Read Kissi Osee 12 Bible Online

Osee 12 - Kissi bible

Osee 12

¹«Cuavaa-imamaa Efraim-nda balu ya a còòlan, cɛi Israɛllo balu ya a sɔɔn lakafan. Polale Yuda len le co vɔ ya Mɛlɛka kɔɔli, kɛ le co vɛlɛ halaa celennda sooloo.

²Cuavaa-imamaa Efraim-nda co kiltan hoeiye kɔɔli, a co hoeyii fula a ba paalen le can-ndo-e kɔlan kɔɔli. Lepalaa-lepala a co còòlan a delɔɔcoo vangalaa. A yii kpemaa a lɛŋnde Asiri len, a co cuɛiyan pisio Esiptea o ba.

³Mɛlɛka co hunɔɔ kɔɔsɔ a polale Yuda len, o soaŋnin cuavaa Yakɔb-a le kela nda vɔɔndo. O tosalnin nda mɛɛ dɛnnda ndalan la co yɛ.

⁴O dembe kala nda-o nin pɔ́ Yakɔb koondan bɛ ndɔ pelei ni, telen o siŋnun langbanɔ kálàá-o, mó cɔlɔba nda Hala.

⁵Mó cɔlɔba nda mɛlɛkanɔɔ, mó nɔla mɛlɛkanɔ kon, mí Yakɔb mɛli yeelan, mó tɛɛlun ndu. Betɛl o komal ndu ni, lon Hala soo o naa lo ni.

⁶Mɛlɛka co Hala-Nɔ-Kpaayaa-Kpow-vo ni, diola ndɔlan aa Mɛlɛka.

⁷Lelan sisa, niaa cuavaa-imamaa Yakɔb-a, la mùùngú ya Hala niaa o ibuŋ. La vá kelaa o vanakɛndɛyɛi a o sandei nin. La vá Hala niaa tiindanndo le lɔ́ɔ́-lɔ́ɔ̀.

⁸Ya Mɛlɛka dimi aa: ‹Cuavaa-imamaa Efraim-nda nɔ ɲɛla tuvaala lakafalan o laba maa yulaa Kanaan, a yeema bɔɔ kafalan.›

⁹Mí niaa niaa dimi aa: ‹N siŋnun vanaa bolofaa, n sɔla ɲɛm kɛndɛn latɔ́ɔ́-tɔ́ɔ́-on taw. Bolofaa kon kpow, lalle naa n kelu le ndu sɔlaa ni. N tosa lakafa le, n tosa haki o ndu nuwviaa nin te.›

¹⁰Ya yɛ, kabi o lɛŋnde Esipte len nin, ya co Mɛlɛka Hala niaa ni. I co vɛlɛ niaa kɛsi o cɛila-kolala-toandaalan bɛngu, maa o palɛi bɔɔŋian lakafoe coo.

¹¹I soo o vanaa-tɛɛngaa-diom Hala-a lo, mí cɔm vannda vunduan taw-taw. I soo o talelan nin a sondola vanaa-tɛɛngaa-diom Hala-a.

¹²Vanaa co Kalaad-a tosa dɛnnda lahakilan má siŋnun vanaa fondoa. A co sálàlan solio Kilkal a navaa tovaa, kɛ fondala-loamaa-lasálàla ndalan la siŋnunnin powta kundalan o ciɛɔn nin.

¹³Mí Yakɔb ndóò ɲaanun lɔ́ɔ́ kon, mí ndóò kɔannun Aram, mí Israɛl tosa baalaa le lanɔɔ sɔlaa, mó manda cɔlua le lanɔɔ sɔlaa.

¹⁴A vana-tɛɛngaa-diom Hala-o pum Mɛlɛka kei ni mó soli Israɛlla o lɛŋnde Esipte len nin, a vana-tɛɛngaa-diom Hala-o koni o kei ni mó manda nda.

¹⁵Cuavaa-imamaa Efraim-nda boli Mɛlɛka kɔllo nin taw má yɔŋul ndu. Kɛ Maalii ndaa co nda dɛnnda vɔɔnnda ndalan mingul le vanndacieea nda diw-va. O minginin siɛmbulan ndalan nda pila coo.»