Read Kissi Daniɛl 10 Bible Online

Daniɛl 10 - Kissi bible

Daniɛl 10

¹O vɔsi yàándɔɔ nin o masale Siris, masaa Pɛrse len bɛngu, mí sɔɛi pum dimulun Daniɛl, o nda ke diolan aa Bɛlsasar-o. Sɔɛi ken va sɔɛi toɲɛi a sɔɛi cɔw bɛnduei ni. Mí Daniɛl bii sɔɛi kalɛi bila. Mó sina ndi pɛɛngu o vundulen nin.

²«O telen kon, ya Daniɛl, mí tosa lɔ́ɔ́lan tan yáá o mɔnɛi nin.

³I ve ɲɛdiaa hɛnan ya-o dio le, i ve n visi dio le, i ve mamɔi kolɔɔ le, i ve vɛlɛ macuɛi suunɔn te, háá mí lɔ́ɔ́la yáálan la cuu.

⁴O paale bidiin a lehiɔɔlundɔlen coo o paangii tasei nin, i va isisi o pee bɛndoo Tikre kɔngɔ,

⁵mí heelu hɔlla le tofaa, mí ca langbanɔɔ pum a kola keesoo lekɔɔ. Yaule va ndu o caŋ-nden le va le toosialen a sianin diandan.

⁶Kɔɔle ndɔlen le va maa pow krisolite, hɔlaa ndɔa va maa piɔɔ-volia, hɔlta ndɔlan maa yinnde biyaa. Congúla ndɔlan a pelun ndɔn va n'diandaa maa daɲan kpɔlɔkaa, diom ndɔɔ maa diom sɛ́lɛ́ bɛndu.

⁷Ya Daniɛl kínɛí va vundule len cɔu ni, vanaa va ya ikɛi-ya ve len cɔ le. Kɛ mí siòònde bii nda taw, má ɲaanun le kɔlan vininndo.

⁸Mí lo ya pilɛ kpé, mí va vundule bɛndule len tofaa, mí kpaaya nuu cuu, mí hɔlaa nia mangalan, mí fula mayoomu.

⁹Mí tuɛi langbanɔ kon sɔɛi. Mɛɛ ya tuei ndu sɔɛi, mí del o kuumbuan o kɔl coo maa vana vovɛi.

¹⁰O kon, mí ba vanacieo pilan ya, mó cua ya, mí baŋ vulan a balan lɛŋ, mí va ɲiiyaa.

¹¹Mó dimul-la aa: ‹Daniɛl, nɔm vana Hala kaola hoo taw-vo, bii sɔɔn ya co nɔm dimullo-on bila. Cɔn ma sim, kani o nɔm ndo nda vem ya ni.› Mɛɛ o dimi diomnda lan, mí can a ɲiiyaa.

¹²Mó dimul-la aa: ‹Siòòŋii bíì nɔm te, Daniɛl, kani kabi paale tasele n yiyan le sɔɔn co yɔŋnɔnndo-on sinaa a le tuisinndo tootoo Hala o hɔl-ten, mí Hala tuɛi nɔm diom. Lelan ya hin o nɔm ndo ni.

¹³Mɛlɛkanɔ kandà lɛŋnde Pɛrse len-ndo simul-la o palɛi bidiin a lepilɛ bɛngu, kɛ mí Misɛl, o co simlacinɔ pilɛ o mɛlɛkaa tɛɛn-ndo, hun mala ya. Mí lo lon masaa Pɛrse ikɛi.

¹⁴I hin nihau le nɔm ɲɛ hun yɔŋnunin yungu nɔmndo o siɔdii lacio nin-ndo dimullo, kani vundulen le co vɛlɛ le telen kon.›

¹⁵O va ya sɔɔn mun dimullo, mí tundu hɔlla lɛŋ, mí mei kpili, i nɔla sɔɛi le.

¹⁶O kon mí ɲɛ yoomaa va maa vanaciee-o pilan cɔcɔn nun, mí kumbi sondoo le sɔɛi, mí dimul vana va ya isisi laci-o aa: ‹Maalii nuu, i ɲiiya, siòònde bii ya taw le vundule ya ce len-nden. I fula mayoomu few-few.

¹⁷Vɛ̀ɛ̀ ya vana baalaa nɔla yɛnin suukanndo a Maalii nuu? Nduyɛ, i nɔ lɛhau kpaaya le, i fula mayoomu po!›

¹⁸O kon, mí ɲɛ yoomaa va maa vanaciee-o pilan ya vɛlɛ. Mó luei ya yoomuan.

¹⁹Mó dimul-la aa: ‹Siòòŋii bii nɔm te, nɔm po Hala kaola taw-vo. Vannun a kɔlɲulu. Kindikindin mà sɔla yoomuan.› Tuma o va sɔɛi-yo, mí kandu yoomuan sɔlaa, mí dimul ndu aa: ‹Soo, Maalii nuu! Kani a luei ya yoomuan.›

²⁰O kon, mó ɲuna ya aa: ‹A sina le kɔlɔ ya hin o nɔm ndo o? I co muungu le mɛlɛkanɔ co lɛŋnde Pɛrse len kandaa-o cɔlɔba. I cii pɛ a ndu, mɛlɛkanɔ co lɛŋnde Yavan-nden kandaa-o co vɛlɛ hunɔɔ.

²¹Kɛ i co nɔm ɲɛ sɛvan o Sɛbɛ Toɲaa nin-ndo dimul. Vana-vana mala ya o sɔɔn mun nin te, fɔ Misɛl, simlacinɔ niaa.›»