Read Kissi Amɔs 3 Bible Online

Amɔs 3 - Kissi bible

Amɔs 3

¹«Niaa cuavaa Israɛlla, la yaŋ nilan ɲɛkɛndɛi o sɔɛi he, sɔɛi Mɛlɛka dimi hee niaa coo-e, ì ó dimi hee yungula o soli Esipte lan kpede coo-e. Nuaa o dimi ni aa:

²‹O yungula co o lɛŋnden coo lan kpow tɛɛn, niaa pilɛ kpé ya hɛli ni. Lelan, i co niaa hunɔɔ kɔɔsɔɔ ɲuna le dɛnnda niaala vɔɔnndan kpow.

³Vɛ̀ɛ̀ vanaa ŋiɔn diam pá nɛiyo latulu taa cɛlan fɔlɔn te?

⁴Vɛ̀ɛ̀ yàlàá nɔla pá mo pɛɛliaa o bundɔɔ nin te o ci ɲɛ o co mɛngɛlaa-o le? Vɛ̀ɛ̀ yàlà téndóó nɔla pá mo kuuliaa o bɛ̀mɛ́lta ndɔlan nin te o bii ɲɛ le?

⁵Vɛ̀ɛ̀ yowvo nɔla pá mo lɔɔnun o kpɛ̀lɔ́ɔ̀[3] te o ci ɲɛ o dia-o o kpɛ̀lɛ́ kon te? Yaŋɔɔlen le nɔla pá mì le biondu a ba ndɔ, te o co ɲɛ le pilan nden te?

⁶Vɛ̀ɛ̀ vana nɔla mì vana hɔŋ bulu cɔwvo o kobio nin, mì vanaa co o kobi kon nin-nda kɛɛ ɲiiya? Vɛ̀ɛ̀ dɛnɛ palaa nɔla mo tol o kobio coo te o co Mɛlɛka le cɛl te?

⁷Lende koni i co ni, Maalii Hala tosa ɲɛ-ɲɛ mò kɛɛ vanaa ndɔa baalaa, vanaa-tɛɛngaa-diom Hala-a bulun dɛnɛ kon cɔm te.

⁸Yàlàá co pɛɛliaa, nɛ̀ɛ́-nɛ̀ kɛɛ yɛnin siòònde yɔŋ? Maalii Hala co sɔɛi, nɛ̀ɛ́-nɛ̀ kɛɛ yɛnin sɔɛi Hala-e tɛɛnguu?›

⁹‹La heelu diomndan mì la yonda taw-taw o cɛila lemasalan Asdɔd nin a o cɛila lemasala co o lɛŋnde Esipte len nin-ndan nin! La yonda aa: La cuungian o pembon Samari coo, mì la ce dɛnɛ laasiɛiyo a kɔlvesɛi co tosanndo Samaria tɛɛn-ndo.

¹⁰À sina mɛɛ vana tosa dɛnɔɔ o sandei nin yɛ le. Ya Mɛlɛka soo nuaa ni. A co ɲɛm nda sɔla a kɔlvesɛiyo-on, a n nda sɔla o delɔɔcoo nin-ndon cuungiaa kundala bɛndulan o cɛila lemasala ndalan nin.

¹¹Lelan, Maalii Hala dimi aa: Yaamɔɔ hun balunin lɛŋnden, mò tɛɛmbuu yoomuma niaan, mò yunga cɛila niaala lemasalan!

¹²Nuaa Mɛlɛka soo ni aa: Mɛɛ vana mandaa n'cɔloo soli bɛngula tiɔnnda saa, te kon te nile hɔlte saa yàlàá o sondo yɛ, lende koni Israɛlaa vanin icali o kpɛŋɛla sɔlɔbɔlɔɔlan nin, te kon te o kpelelan coo Damas o tàndá Samari-o nin-nda hialunnin yaamɔɔ ndaa ni.

¹³La yaŋ nilan mì la tɛndal cuavaa Yakɔb-a seilen a sɔɛi he o kɔɔ. Kani ɲɛ Maalii Hala, Hala nɔ Kpaayaa Kpow-vo dimi-o co hoo ni aa:

¹⁴Paale ya soaŋnin Israɛlla le hakila ndalan-nden, i co ɲinkon mɔnɛ soli a máánndan Betɛl: À co lan ɲinkon kpɛɔn yimi mì n deli lɛŋ.

¹⁵I koombiaanin cɛila tangulun le sialten tosaa lenin-ndan a cɛila nda tangul le vɔɔlen tosaa lenin-ndan. Cɛila toosiaa ciŋun kamaa lan bɛɛ la tambunin. Cɛila vanaa bɛndua kpede la koombiaanin.›» Lende Mɛlɛka dimi ni.