Read Kissi Amɔs 5 Bible Online

Amɔs 5 - Kissi bible

Amɔs 5

¹«Òó niaa cuavaa Israɛlla, la yaŋ nilan o sɔɛi he, sɔɛi ya co hee dimio niaa coo-e. Condii dɛnɛ palɛi sɔɛi ken i co ni!

²Israɛlla del, à cen ndɛnin te few! A co ihini lɛŋ lɛngbɛn[6], vana-vana co nda cua isisi le.

³Kani nuaa Maalii, o co Mɛlɛka-o dimi ni aa: ‹Kobi vanaa cɔwva va nin vaa pilɛ-o, n'van kɛmɛ daama a lonin lenin ni. Ciee vanaa cɔwva va nin kɛmɛ-o, n'van tɔ́ daama a lonin lenin le cɛi Israɛlla mandaa ni.›»

⁴«La tuei-yɔ sɔɛi Mɛlɛka dimul cuavaa Israɛlla-e: ‹La nuwviaa ya mì la va yoomu!

⁵Kɛ la nuwviaa ya Betɛl te, la kɔa ya nuwviaa Kilkal te, la hiaw Bɛɛr-Seba le ya nuwviaa le. Kani Kilkal biinunnin o cɛlen nin, Betɛl tambunin few-few.

⁶Le hee, la mulin o Mɛlɛka lo mì la va yoomoo, yɔŋii o tol cuavaa-imamaa Yosɛf-a coo maa leyin mì yinnde len le tɛɛmbuu nda. Nduyɛ vana-vana venin Betɛl le len ɲumio le.

⁷A co lólòó vowvo o yaman kiolɔɔ nin, a co dɛnɛ sandaa nɛwvo lɛŋ.

⁸Mɛlɛka cɔw mɔmtombolaa, ninaa kundaa a nanga-nsiiyo ni[7]. Ndu mingi ɲumndan ɲɛ-tengaa paale siaa ni, ndu piimiaa paalen ni, mò mingi len ɲumma bɛnduan. Ndu cuungiaa mɛmma ihɛllan ni, mò saŋ man o lɛŋnden coo. Diola ndɔlan aa Mɛlɛka.

⁹Ndu tuisi dɛnɛ palaa vanaa kpaayaa coo ni, ndu luei dɛnɛ tambɛiyo o kobila kungan a kpakio lan nin ni.

¹⁰La co nɛyɔnndo tosaa a vana co sɔɛi le dɛnɛ sandaa o kɔɔsɔɔ nin-ndo, mì la va nɛyɔnndo a vana dimi toɲaa-o.

¹¹A vɛlɛ, la co vana bala fondoo nɛwvo o lebol, la co ndu malun ndɔn poondaa o ba a paa-kala. Lelan, cɛila niaa tangul tan a powtan-ndan, la luenin lenin te few. Rɛsɛŋun kɛndɛ-kɛndɛn niaa tɔl mun-ndon, la kolnin mɔima ndɔan te.

¹²Kani i sina maa yɔŋnda vɔɔnnda niaalan la co labɔɔ, hakila niaalan la kui taw-taw. La co vanaa sandaa mɔnɛi lueiyo, La co luɛyɔɔninndo cɛlɔɔ, mì la va dí vanaa bala fondoa tɛɛmbuuo o fonda kialaa n'yamaa.

¹³Lelan telenndo ho, vana nɔ taasio-o, meinɔnndo o meinun ni kpili. Kani telen vɔɔndo telenndo ho co ni.

¹⁴Le hee, la kindin mì la tosa dɛnɛ kɛndɔɔ, la tosa dɛnɛ vɔɔndo le, haliko mi la lo yoomu. O kon, mì Mɛlɛka, Hala-Nɔ-Kpaayaa-Kpow-vo va niaa ikɛi, maa mɛɛ niaa pila co dimio yɛ.

¹⁵Dɛnɛ vɔɔndo nɛinún niaa, mì dɛnɛ kɛndɔɔ hɛnan niaa! La tosa dɛnɛ sandaa nɛɛ niaa kialu yaman o dio kpaki kobio nin-nda. Bɔɔle mì Mɛlɛka, Hala-Nɔ-Kpaayaa-Kpow-vo tuinun vanaa tɔ̀a lo yoomu o polale Yosɛf len coo-a iɲíí.

¹⁶Lelan, nuaa Mɛlɛka, Hala-Nɔ-Kpaayaa-Kpow-vo, ó co Maalii-o dimi ni aa: ‹Vannda somisominnin o fondalan kpede, o nɛila bɛndulan kpow coo, vannda vanin koŋullo aa: Kpòkóó mɔnɛi! Má cè dɛnɛ palaa dɛ! A veelunin vanaa vàá o dɛnɛ biisio, mà veelu vanaa caa caŋndo-a le kɔlan condun biision solio o caŋndo nin.

¹⁷Lɔ́ɔ́ ya keinin niaa tɛɛn-ndo, vannda cɛɛŋunnin o nakɔla n'rɛsɛnndan kpow nin. Ya Mɛlɛka dimi lende ni.›»

¹⁸«Dɛnɛ palaa co nda cum, vanaa yeema le paale Mɛlɛka len cɔu-va! Le kɔlɔ yɛɛ niaa co yɛ len yeemaa? Yɛɛ niaa sɔ̀là yɛnin o paale Mɛlɛka len coo nɛ? Nduyɛ, paale maɲumnden paale len le vanin ni, le venin paale ɲɛ-tengaa le.

¹⁹La vanin paale len mɛɛ vanndo ɲaanun yàlàá, mò kɔ bɔŋan vɛlɛ a kɔ́lɔ́vúloo nuaa yɛ, te kon te, o ɲaanun pɛ mò kɔ luɛi o ndu lo cɛinin, mò handu baa o cìì cɛiyo, kɛwvo lɔva ndu.

²⁰Vɛ̀ɛ̀ paale ɲɛ-tengaalen pá paale Mɛlɛkalen le co ni? Vɛ̀ɛ̀ o co paale maɲumnden te le co le? A toɲa, paale yimyimnden le co ni, le co paale pangele le.»

²¹«I hini lɛ kɔl a kafola niaalan te, la fula ya iyeema po-po! I yeema lɛ bɛɛ mì tuei cuungiannda niaalan tɔ́ɔ́ le few.

²²La solul-la nin bɛɛ sálàla loamaalan, la cuunin ya bɛɛ sálàla kpeyanndan, i cɛl-lɛnin ndan te, i yeema lɛ mì ce cɔlua celulaa niaa co kan diyɔɔ le ya sálàla kɔlɲululan solullo-a le.

²³Lelan, la faŋan ya ikɛi a vɔkɔ-vɔkɔ n'condu niaa ho. I yeema lɛ mì tuei bangala niaalan diom te.

²⁴Kɛ i yeema mì dɛnɛ sandaa va tosanndo mɛɛ mɛnndan ma hiaw nuaa yɛ, mì sɔɔn va tosanndo sakpo mɛɛ mɛmma pee pɔmbɔan ma hiaw a yoomuan nuaa yɛ.

²⁵Niaa cuavaa Israɛlla sei! Mò va maa sálàla n'cɔlulan a sálàla kpeyanndan niaa va ya solullo o vɔsila belehiɔɔlula niaa cii nɛi-tɛɛn o lɛŋnde veselɛilen nin-ndan bɛngu ni?

²⁶Kɛ mí la cua Sikut va masa niaa-o le kelaa a ndu, mí la cua vɛlɛ Kiyun piɔm niaa, a loei halaa kan, a niaa pila cownun-nda.

²⁷Lelan ya bɛɛ cuanin niaa ni mì yɛɛ niaa o biyɔɔ nin Damas lekɔɔli. Lende Mɛlɛka dimi ni. Diola ndɔlan aa Hala-Kpaayaa-Kpow-vo.»