Read Kissi Daniɛl 9 Bible Online

Daniɛl 9 - Kissi bible

Daniɛl 9

¹«O vɔsi tase Darius, po Sɛrsɛs fula Medii-o sul masaa o lɛŋnde Babilɔn-nden coo-o,

²ya Daniɛl, mí nuwviaa o sɛbɛla diandaalan nin, mí sina sɔɛi vɔsila peelunnin le tambii Yerusalɛm-nde lan. Vɔsila belaŋɔmmɛwla Mɛlɛka dimul Yeremi vana-tɛɛngaa-diom Hala-o sɔɛi ndɔɛi lan pɛɛn.

³O kon, mí muli hɔlla o Maalii Hala lo le ndu piɛiyo a le ndu tɛɛlɔnndo o sumndo biyɔɔ nin, mí vownun volɔɔla dɛnɛ palaalan, mí suinun pultan.

⁴Mí tɛɛlun Mɛlɛka Hala nuu, mí sɔlɔlan yɔŋnda vɔɔnndan ndan. Mí dimi aa: ‹Éé Maalii! Hala bɛndoo a kpúlúnkùmaa! Nɔm, a manda kpema nɔmndo le vanaa bii tɔŋnda nɔmndan-nda. A lo o lediom coo a vanaa kaola nɔm-nda.

⁵N cua hakio, n del kasi, n tosa dɛnɛ vɔɔndo. N yii nɔm dúmbú, mí n faŋan o tɔŋnda nɔmndan a o kpema nɔmndo coo.

⁶N yeŋnun vanaa nɔmaa baalaa le, vanaa-tɛɛngaa-diom Hala-a pɛɛn, á tɛɛngul masaa naa, simlacia naa, fuɲaa naa mamaa a yungu naa kpow sɔɔn nɔmndon-nda.

⁷Nɔm Maalii, a sandu. Naa vanaa fula Yuda, Yerusalɛm a Israɛl kpow-va, siɛmbulan la bii naa maa o paalen-nden nin. Siɛmbulan la co le naa vanaa co a sɛŋiannda o lɛŋnde nin macɛlu a levil-la. Kani le sandii naa lepɛŋnde, má toaw naa, mí n sɛŋin o lɛŋii ken nin.

⁸Lende ni Mɛlɛka! Naa siɛmbulan la bii ni: naa pila, masaa naa, simlacia naa a fuɲaa naa mamaa. Kani n cua hakio a nɔm.

⁹Nɔm Maalii Hala naa ɲííye a haki malaa co o ba ni. Kani n simul nɔm a nila kalulan.

¹⁰N bii sɔɛi nɔmnde le, Mɛlɛka Hala naa. N kela o tɔŋnda vanaa nɔmaa baalaa, vanaa-tɛɛngaa-diom Hala-a cɔm naa lan coo le.

¹¹Israɛlla kpow, n tɛɛmbuu tɔŋ nɔmndo, mí n kɛɛ le sɔɛi nɔmnde biyɔɔ. Lelan dangaa a dɛnɛ palaa sɛvan o tɔŋ Moise, vana baala nɔmndo nin-ndo tol naa coo ni, kani n cua hakio a nɔm Hala.

¹²Nɔm Hala, má peelu sɔɔn n kɔngɔlan le naa a le vanaa tosanin masalen naa coo-a tosallo-on. Má tuisi naa sangala bɛndulan coo, kabi ceendo cɔwnun, sanga vaa lende tul-lɔ vana coo le. Sanga tol Yerusalɛm coo-o nɔ velan te.

¹³Maa mɛɛ o sɛvan o tɔŋ Moise-o nin yɛ, mí sangala lan la toal naa coo. Kɛ hali kon, n cɛl le nɔm Mɛlɛka Hala naa kɔllo ɲulullo mí n mal yɔŋ vɔɔn naa le. N kindin le toɲa nɔmndo biyɔɔ le.

¹⁴Lelan, nɔm Mɛlɛka, má tuisi naa dɛnɛ palaa coo. Kani a sandu o dɛnnda n tosa lan kpow nin, kɛ naa, n bii diom nɔmndo le, nɔm Hala naa pɛɛn.

¹⁵Sisa, Maalii Hala naa, nɔm soli cuavaa nɔmnda o lɛŋnde Esipte len nin a kpaaya nɔm bɛndoo-o, nɔm sɔla paale len tɔ́ɔ́ bɛndoo háá paalen-nden hau-vo, n cua hakio a nɔm, n tosa dɛnɛ vɔɔndo.

¹⁶Maalii, mɛɛ dɛnnda nɔmnda sandaalan kpow la co yɛ, faŋa kɔltuw nɔmndo Yerusalɛm coo, kobi nɔmndo a pembii nɔmii diandɛi pɛɛn. Kani le hakila naalan a yɔŋ vɔɔn fuɲaa naa mamaa kobi nɔmndo Yerusalɛm, a yungu nɔmndo a tambu labɛɛ vanaa balu nda-a o sondo ni.

¹⁷A yandi Hala naa, yaŋnun niko piɛile vana baala nɔmndo a tɛɛlɔn o co nɔm-ndo. A ɲíí nɔmnde, nɔm pila muli vɔ hɔlla, ma tofa mɛɛ fonda nɔm diandaa tambu yɛ.

¹⁸Hala nuu, yaŋ-ndɔ nilan ma tuei! Mɛɛndan-ndɔ ɲɛkɛndɛi, ma ce mɛɛ naa n co o mɔnɛi nin yɛ. Nua vɔ mɛɛ kobi diola nɔmndan la co piɔlnɔnndo nin-ndo siɔŋ yɛ. O co le kela naa sandaa le naa n co nɔm tɛɛlɔnndo le, kɛ le ɲíí nɔmii bɛnduei.

¹⁹Maalii, yaŋnun! Maalii, mal haki. Tuei naa diom, keleŋa ɲɛ ya co nɔm ɲunaa-o tosa. Yiyan a kaola nɔmndo o kɔɔ. Kani o kobi nɔmndo ho nin a o yungu nɔmndo ho tɛɛn diola nɔmndan la co piɔlnɔnndo ni.›»

²⁰«I va hiovɔɔ laci a sɔɛi o piɛile nilen nin, i va hakila nilan a hakila yungu nuu Israɛl sɔlɔlanndo, i va Mɛlɛka Hala nuu tɛɛlɔnndo le pembii ndɔɛi diandɛi,

²¹mí Kabriɛl, langbanɔ ya ce o tasendɔ o vundulen nin-ndo toal-la coo púkù-pùkù tuma solia sálà paale delaa.

²²Mó hun dimul-la aa: ‹Daniɛl! I hin le nɔm kɔlkaloo a sinapɛngoo yɔngoo ma bii bila.

²³Tuma n va Hala tɛɛlɔnndo-o, mó dimul-la yoongoo pum le nɔm. Yoongu kon ya hin nɔm tɛɛngul ni. Hala kaola nɔm, a hɛnan ndu taw-taw. Lelan, bii yoongoo ho bila. Sina vundulen-nden pɛɛngu.

²⁴Lɔ́ɔ́lan la kelun belaŋɔmmɛw le yungu nɔmndo a kobi nɔm diandaa, le diondɔɔ a hakilan, le yɔŋ vɔɔndo ciiyo, le hunɔɔ a dɛnɛ sandaa fɛɛn-fɛɛndo, le vunduan a sɔɔn vanaa-tɛɛngaa-diom Hala-a dimi-on peelɔnndo, le Fonda-Dianda-Diandaa mingio sɔɔ Mɛlɛka o ba.

²⁵Tofa vɔ ɲɛ n bɛnda le sinaa ma bii bila-o: kabi telen sɔɛi he dimin-ndo aa: «Mí n muungu, mí n tangul vɛlɛ Yerusalɛm», kɔ bii háá a telen vana nda pɔla pɔla diandaa-o fulanin ceen-ndo, telennda vɔsila ŋɔmmɛw-ŋɔmmɛwlan la tan ŋɔmmɛw. O lɔ́ɔ́lan belaŋɔmpum a latiɔn nin, kobio a soon balu kobio-o co vɛlɛ tangulɔn, kɛ o telennda sangala bɛndulan nin.

²⁶O lɔ́ɔ́la belaŋɔmpum a latiɔn ndan kɔɔli, vana nda pɔla pɔla diandaa-o kialunnin. Vana-vana venin le ndu le, yungu simlacinɔ co hunɔɔ-o tɛɛmbuunin kobio a cɛi-diandaa. Kɛ piɔ́mndo hinulnin simlacinɔ kon súlùlù maa o kpundɛ kɔltuw Hala-o nin. O kelun maa háá o mɛɛlulan ndɔlan, o tosanin cɔwvo, mò tɛɛmbuu ɲɔɔn taw.

²⁷O lɔ́ɔ́ pilɛ bɛngu, o yiinin kpema kàlà-kálàá a vannda taw. O tɛɛmbuunin sálàla n'cɔlulan a sálàla ɲɛm-vaalan o lɔ́ɔ́ táláá bɛngu. O telen kon bɛngu, o tosanin sɔɔn vɔɔŋun bɛndon háá telen kelun le mɛɛlula ndɔlan-ndo.›»