Read Kissi Daniɛl 5 Bible Online

Daniɛl 5 - Kissi bible

Daniɛl 5

¹Paale pilɛ, mí masaa Baltasar tuisi kafo bɛndoo le vanaa bɛndua. À va vannda vàá pilɛ. Mó kol mɔiyan vanaa kan o hɔl.

²Ndóò ciiyo mɔima man kolɔɔ, mó dimi le ndu ɲɛm diandan n'sianion a ɲɛm diandan volin humbun Nebukanɛsar fuɲa ndɔ cua Yerusalɛm o Cɛi-Hala-o nin-ndon cuuo, haliko mi ndóò kol mɔiyan lenin nda vanaa bɛndua, laandaa ndɔa a sámáá ndɔa.

³Má hun a taalala n'sianila nda cua o Cɛi-Hala-o nin Yerusalɛm-ndan. O kon, mí masaa Baltasar, vanaa bɛndua, laandaa ndɔa a sámáá ndɔa a kol mɔiyan o taalala lan nin.

⁴Mɛɛ nda kol mɔiyan, má kandu piɔmaa nda cɔw a sianion, a volin humbon, a daɲan, a cilinndon, a yɔmnde a á powtan-nda lisaa.

⁵Fɔ́ɔ́fɔ̀, mí suon ba vanacieo n fula ceen, mí n kandu sɛvaa o cìì cɛi lemasaa coo, nɛɛ nda kɛsi ɲɛ kɛsiaa lafitina bɛndoo-a kɔɔli. Mí masaa ca ba vanaciee kon sɛvaa.

⁶Mí siòònde bii ndu taw háá mí hɔlaa ndɔa mangalan. Mí yiyannda ndɔlan la laasian, mí boondun caŋaa ndɔa n yɔɔlian, mí vulan la ɲiiya ndu nákà-nàkà.

⁷Mó yonda coocoo kpélén aa: «La veelul-la vanaa viamaa yavaa, vanaa mangalaa a vanaa soaa a loeon o kɔɔ-a!» Mí masaa dimul vanaa kɔlkalua kan Babilɔn aa: «Vana sina pɛ sɛvaa ho, mò cɔm ya kɔlɔ ndɔɔ, a vownin ndu volɔɔla báà kalala lemasalan, mà vow vɛlɛ yɔlɔn n'sianion ndu o labolo. I yɔngunin ndu fonda yàándɔɔ o masale nilen nin.»

⁸O kon, mí vanaa kɔlkalua va o ba masaa bɛngu-a kpow a sɔɔnguu, kɛ o pilɛ bɛɛ tiwba le sɛva kon a kɔlɔ ndɔɔ masaa tɛɛsiallo le.

⁹Mí siòònde cɔɔlu masaa biyɔɔ taw, mí hɔlaa ndɔa mangalan, mí vanaa bɛndua va ndu o ba bɛngu-a buulan taw-taw.

¹⁰Mɛɛ kalaa masaa tuei sɔɔn mun, mó hun o cɛi kafo kon nin, mó dimul masaa aa: «Òó masaa, màá viow yoomu fɔ́! Yiyan nɔmndo laasian te. Kɔɔle nɔmnden le mangalan te.

¹¹Langbanɔ pilɛ co o masale nɔmnden nin, o nɔ kɔlkalu halaa diandaa nin. O paale fuɲa nɔmnden, mí n ca ndu ɲɛ-tengaa, dɛnɛ sinaa a kɔlkalu velan a kɔlkalu halaa-o nin. Lelan, mí Nebukanɛsar fuɲa nɔm kɛsi ndu bolle vanaa viamaa yavaa, vanaa soaa a loeon o kɔɔ-a, mandea a vanaa mangalaa súúlan kpow.

¹²Mɛɛ kɔl kaamaa kon, dɛnɛ sinaa pɛɛkaa a sinapɛngoo le lɔma sɔlaan a vunduan tɛɛsiaa co Daniɛl kon nin yɛ, o nda ke diolan aa Bɛlsasar-o pɛɛn, veelu ndu mò cɔm nɔm sɛvaa ho a kɔlɔ ndɔɔ.»

¹³O kon, má hun a Daniɛl o masaa lo. Mí masaa ɲuna ndu aa: «Nɔm co Daniɛl fula o vanaa nda hin o biyɔɔ nin-nda tɛɛn-ndo ni, a fuɲa nuu hin fulaa Yuda-a?

¹⁴I tuei maa a nɔ kɔlkalu halaa, ɲɛ-tengaa a dɛnɛ sinaa, a nɔ kɔlkaloo hiovɔɔ ba.

¹⁵À cuu ya vanaa kɔlkalua a vanaa viamaa yavaa, haliko mi ndáà cɔm ya sɛvaa ho a kɔlɔ ndɔɔ, kɛ a tiwba le.

¹⁶I tuei maa nɔm, a tiwba le kɔlɔ lɔma sɔlaan cɔmndo a sɔɔn viannanndon tɛɛsiaa. Taa nɔla pɛ sɛvaa ho a kɔlɔ ndɔɔ tɛɛsiaa, a vownin nɔm volɔɔla báà kalala lemasalan, mà vow nɔm yɔlɔn n'sianion o labolo. O kon kɔɔli, i yɔngunin nɔm fonda yàándɔɔ o masale nilen nin.»

¹⁷Mí Daniɛl cua sɔɛi, mó mulul ndu aa: «Manda ɲɛm-kéan nɔmndon, te kon te yɔngu vanaa celen ɲɛm nɔm kɛndɛn mun. Ya yɛ, i co nɔm sɛvaa ho tɛɛsial, mì cɔm nɔm kɔlɔ ndɔɔ.

¹⁸Òó masaa! Mí Hala-Hiow-Ɲɔɔn-Kpow-vo yɔngu Nebukanɛsar fuɲa nɔm masalen, vanabɛnduyɛi, bɔɔbɔɔyɛi a biiloo.

¹⁹Le bɔɔbɔɔyɛi Hala ndóò yɔngu ndu ken-nde, vannda súúlan kpow, vanaa-mangalaa-isɔɔa a vanaa soaa sɔɔn mangalan yɛ́-yɛ́ɔn-nda kpow ndáà nɔ siòònde a ndu ni. Vana ndóò yeema pɛ le diyɔɔ, ndóò dii ndu, vana ndóò yeema pɛ le mɛiyo yoomu, ndóò mɛi kon yoomu. Vana ndóò yeema pɛ le heeloo, ndóò heelu ndu. Vana ndóò yeema pɛ le tuisio, ndóò tuisi ndu.

²⁰Kɛ mó kuundian háá mí kɔl ndɔɔ pia a yongaa, mó kindi nilan. Lelan, mí Hala faŋa ndu o kpɛŋɛ ndɔ lemasaa coo. Mí biilu ndɔɔ hialun ndu.

²¹Má toaw ndu mó faŋan vanndacieea tɛɛn. Mí yiyan ivisiyaa luɛi ndu nin. Mó kɔ cal yondoo nin nda sofɛlɛa yondoa latulu. Mó dɔawnun balo a billo maa naw. Mí kɔɔle ndɔlen le lindan o kɛmndan nin háá mó sina maa Hala-Hiow-Ɲɔɔn-Kpow-vo nɔ masalen o ceendo coo o labɛngunin ni. O siinguu vana o yeema-o masaa.

²²Nɔm Baltasar, po ndɔ, a sina sɔɛi ken válán, kɛ a tuisin tootoo le.

²³Má simul Maalii co o halataala-o, má cua ɲɛm diandan va o cɛi ndɔɔ nin-ndon, má kol mɔiyan lenin niaa vanaa bɛndua nɔmnda, laandaa nɔmnda a sámáá nɔmnda. Mí la lisa piɔmaa cɔwnun a sianion, a volin humbon, a daɲan, a cilinndon, a yɔmnde a á powtan-nda. Piɔmaa niaa kan yɛ, a ci le, a tui le, a bii ɲɛ-ɲɛ bila le. Kɛ, má sooluu nda, má kɛɛ Hala nɔ yoomu nɔmndo a siɔdii nɔmndo o ba-o biiloo.

²⁴Lelan, Hala kon vem baa ho mó sɛva sɔɛi he ni.

²⁵Tofa vɔ diomnda sɛvan-ndan: Mɛnɛ! Mɛnɛ! Tekɛl! Farsin!

²⁶Kɔlɔ ndɔɔ co hoo ni: ‹Mɛnɛ› kon co dimio ni aa ‹Cɔmndo›. Hala cɔm masale nɔmnden, mó cii len.

²⁷Tekɛl! Kon co dimio ni aa: ‹Tuuvo (landɔɔ) o kiloo›. A tuunun o kiloo coo, kɛ a lusul lende le.

²⁸Farsin! Kon co dimio ni aa: ‹Piɔwvo›. Masale nɔmnden le piɔwnun, mí le yɔngun yungoo Medii a yungoo Pɛrse.»

²⁹Fɔ́ɔ́fɔ̀, mí Baltasar dimul buɛyaa ndɔa aa: «La vow Daniɛl volɔɔla báà kalala lemasalan. La vow yɔlɔn n'sianion ndu o labolo, mì la balu yondaa maa ndu cua fonda yàándɔɔ o masale nilen nin ni.»

³⁰Icɔl kon, má dii Baltasar masaa Babilɔn.