Read Kissi Esekiɛl 7 Bible Online

Esekiɛl 7 - Kissi bible

Esekiɛl 7

¹Mí Mɛlɛka soaa o ya lo, mó dimul-la aa:

²«Nɔm Po vanacieo sei, nuaa Maalii, o co Mɛlɛka-o soo o vanaa co o lɛŋnde Israɛl-ten coo-a ni aa: ‹Mɛɛlulan la tiiya fɔ́! Mɛɛlulan la tiiya o kpengun hiɔɔlun lelɛŋndon coo!

³Sunsun, mɛɛlulan la tiiya le niaa. I tuisinin kɔl ni tuwvo niaa coo, mì kelu yamɛi le nɛila niaa co kelaa coo lan. I siilunin niaa dɛnnda niaala nɔɔlɛilan kpede.

⁴I tofanin niaa mì ɲíí bii ya le, i keinin niaa baa coo le few! Kani i siilunin niaa dɛnnda niaa co kelaa coo lan. Nduyɛ, dɛnnda niaala nɔɔlɛilan la fulanin ceen niaa pila o hɔl kpendekele. O kon niaa sinanin ni maa ya co Mɛlɛka ni.»

⁵Nuaa Maalii, o co Mɛlɛka-o soo ni aa: «Dɛnɛ palaa tiiya fɔ́! Dɛnɛ palaa nɔ velan too co o nɛi. Má cè ndu hunɔɔ súlùlù!

⁶Mɛɛlulan la tiiya dɛ! Lan la tiiya nuaa ni, mɛɛlulan pɛɛn! La cɛn ɲaali, mì la va niaa hinullo, má cè lan hunɔɔ se!

⁷Niaa co o lɛŋnden nden nin-nda sei, telen niaa co o nɛi. O tiiya fɔ, telen kon! Paale len le tiiya, paale kpokosi-kpokosilen! Yoondiala kɔlkɛndɛlan la cuu o pembon coo!

⁸O lo cɔɔlu cobe mì saŋ kɔl ni tuwvo niaa Israɛlla coo. Nɛɛ-nɛɛ kɔl ni fulaa mɛɛlu, i cuiŋinin ndu niaa coo. I kialunin yamɛi niɛi mɛɛ dɛnnda niaalan la co yɛ. I siilunin niaa dɛnnda niaala nɔɔlɛilan kpede.

⁹I tofanin niaa mì ɲíí bii ya le. I keinin niaa baa coo le few! I siiluunin niaa volɔɔlan mɛɛ dɛnnda niaalan la co yɛ, dɛnnda niaala nɔɔlɛilan kpede la fulanin ceen niaa o hɔl kpendekele. O kon niaa sinanin ni maa ya co Mɛlɛka soaŋ vana-o ni.

¹⁰La tofa vɔ paale len! La tofa vɔ mɛɛ le tiiya yɛ! Telenndo tiiya, sionnden le co yandɔɔ! Yongaa co kuiyo taw!

¹¹Dɛnɛ vɔɔndo cɛn mó siŋnun siondoole kɔlvesɛi len. Ɲɛ-ɲɛ lo lɛnin o nda tɛɛn te. Ɲɛ-ɲɛ lo lɛnin o bɔɔluu vɔkɔ-vɔkɔ ndaa nin te, ɲɛ-ɲɛ lo lɛnin o sɛ́lɛ́ nda kaakuu kon tɛɛn te! Vana co koŋul nda coo le.

¹²Telenndo tiiya, paale len le tiiya! Vana piandaa dɔawnun ɲaale le, vana pisiaa bii imɔnɔ le! Kani kɔltuwvo piɔndi le tolɔɔ sɛ́lɛ́ kaakuu co hoo o kobio nin-ndo coo.

¹³Hali vana pisiaa va vɔ nin bɛɛ yoomu, o muungu lɛnin o vɔngula o vanin pisio lan coo le, kani sɔɛi tuunun le tambii sɛ́lɛ́ bɛndoo ho-e melnunnin lɛŋ te. Le hakila sɛ́lɛ́ kon, vana-vana nɔlanin yoomu ndɔɔ baŋa le.

¹⁴A hɔŋnin bɛɛ buloo, ɲɛ-ɲɛ vanin o bɛɛndian, kɛ vana-vana kuenin o cɔwvo le, kani kɔl ni tuwvo piɔndinin le tolɔɔ sɛ́lɛ́ nda bɛndu-bɛndoo coo.

¹⁵Cɔwvo vanin o nɛilan coo, nàà n'kɔnyaa a yima fofolan ma vanin o kobio nin! Vana vanin yondoo nin-ndo ndu vunin o mɔɛi cɔwve bɛngu, mì vana vanin o kobio nin-ndo ndu vi a yiaan a á nàà n'kɔnyaa.

¹⁶Vanaa hialunnin má lo yoomu-a, nda ɲaanunnin má kɔ hel o pembon coo. A vanin ndon maa poonpoŋaa caŋ o bóltan nin-nda, vana-vana vanin somisominndo le tɛɛmbuu ndɔɔ.

¹⁷Bala ndalan kpow la fulanin yoomuan, mì vulan la tenga nda kpede maa mamɛn.

¹⁸A vownunnin volɔɔla yuululan, misimisio biinin nda má ɲiiya. Siɛmbulan la biinin nda kpow, a sendinnin tembeltan kpede.

¹⁹A viiviinin volin ndan o nɛilan coo, mà ce sianin ndan maa ɲɛ tumulɛi. Volin ndan a sianin ndan nɔlanin nda baŋa o paale kɔltuwle Mɛlɛka len coo le. A nɔlanin dembela ndalan pimi a mun te, a nɔlanin yeemɛi ndɛi solin a mun te. Kani ken yɔŋnun pow boŋaa ndaa ni, ken tosa ni má luɛi o pɔwlan nin.

²⁰Má kuundian le bolofaa sɔvɛ bɛndu ndáà nɔ-o, má cɔaw piɔmaa lamàà a ɲɛm ndan nɔɔlɛin mun. Lelan ya bɛɛ siinguunin ɲɛm mun ɲɛm nɔɔlɛiyon le laasian ndaa ni.

²¹I malnin ɲɛm ndan kɛndɛn mun mialla o ba, mà poondiaa mun a paa-kala. I malnin mun vanaa kɔlvesɛyaa co o lɛŋnden nin-nda o ba, mà hɛlu mun kpow. O kon, mà nɔɔliaa ɲɛm kɛndɛn mun.

²²I faŋalnin nda hɔlla telen vannda vanin bolofaa nuu nɔɔliaa-o, vanaa delaacooa luɛinin ndon mà nɔɔliaa ndu.

²³Bɛɛndiaa yɔlɔn, kani lɛŋnden le pɛ a dɛnnda kɔlvesɛilan, kobio pɛ a delɔɔcoo.

²⁴Lelan i cuunin vanaa-mangalaa-isɔɔa hiow kɔlvesɛiyo-a nanu, mà hun poondiaa cɛila ndalan. I tɛɛmbuunin kuundian vanaa kpaayaa, o kon cɛila máánnda ndalan la fulanin o baa nin.

²⁵Sanga bɛndoo tiiya! A nuwviaanin kɔlɲuloo, kɛ kɔlɲulu venin te.

²⁶Dɛnɛ palaa tuŋ vanin handɔnndo o dɛnɛ palaa coo ni, yoongula vɔɔnndan tuŋ la vanin hiyahiyanndo ni. A ɲunanin vana-tɛɛngaa-diom Hala-o le nda vundulen cɔmndo, kɛ tɔŋndo vanin vana-solia-lasálàá pɛŋnden, silaa hialunnin vanaa kɔlkalua.

²⁷Masaa vanin o mɔnɛi nin, mì vanaa bɛndua ŋɔɔcian a kɔl tambɛi bɛndoo. Bala vanaa co o lɛŋnden nin-nda la ɲiiyanin. I tosalnin nda mɛɛ kelala ndalan la co yɛ, mì kilu nda yamɛi mɛɛ nda co yaman kiolɔɔ yɛ, o kon nda sinanin ni maa ya co Mɛlɛka ni.