Read Kissi Amɔs 6 Bible Online

Amɔs 6 - Kissi bible

Amɔs 6

¹Dɛnɛ palaa co niaa cum, niaa connun icali o ba niaa coo yili Siɔn-nda, a niaa connun icali o ba niaa coo o pembon Samari coo-a. A toɲa, dɛnɛ palaa co niaa cum, niaa vanaa bɛndua co o lɛŋnde co lɛŋnde taselen o lɛŋii tɔ̀i tɛɛn-nde nin-nda. O niaa lo cuavaa Israɛlla co kɔlan a kiltan ni.

²La kɔ Kalnee mì la kɔ tofa ɲɛ tosan lon-ndo. La cɛn pɛ lon, la kɔɛ háá o kobi bɛndoo Hamat nin. La cɛn pɛ lon, la tol Kat o Filistia lo. La kela vɔ mɛɛndianndo lende, mì la sina te kobila lan la hiow masɛi niɛi ŋiinnde naŋɔɔ, te lɛŋnde ndalen le hiow le niaalen vaa lebɔɔ.

³Kani la co yiyanndo maa la tiwba le paale dɛnɛ palaalen mingio a makɔɔ lándán. Kɛ masale kɔlvesɛilen niaa pila co sɔɔngɔnndo coo lende nuaa ni.

⁴La co ihini o kpelela toosian a ciŋun kamaa lan coo, mì la sɛɛŋun kpɛŋɛla sɔlɔbɔlɔɔlan, mì la va saa kóndóa téndéa sɔmndo, mì la va navaa téndéa niaa hɛli o hèéo nin-nda dioo.

⁵Bangalan la co lɔɔnɔnndo mì niaa va condei solio o foofo. La co yiyanndo maa la co ɲɛm-caan caa lɔɔ maa David.

⁶La co mɔiyan kolɔɔ a taalala humanndan. La co cuɛima kɛndɛ-kɛndɛan suunɔnndo, kɛ la co buulan le dɛnɛ palaa co polale Yosɛf len mɛngɛlaa-o le.

⁷Lelan, vanaa nda biinin mà kɔɛ a nda o cɛlen nin-nda, niaa co va laci ni. O kon, yoondiaala kɔlkɛndɛla niaa co ihini lan la cuunin niaa tɛɛn.»

⁸«Maalii, o co Mɛlɛka-o mɛnan a ndu pila, ɲɛ Mɛlɛka, Hala-Nɔ-Kpaayaa-Kpow-vo dimi-o co hoo ni aa: ‹Yonga cuavaa Yakɔb-a tɛɛmbuu ya kɔllo, i yeema lɛ cɛila ndala lemasalan te. Lelan, i co hunɔɔ kobio Samari a ɲɛm co lenin-ndon malɔɔ yaamɔɔa o ba.

⁹Te n'van tɔ́ ndáà lo paandu yoomu o cɛiyo pum nin ni, o laan nin, nda kpow a cuunin vu.

¹⁰Te vanndo pum cua pɛ vana vílɛ́i ndɔɔ le kɔlan ndu lomɔɔ, o ɲunanin vana co cɛinin di-o aa: Vɛ̀ɛ̀ vana celen co nɔm ikɛi lon? Vana kon mulinin aa: Vana co lɛ nanu le. Vanndo pilɔɔ diminin aa: N meinun kpili! O co telen vana pial Mɛlɛka ladio le co hoo le.

¹¹Kani Mɛlɛka yɔngu diomndo aa: Cɛila bɛndulan la koombiaanin, mì lapɔmbɔlan la buuluu tɛɛngon.

¹²Vɛ̀ɛ̀ soa nɔla ma ɲaanun o pow kpovaa coo? Vɛ̀ɛ̀ vana váà a navaa vàá o pow bandíláà coo? Kɛ niaa, la mangala dɛnɛ sakpoo maa bɔtà, mì la mingi kɔmnde dɛnɛ sandaa maa ɲɛ lolo.

¹³Le ɲɛm co ɲɛ-ɲɛ le-on niaa dɔawnun ɲaale ni. La co kuundianndo a dimio aa: Vɛ̀ɛ̀ o co a kpaaya naa pilaa le naa n sɔla yoomuan man te?

¹⁴Lelan niaa cuavaa Israɛlla, la tuei-yɔ ɲɛ Mɛlɛka, Hala-Nɔ-Kpaayaa-Kpow-vo dimi-o: I cuanin vanaa-mangalaa-isɔɔa pum, mà kandu niaa kpukpaa Lebo-Hamat, mà kɔ tiiya a niaa mɔnɛi lueiyo háá o pee pɔmbɔ co o bóllo Araba nin-ndo.›»