Read Kissi Kundalan 1 Bible Online

Kundalan 1 - Kissi bible

Kundalan 1

¹O paale taselen o paangii diinndɔɛi nin, o vɔsi diinndɔɔ nin, o cɔnɔn Israɛlla cɛn Esipte-o kɔɔli, mí Mɛlɛka soaa o Moise lo o cɛi-kola-toandaa-labɔɔŋianndo nin, nɛɛ nda va o lɛŋnde veselɛilen Sinai nin-nda, mó dimul ndu aa:

²«La cɔm sɛ́lɛ́ Israɛlla tɛ́kpɛ́-tɛ́kpɛ́, mì la sɛva nda diolan a kundala ndala n'vanayalan a yungula ndalan. La sɛva diola vanpiaandua a pilɛn-pilɛnnda kpow.

³Niaa Aarɔn, la cɔm vanpiaandua nɔ kandɔɔ vɔsilan bidiin-nda a á nɔ hiovɔɔ bidiin coo-a, vanaa nɔla ma va vanaa cɔwva le Israɛlla-a.

⁴O lepola oo lepola coo, mì la cua vana co bolle pangalen-ndo o pilɛ le vali kon tosaa niaa ndaa.

⁵Vanaa vanin kan niaa ikɛi-ya vanin haa ni: o polale Rubɛn-nden coo, Elisur, po Sedeur-o,

⁶o polale Simeɔn-nden coo, Selumiɛl, po Surisadai-yo,

⁷o polale Yuda len coo, Naasɔn, po Aminadab-o,

⁸o polale Isakar len coo, Netaneɛl, po Suar-o,

⁹o polale Sabulɔn-nden coo, Eliab, po Helɔn-ndo,

¹⁰o polale Efraim, po Yosɛf-o len coo, Elisama, po Amihud-o, o polale Manase, po Yosɛf-o len coo, Kamliɛl, po Pedasur-o,

¹¹o polale Bɛnyamɛn-nden coo, Abidan, po Kideoni-o,

¹²o polale Dan-nden coo, Ahiesɛr, po Amisadai-yo,

¹³o polale Asɛr len coo, Pakiɛl, po Okran-ndo,

¹⁴o polale Kad len coo, Eliasaf, po Deuɛl-lo,

¹⁵o polale Nɛftali len coo, Ahira, po Enan-ndo.»

¹⁶Kan yɔŋnun vanaa sɔla veeloo le vali cɔmaa kon a vali sɛvaa kon tosaa Israɛlla tɛɛn ni. Nda va bolii lapangɛi o polama ndan coo ni. Nda koni yɔŋnun vɛlɛ simlacia o kundala vanaa cɔvaa Israɛlla coo ni.

¹⁷Mí Moise nda Aarɔn a sɔɔngun vanpiaandua Mɛlɛka pesi kan diolan-nda ikɛi,

¹⁸má veelu sɛ́lɔ́ɔ́ kpow le nda cɔmndo tɛ́kpɛ́-tɛ́kpɛ́ a le nda diolan sɛvaa. O paale taselen coo o paangii diinndɔɛi nin, mí Israɛlla sɛvan a kundala ndala n'vanayalan a á yungula ndalan. Má sɛva diola vanpiaandua a pilɛn-pilɛnnda kandɔɔ vɔsilan bidiin háá hiovɔɔ o bidiin coo,

¹⁹maa mɛɛ Mɛlɛka ndóò cɔm Moise dɛnɛ kon yɛ. Lende Moise cɔm nda tɛ́kpɛ́-tɛ́kpɛ́ o lɛŋnde veselɛilen Sinai nin ni.

²⁰Má cɔm polale Rubɛn-nden, po tase Israɛl-lo, má sɛva cuavaa ndɔa imamaa diolan a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

²¹Má cɔm vanpiaandua vaalan belehiɔɔlu a laŋɔmpum a kɛmɛ leŋuɛɛnu (46 500) o polale Rubɛn-nden nin.

²²Má sɛva polale Simeɔn-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

²³Má cɔm vanpiaandua vaalan beleŋuɛɛnu a laŋɔmahiɔɔlu a kɛmɛ leyáá (59 300).

²⁴Má sɛva polale Kad len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

²⁵Má cɔm vanpiaandua vaalan belehiɔɔlu a laŋuɛɛnu a kɛmɛ leŋɔmpum a beleŋuɛɛnu (45 650).

²⁶Má sɛva polale Yuda len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

²⁷Má cɔm vanpiaandua vaalan belaŋɔmmɛw a lahiɔɔlu a kɛmɛ leŋɔmpum (74 600).

²⁸Má sɛva polale Isakar len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

²⁹Má cɔm vanpiaandua vaalan beleŋuɛɛnu a lahiɔɔlu a kɛmɛ lehiɔɔlu (54 400).

³⁰Má sɛva polale Sabulɔn-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

³¹Má cɔm vanpiaandua vaalan beleŋuɛɛnu a laŋɔmmɛw a kɛmɛ lehiɔɔlu (57 400).

³²O polama poaa Yosɛf-a coo, má sɛva polale Efraim-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

³³Má cɔm vanpiaandua o polale Efraim-nden nin vaalan belehiɔɔlu a kɛmɛ leŋuɛɛnu (40 500).

³⁴Má sɛva polale Manase len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

³⁵Má cɔm vanpiaandua vaalan beleyaa a latiɔn a kɛmɛ lediin (32 200).

³⁶Má sɛva polale Bɛnyamɛn-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

³⁷Má cɔm vanpiaandua vaalan beleyaa a laŋuɛɛnu a kɛmɛ lehiɔɔlu (35 400).

³⁸Má sɛva polale Dan-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

³⁹Má cɔm vanpiaandua vaalan belaŋɔmpum a latiɔn a kɛmɛ leŋɔmmɛw (62 700).

⁴⁰Má sɛva polale Asɛr len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

⁴¹Má cɔm vanpiaandua vaalan belehiɔɔlu a ò pilɛ a kɛmɛ leŋuɛɛnu (41 500).

⁴²Má sɛva polale Nɛftali len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a.

⁴³Má cɔm vanpiaandua vaalan beleŋuɛɛnu a layàá a kɛmɛ lehiɔɔlu (53 400).

⁴⁴Vanaa Moise nda Aarɔn a sɛva kpow-va yɔŋnun kan ni. N'van tɔ́ a vanaa ŋiɔŋaa va bolii lapangɛi o poloma tɔ́ a mamiɔmma Israɛlla coo-a mala nda sɛva kon ni.

⁴⁵Vanaa nda sɛva kpede-a, vanpiaandua nɔ vɔsilan bidiin a hiovɔɔ bidiin coo-a, a tiwba le vali cɔwvo tosaa-a,

⁴⁶a va vaalan kɛmɛ leŋɔmpum a layàá a vannda kɛmɔɔ leŋuɛɛnu a beleŋuɛɛnu (603 550).

⁴⁷Vanaa fula o polale Levii len nin-nda nda sɛvan a Israɛlaa tɔ̀a latulu le.

⁴⁸Kani mí Mɛlɛka ndóò soaa o Moise lo, mó dimul ndu aa:

⁴⁹«Sɛ́và leviia le. Cɔm nda nda Israɛlaa tɔ̀a latulu le.

⁵⁰Yɔngu nda vallo o Calta Mɛlɛka lan nin, nɛɛ sɛbɛ kpemaa co-a, mà tosa vallo a ɲɛm-laandun co o cɛi kon nin-ndon a á ɲɛm ndɔn vallon kpow. Nda bɛnda ni mà vili ɲɛm nda tangul Calta Mɛlɛka la lan-ndon a ɲɛm ndɔn valin co lenin-ndon kpow, nda bɛnda vɛlɛ le vallo tosaa o Calta Mɛlɛka la lan nin ni.

⁵¹Te la faŋan pɛ o dɔ́ɔ́ngɔ́ɔ̀ nin, nda bɛnda ni mà puusiaa Calta Mɛlɛka lan. Te la kila pɛ dɔ́ɔ́ngɔ́ celen, nda bɛnda ni mà tondu Calta Mɛlɛka la lan. Te vana celen, vana co leviinɔ loo sɔɔnguu pɛ ikɛi, o sɔla piɔ́mndo.

⁵²Israɛlla kpow, vana-vana bɛnda mò cal o fonda yɔngun ndu-o nin, o kunda vanaa cɔvaa o co tɛɛn-nda nin, o lɛfɛ ndaa bɛngu.

⁵³Leviia balunin calle o Calta Mɛlɛka la sɛbɛ kpemaa co kon nin-ndan ikɛi ni sɔ́, yɔŋii kɔl ni tuwvo tol Israɛlla coo. Leviia bɛnda ni mà tosa vallo o Calta Mɛlɛka la kpemala lan nin.»

⁵⁴Mí Israɛlla cɛl sɔɔn Mɛlɛka dimul Moise-on kpow, má kela lecoo.