlla kpow.»

⁵Nuaa Maalii, o co Mɛlɛka-o dimi ni aa: «Kpalo Yerusalɛmnda co kon ni! Yáà kɛsi Yerusalɛmnda vanaa-mangalaa-isɔɔa tɛɛn déŋ, o lɛŋii va ndu ibalaa pindo-e coo.

⁶Kɛ má tosa nila kalulan, má kɛɛ le tɔŋnda nilan a silala nilan biyɔɔ, má tosa kɔlvesɛiyo hiovɔɔ vanaa-mangalaa-isɔɔa a lɛŋii balu nda-e coo. Kani vanaa co lon-nda pɛɛsa tɔŋnda nilan, má kɛɛ le kelaa o silala nilan coo.

⁷Lelan, nuaa ya Maalii, ya co Mɛlɛka-o dimi ni aa: «Le tùú niaa luɛi o seesiɛi nin hiovɔɔ vanaa-mangalaa-isɔaa balu niaa-a o, le tùú niaa kɛɛ le kelaa o silala nilan coo mí la kɛɛ le tɔŋnda nilan biyɔɔ-o, le tùú niaa kɛɛ vɛlɛ le kelaa o tɔŋnda vanaa-mangalaa-isɔaa balu niaa-a lan coo-o,

⁸le kɔlɔ kon ya Maalii, ya co Mɛlɛka-o dimi ni maa ya bɛɛ, i co niaa mululɔn. I kialunin yamɛi mì tuisi niaa sangalan coo vanaa-mangalaa-isɔɔa o hɔl.

⁹Sangala yáà tuisi vɔ niaa coo le lan, i tuisinin ndan niaa coo. Hali sangala ya tuisi lɛnin vana coo le lan, i tuisinin ndan niaa coo. I tosanin kon le dɛnnda lamààla niaalan kpede.

¹⁰Lelan, fuɲaa sɔamnin poaa ndaa niaa tɛɛn, poaa bɛɛ sɔamnin fuɲaa ndaa. I kilulnin niaa yaman nun mì tuisi niaa sangalan coo. I saŋnin vanaa lonin yoomu o niaa tɛɛn-nda kpow o hoeyun vanin hɔŋndo nɛɛ-nɛɛ ka-on nin.

¹¹Lelan, ya Maalii, ya co Mɛlɛka-o co dimi nuaa ni: i co yoomu, le tùú niaa nɔɔliaa cɛi-kola-toandaa diandaa nuu a dɛnnda niaala nɔɔlɛilan a piɔmaa niaa nɔɔlɛiya-o, ya bɛɛ i keinin kùisiei nia tɛɛn. I tofanin niaa a iɲíí le, i tosalnin niaa dɛnndan a iɲíí le few.

¹²O niaa tɛɛn, vanndacieea kundaa o pilɛ o kundalan tan yáá coo a vunin a nàà n'kɔnyaa. A ɲawnin mà vesa kokolo a yima fofolan. O niaa tɛɛn, kunda diinndɔɔ o layàálan coo vunin o mɔɛi cɔwve bɛngu o kobio balɔɔ pindo. I saŋnin kunda yàándɔɔ o hoeyun vanin hɔŋndo nɛɛ-nɛɛ ka-on nin, o kon mì tisa nda kɔɔli a mɔɛi cɔwve.

¹³Kɔltuw nuu tiiyanin háá o mɛɛlulan. I hulunin kɔl ni fulaa nda coo, mì mingi màá nuu nda coo. O kon telen ya cuiŋinin kɔl ni tuwvo kpede nda coo-o, a sinanin maa ya Mɛlɛka, o paŋala nuu nin ya soo ni.

¹⁴I siinguunin nɔm (Yerusalɛm) kobi piɔlɛiyo, siɛmbulan la biinin niaa co lon-nda vanaa-mangalaa-isɔaa balu niaa-a a vanaa vanin hiovɔɔ-a kpede o hɔl.

¹⁵A vanin fonda tambu labɛɛ-o, a fonda vannda co mamɔɔ-o. A siŋnunnin tɔɔmaseloo a ɲɛ luei vana siòònde-o le vanaa-mangalaa-isɔaa balu nɔm-nda. Kani i peelunin sangala ya tuu lan kpede nɔm coo a kɔltuwvo, mí peelu lan vɛlɛ a kɔltuwvo. I soaŋnin nɔm a kɔl tambɛiyo.

¹⁶I viinin niaa a kɔɔn vɔɔŋun yima fofolan le niaa ciiyo tɛɛmbuuo. I viinin niaa a kɔɔn mun le niaa ciiyo diwvo selemenden. Kani i poondanin ɲɛdiaa niaa o ba, mì cɔɔlu yima fofolan handɔɔ o sangala co nin niaa coo lan coo.

¹⁷I tuisinin yima fofolan a visia biyaa niaa tɛɛn cili le cuavaa niaa diwvo, mì la lo kɔɔla fondo. Nàá n'kɔnyaa a piɔ́mndan la keinin niaa coo. I tuisinin cɔwvo niaa coo. Ya ni, ya Mɛlɛka soo lende ni.