Read Kissi Osee 13 Bible Online

Osee 13 - Kissi bible

Osee 13

¹«Te cuavaa-imamaa Efraim-nda ndáà va pɛ sɔɛi, siòònde ndíì bii vannda kpow. Langbaa kɛsun kálàá nda va Israɛl ni. Kɛ má del kasi le sooluu nda sooluu piɔmndo Baal-lo, má sɔla piɔ́mndo.

²Háá sisa, a co hiovɔɔ laci a hakilan tosaa, a co volin ndan teengiaa mà va piɔmnda cownɔnndo a mun. Piɔmaa nda pila co cɔvɔɔ-a kpow, vanaa caa cɔwva-a co nda cɔvɔɔ ni. Vannda co dimio a nda o kɔɔ aa: ‹Vanaa co sálàlan solio a vanndacieea-a nɔla ma kɔman piɔmaa co maa navaa téndé-a, mà sɔsa nda sondolan le nda sooloo.›

³Lelan, a vanin maa mɔ́m idii, maa kɛmma yala vesa cɔ́-cɔ́-an, maa kefun hoeiye kɔandu mí i faŋa mun o kpele lɔaa n'mallo coo-on. A vanin vɛlɛ maa kumii co fulaa o fɛ̀ɛ̀fɛlan-nde.

⁴Ya yɛ, kabi kandɔɔ o lɛŋnde Esipte len nin, ya co Mɛlɛka Hala niaa ni. La sina Hala celen o ya kɔɔli le, vana ciindiaa celen co o ya kɔɔli le.

⁵I síná niaa o lɛŋnde veselɛilen nin, o lɛŋnde paalen le fùlà taw len nin.

⁶Mɛɛ niaa tiiya o yondo puiyaa nin, mí la dia, mí lapum cá. Mɛɛ niaa pim, mí kɔlta yongalan la luɛi niaa nin, mí la pɔɛɛnun ya.

⁷Kɛ i siŋnunnin le niaa maa yàlà kana, mí mɛngɛla niaa o nɛilan coo maa tambili.

⁸I kpuvanin niaa maa kɔ́lɔ́vúlu nda cuel cuavaa ndɔa-o, mì sɛɛsiaa yala kɔlta niaalan la co nin-ndo. I sɔamnin niaa maa yàlà laandu, mì visia yondoa siow niaa sɛɛsiaa.

⁹Ɲɛ co niaa co laasiaa-o, niaa Israɛlla, le tùú niaa ciŋilan ya-o. Niaa yɛ, la ciŋilan ya vana co niaa malaa-o.

¹⁰Ɔ́ɔ̀ niko masa niaa? Mɛɛ o baŋa niko niaa o kobila niaalan kpow nin! Kuɛɛ simlacia niaa co yɛ? A niaa va dimio a nda o kɔɔ aa ya ke niaa masaa a simlacia-a pɛɛn.

¹¹I ke niaa masaa o kɔl ni tuwvo nin, i puunin ndu niaa o ba o kɔl ni fulaa nin.

¹²Yɔŋ vɔɔn cuavaa-imamaa Efraim-nda co o mandaa, hakila ndalan la co la kɛsiaa kɔ́dɔ́!

¹³Sangaa toalnin nda coo mɛɛ dembe vialaa nɛi vanalanɔɔ nuaa yɛ. O co cɛlɛkpɛa nɔ kɔlkalu le nda co le. Telenndo tiiya bɛɛ le violɔɔ kala nda-o, a cɛl le keleŋaa fulaa ndu o dembe le.

¹⁴I baŋanin nda mì soli nda ciee-piɔ́m, i solinin nda o kpòndò piɔ́mndo bɛngu. Òó piɔ́mndo! Ɔ́ɔ̀ ɲɛm cɔvun n tiindan-ndon? Òó ciee-piɔ́m! Ɔ́ɔ̀ kpaaya nɔm tɛɛmbua? I tofa lɛnin nda mì ɲíí bii ya le.

¹⁵Cuavaa-imamaa Efraim-nda, ndáà pɛlnun ladio puapilɛa ndaa tɛɛn. Kɛ hoeyii cɛn a ba paalen le can-ndo-e co hunɔɔ, hoeyii Mɛlɛka-e co cɔnɔnndo o lɛŋnde veselɛilen nin, mì va heeloo. I veesiaanin peela lebolta cuavaa Efraim-nda, mì soonnda kólaala ndalan la vela. Bolofaa ndaa a ɲɛm vɔngu ndan báà kalan cuannunnin mì n kɔɛnnun.»