Read Kissi Amɔs 2 Bible Online

Amɔs 2 - Kissi bible

Amɔs 2

¹Nuaa Mɛlɛka soo ni aa: «Le yɔŋnda vɔɔnnda yàála vannda Moab a tosa lan, le yɔŋnda vɔɔnnda nda tosa háá tan hiɔɔlu lan, ɲɛ ya kelu le nda tuisio coo-o, i faŋannin lecoo le! Kani a lom paala masa Edɔmnda kpúlúká[2], mí la siŋnun pultan.

²Lelan, i co lɛŋnde Moab len lomɔɔ mì yinnden le lom cɛila lemasalan Keriɔt. Moab tambunin o vóólun-vóólunndo nin, o vɔkɔ-vɔkɔ cɔwvo nin a o diom buloo nin.

³I diwnin vana kialaa n'yamaa ndaa, mì diw simlacia a ndu latulu.» Lende Mɛlɛka dimi ni.

⁴Nuaa Mɛlɛka soo ni aa: «Le yɔŋnda vɔɔnnda yàála vannda Yuda tosa lan, le yɔŋnda vɔɔnnda nda tosa háá tan hiɔɔlu lan, ɲɛ ya kelu le nda tuisio coo-o, i faŋannin lecoo le! Kani a pɛɛsa tɔŋ Mɛlɛka-o, má kɛɛ le silala ndɔlan biyɔɔ. À laasian o piɔmaa lacòòvaa sooloo nin, piɔmaa fuɲaa ndaa bɛɛ a sooluu sindɛ-a pɛɛn.

⁵Lelan, i co yinnden malɔɔ mì le lom tàndá Yuda-o, mì le lom vɛlɛ cɛila lemasalan Yerusalɛm.»

⁶Nuaa Mɛlɛka soo ni aa: «Le yɔŋnda vɔɔnnda yàála Israɛlla tosa lan, le yɔŋnda vɔɔnnda nda tosa háá tan hiɔɔlu lan, ɲɛ ya kelu le nda tuisio coo-o, i faŋannin lecoo le! Kani a co vanaa sandaa pisio le volion, ma va vanaa bala fondoa pisio o samtalan bɛngu.

⁷A nɔ yeemɛi taw le cundu co lɛŋ-ndo cɔu vanaa ikɔɔa o lebol. A co dí vanaa co o sangaa nin-nda tɛɛmbuuo, Poo nda fuɲaa co kɔlan suundaa a vanalanɔ pilɔɔ. Lende nda co diola nila diandaalan bɛɛlan tɛɛmbuuo ni.

⁸A co keiyo hinilan o máánndan ikɛi o volɔɔla nda bii o landei nin-ndan coo. A co mɔima vanaa nda luei bɔnɔɔ-an kolɔɔ o cɛila biilaala hala ndaa nin.

⁹Nduyɛ, nda o hɔl ya diw Amoriia ni, Amoriaa kan ndáà bandu maa yɔmii sɛɛdre, ndáà nɔ yoomuan maa iyálán. Kɛ mí tɛɛmbuu kɔmnde ndalen coocoo a puundun ndan lɛŋ.

¹⁰Nduyɛ, ya Mɛlɛka, ya soli niaa Esipte ni, mí heelu a niaa, mí sim niaa laci o lɛŋnde veselɛilen nin, o vɔsilan belehiɔɔlu bɛngu, haliko mi la hun hiɔlu lɛŋnde Amoriia.

¹¹I hɛli poaa niaa a pum le siŋnɔnndo vanaa-tɛɛngaa-diom Hala-a, mí hɛli poaa langbaa niaa a pum le nda pila sálàá solinndo le vali nuu tosaa. Niaa Israɛlla, vɛ̀ɛ̀ o co lende le i yɔŋnun te? Ya Mɛlɛka co niaa ɲunaa nuaa ni.

¹²Kɛ mí la koesi vanaa solin kan nda pila sálà-a mɔiyan, mí la kuuna vanaa-tɛɛngaa-diom Hala-a kan le diom Hala-o tɛɛnguuo.

¹³Lelan, i co niaa ciimiaa o foofo, mɛɛ ɲɛ ɲaanan soa nan-ndo va o piaa a tumbulan nuaa, mó ciimiaa ɲɔɔ yɛ.

¹⁴Hali vana nɔla kiltan taw-vo bɛɛ sɔlanin nɛɛ viannannda le. Hali vana nɔ yoomuan-ndo tiwnin ba le ɲɛ-ɲɛ tosaa a yoomuma ndɔan te. Hali kuubanɔ cɔwvo nɔlanin yoomu ndɔɔ baŋaa le.

¹⁵Vana caa kpaasiaa hiŋndo-o bɛɛ nɔlanin simullo le. Hali vana hiow keleŋaa-o nɔlanin hiɔlɔnndo le. Hali vana hiow caa sow ɲaanɔnndo-o nɔlanin yoomu ndɔɔ baŋaa le.

¹⁶Paale len, hali kuubanɔ hiow cɔwvo caa-o ɲaanunnin tum fondo fúú!» Lende Mɛlɛka dimi ni.