Read Kissi Esekiɛl 6 Bible Online

Esekiɛl 6 - Kissi bible

Esekiɛl 6

¹Mí Mɛlɛka soaa o ya lo, mó dimul-la aa:

²«Po vanacieo sei, muli hɔlla a kpengii pembon Israɛl, mà tɛɛngul mun diom Hala-o.

³Dimul mun aa: «Niaa pembon Israɛl, la yaŋ nilan o sɔɛi Maalii-e, Mɛlɛka pɛɛn. Maalii, o co Mɛlɛka-o dimul vanaa co icali o pembun bɛndon, pembun pɔmbɔn, kpolonndan a o bóltan nin-nda aa: ‹La tofa vɔ ya, i co niaa cɔwvo tuisi coo mì tɛɛmbuu sooluula niaalan.

⁴Máánnda niaalan la tambunin, bonyun fuusan niaan piɔsinin mì diw vanaa niaa má deli o piɔmaa niaa hɔl-ndɔ.

⁵I mɛlinin Israɛlla a vílɛ́iya o piɔmaa ndaa hɔl-ndɔ, mì sɛŋi paala ndalan o máánnda ndalan balɔɔ pindo.

⁶Nɛɛ-nɛɛ niaa co icali, kobila lan la piɔlnin vɔ́-vɔ́, fondala soolaala niaalan la tambunin háá mì máánnda niaala yɔŋ vɔɔnnda lan la piɔsi. Piɔmaa niaa yomiyominin mà cuu kpow, bonyun fuusan niaan cuinunnin mì ɲɛm niaa cɔw mun-ndon ɲum pɔ́lì.

⁷Vannda taw o niaa tɛɛn a cɛɛlunnin má vi, o kon la sinanin maa ya co Mɛlɛka ni.

⁸Kɛ i mɛinin vanaa pum yoomu o niaa tɛɛn, vanaa hialunnin mɔɛi cɔwve, mà lo yoomu-a pɛɛn. I sɛŋinin nda o lɛŋii isumualle tɛɛn.

⁹O kon, vanaa lonin kan yoomu o niaa tɛɛn-nda lonin o vanaa-mangalaa-isɔaa nda vanin a sɛŋian tɛɛn-nda lo, mà loonun a ya (Mɛlɛka) o kɔɔ, mà loonun vɛlɛ a soŋɔ̀ɔ̀ ya soŋ nda le kɔl suundɛi luɛi nda nin má kɔa ya levil-lo, le hɔlaa nda faŋal-la, má mulin o suunda soolaa n'piɔmndo-o. Le hee, siɛmbulan la biinin nda pila le dɛnnda vɔɔnnda nda tosa lan a le dɛnnda nɔɔlɛila nda tosa lan kpede.

¹⁰A sinanin pɛɛngu maa ya co Mɛlɛka ni, maa o co kɔngɔlan fondo fúú le ya va nda le nda dɛnɛ palaa ho tuisio coo le.›»

¹¹Nuaa Maalii, o co Mɛlɛka-o soo ni aa: «Lɔɔ balan, kundu pelon, mà dimi aa: ‹Kpòkóó dɛnɛ! Le dɛnnda nɔɔlɛila cuavaa Israɛlla tosa lan kpow, a cɛɛlunnin o mɔɛi cɔwve bɛngu, mà vi a yima fofolan a á nàà halimaa.

¹²Vanaa vanin levil-la nda vunin a nàà halimaa, mì vanaa vanin macɛlu-a nda vi a yima fofolan. Kɔl ni tuwvo kpow hulunnin nda coo.

¹³O kon la sinanin maa ya co Mɛlɛka ni. La sinanin ken pɛɛngu lɔ́ɔ́ vanaa vunin niaa tɛɛn-nda vanin piɔmaa ndaa o hɔl, o máánnda ndalan balɔɔ pindo, o yɔmii puiyɛi kpow a o bɔɔla yɔmii sɛɛnila yukɔnndan kpow bɛngu-o. A vanin a vílɛ́iya nɛɛ ndáà lum piɔmaa ndaa kpow lasikɔlɔma cun kɛndɛan-nda.

¹⁴I siɛndinin ba nuu nda coo mì tɛɛmbuu lɛŋnde ndalen, mì dɔw len yɛɛvɛ hiovɔɔ maa lɛŋnde veselɛilen Dibla. Nɛɛ-nɛɛ nda co icali, lende ya siɔŋinin lɛŋnden ni, o kon a sinanin maa ya co Mɛlɛka ni.»