Read Kissi Osee 1 Bible Online

Osee 1 - Kissi bible

Osee 1

¹Sɔɛi Mɛlɛka dimul Osee po Beeri-o-e yɔŋnun hee ni. O telen kon Osias, Yotam, Ahas a Esekia kei masalen tosaa o tàndá Yuda-o coo ni. Mí Yeroboam po Yoas-o ndu va masalen tosaa Israɛl.

²Nuaa Mɛlɛka kei a Osee ni mó kandu sɔɛi o vana ndɔa lo. Mí ndu Mɛlɛka dimul Osee aa: «Kɔ yil vanalanɔ suundɛiyo o nɔ̀u nin, cuavaa niaa vialunin niaa ndu-a, cuavaa vanalanɔ suundɛiya nda vanin ni. Kani vannda ha o lɛŋnden nden nin, a luɛi o suunda soolaa n'piɔmndo, má mulul ya Mɛlɛka kɔɔ.»

³O kon, mí Osee kɔa, mó yil Komɛr cua Diblaim-ndo o nɔ̀u nin. Mó vilul ndu hɔ́ɔ́ piaandoo.

⁴Mí Mɛlɛka dimul Osee aa: «Ke ndu diolan aa Yisreɛl. Kani o lo ɲɛ-pɔmbɔ cobe mì cɛn a yungu Yehu-o, le vanaa nda diw Yisreɛl-la, mì tɛɛmbuu masalen Israɛl kpow.

⁵Paale len, i tɛɛmbuunin kpaaya vanaa cɔwva Israɛl o bóllo Yisreɛl nin.»

⁶Mí Komɛr cua vɛlɛ folio, mó vialu hɔ́ɔ́ laandoo. Mí Mɛlɛka dimul Osee aa: «Ke ndu diolan aa Lo-Ruhama (kon co dimio ni aa «Kaolan te»). Kani i lonin cuavaa Israɛlla koalaa tuŋ te, i ve lɛnin nda hakio malɔɔ tuŋ te!

⁷Kɛ i lonin Yudaa kaolaa tei, mì ciindiaa nda, ya Mɛlɛka Hala ndaa. O venin a kpaasiaa le, o venin a mɔɛi cɔw le, o venin a cɔw le, o venin a n'so, o venin vɛlɛ a vanaa ɲaanun o soa coo-a le ya ciindiaanin nda.»

⁸Mɛɛ nda hiwnun Lo-Ruhama («Kaolan te») labɛngu, mí Komɛr cua vɛlɛ folio, mó vialu hɔ́ɔ́ piaandoo.

⁹Mí Mɛlɛka dimul Osee aa: «Ke ndu diolan aa Lo-Ammi (kon co dimio ni aa «Co-Yungu-Ni-Le»). Kani niaa Israɛlla, la co lɛ yungu ni le, ya bɛɛ, i ve lɛnin ɲɛ-ɲɛ niaa le.»