Read Kissi Amɔs 7 Bible Online

Amɔs 7 - Kissi bible

Amɔs 7

¹Ɲɛ Maalii, o co Mɛlɛka-o cɔm ya o vundulen nin-ndo yɔŋnun hoo ni: O va sóónɔa taw-taw bɛɛndiaa telen billo kandu muungoo vulɔɔ-o, telen nda kelu bil tasoo le masaa-o hiovɔɔ bil kon koma kandu vulɔɔ ni.

²Mɛɛ sóónɔa kan cii bil va o lɛŋnden coo-o dio, mí dimi aa: «Éé Maalii, Mɛlɛka, mal naa haki yandi! Te kon te, vɛ̀ɛ̀ cuavaa Yakɔb-a nɔla yɛnin mà lo yoomu, nda co haa sɛ́lɛ́ le-a?»

³O kon mí ɲííye bii Mɛlɛka, mó mangala yiyanndo, mó dimi aa: «Ken tosannin te!»

⁴O kon kɔɔli, ɲɛ Maalii, o co Mɛlɛka-o cɔm ya o vundulen nin-ndo yɔŋnun hoo ni: Mí Maalii, o co Mɛlɛka-o va yamɛi kiolɔɔ a yinnden. Mí yinnde len le va soon bɛndu-bɛndu co o lɛŋnden bɛngu-o lomɔɔ.

⁵O kon, mí dimi aa: «Éé Maalii, Mɛlɛka! Pɛngi hee tosaa, yandi. Te kon te, vɛ̀ɛ̀ cuavaa Yakɔb-a nɔla yɛnin mà lo yoomu, nda co haa sɛ́lɛ́ le-a?»

⁶Le hee, mí ɲííye bii Maalii, Mɛlɛka pɛɛn, mó mangala yiyanndo, mó dimi aa: «Hee bɛɛ tosannin te.»

⁷O kon kɔɔli, mó cɔm vɛlɛ ya vundulen nden: Tofa vɔ, Maalii va isisi o cìì cɛi cɔwnun a yoole tuvaa cɛilen-ndo coo, yoole tuvaa cɛilen le va ndu o ba.

⁸Mí ndu Mɛlɛka ɲuna ya aa: «Amɔs, yɛɛ nɛ n co yɛ cɔu?» Mí mulul ndu aa: «Yoole tuvaa cɛilen ya co cɔu ni.» Mí Maalii dimul-la aa: «I co yoole tuvaa cɛilen malɔɔ vanaa nia tɛɛn, cuavaa Israɛlla pɛɛn. I hiw lɛnin laci a nda hakio malɔɔ le few!

⁹Sooluula cuavaa-imamaa Isaak-a la co itambu, mì cɛila biilaala cuavaa Israɛlla la puusian. I cannin mì kuel polale Yeroboam-nden a mɔɛi cɔwve.»

¹⁰O kon mí Amasia, ó va vana-solia-lasálàá Betɛl-lo yaa congɔnndo o Yeroboam va masa Israɛlla-o lo, le ndu dimullo aa: «Amɔs yii nɔm dúmbú cuavaa Israɛlla tɛɛn. Lɛŋnden le cɛl lɛnin le nilan yaŋɔɔ o sɔɔn o co dimio-on te.

¹¹Kani nuaa o co dimio ni aa: ‹Mɔɛi cɔwve co Yeroboam diyɔɔ ni. A biinin Israɛlla mà kɔɛ a nda o cɛlen nin lɛŋnde ndalen levil polon.›»

¹²O kon kɔɔli, mí Amasia kon dimul Amɔs aa: «Nɔm vana caa mavundoo ho sei! Faŋan nanu few-few mà kɔɛ. Ɲaanun mà muungu o tàndá Yuda-o nin. A nɔla mà kɔ va ɲɛdiaa nɔmndo sɔlaa lon o sɔɔn Hala-on tɛɛnguuo nin.

¹³Kɛ tɛɛnguu lɛ sɔɔn Hala-on on Betɛl nanu le dɛ! Kani cɛi biilaa a cɛi lemasaa co nanu ni.»

¹⁴Mí Amɔs mulul Amasia aa: «I co vana-tɛɛngaa-diom Hala le, i co vɛlɛ po vana-tɛɛngaa-diom Hala le. Vana mandaa n'cɔloo a vana buulua n'buumbuuo[8] ya co ni.

¹⁵Kɛ o cɔlua kan mandaa nin Mɛlɛka cua ya ni, mó dimul-la aa: «Kɔ ma tɛɛngul vanaa nia, a co Israɛlla-a sɔɔn nun.»

¹⁶Lelan, yaŋ niko nilan o sɔɛi Mɛlɛka dimi-e, nɔm co ya hoo kuunaa aa ya tɛɛnguu sɔɔn Mɛlɛka-on a Israɛlla o kɔɔ loo. Nɔm, a kuuna ya aa ya tombola a cuavaa-imamaa Isaak-a o sondo le.

¹⁷Lelan, tuei-yɔ sɔɛi Mɛlɛka dimi-e: ‹Laa nɔm luɛinin o suundaa o kobio ho nin. Poaa nɔmnda a cuavaa nɔmaa laandua cɛɛlunnin a vílɛ́iya o mɔɛi cɔwve bɛngu. Yondola nɔmndan la piɔwnunnin a yoolen. Nɔm pila vunin o lɛŋnde nɔɔlɛilen coo. Vannda biinin cuavaa Israɛlla mà kɔɛ a nda o cɛlen nin lɛŋnde ndalen levil pɔ́-pɔ́!›»