Read Kissi Yonas 2 Bible Online

Yonas 2 - Kissi bible

Yonas 2

¹Mɛɛ nda mal dɔ́ɔ́ Yonas o mɛnndan nin, mí Mɛlɛka yaa suw bɛndoo pum, mó mial ndu. Palɛi ndii yáá, niinoo a lɔan, Yonas va suwvo o dembe.

²Yonas lo suwvo o dembe, mó soli diomndo le Mɛlɛka Hala ndɔɔ piɛiyo. Mó dimi aa:

³«O mɔnɛi nii nin, mí koŋul Mɛlɛka o lani, mí Mɛlɛka mulul-la. A toɲa i va ciee-piɔ́m dí, mí yonda le malaa sɔlaa. Nɔm Mɛlɛka, má tuɛi ya diom.

⁴Nɔm óò viow ya o soon nɔ lamɛɛlu loo nin, o mɛmma ihɛllan bɛngu, mí tindima mamɛnndan máà balu ya sɔ́, mɛmndan ma va tolɔɔ a yoomuan ya coo.

⁵I va dimio maa i townun nɔm levil. Kɛ nduyɛ i canin vɛlɛ Cɛi nɔm diandaa.

⁶Mɛnndan máà tiiya nin ya o labolo dí, mɛmma ihɛllan máà simbu nin ya, cɔ́ɔ́cɔ́ɔ̀an máà muungu nin ya o lebol.

⁷Mi toal o mɛmma ihɛllan bɛngu, nɛɛ pembon cɛn tum-nda dí. Ciee-piɔ́m ndóò va nin sɔkɔma ndɔan kindaa ya kɔɔli le lɔ́ɔ́-lɔ́ɔ̀. Kɛ nɔm Mɛlɛka Hala nuu, ma kɔ soli ya o soon bɛndu kon nin.

⁸Tuma yoomoo va faŋanndo ya o milinndo, mí yiyan a nɔm Mɛlɛka o kɔɔ, o kon mí piɛile nilen le hel háá o nɔm ndo, o calta nɔmndan nin dí.

⁹Vanaa co piɔmaa fondoa sooloo-a, a nɔ dí le cindaa sɔla le.

¹⁰Kɛ ya, i solulnin nɔm sálàlan, mì soli condei le kɛndɛi nɔmnde sinaa, mì tosa mɛɛ ya cua ciɛ́ɔn yɛ. Kani Mɛlɛka o ba cindaa fula ni.»

¹¹O kon kɔɔli, mí Mɛlɛka soaa o suwvo lo, mí suwvo kɔ kuisi Yonas o kɔngɔ vesɛiyo.