Read Kissi Kundalan 13 Bible Online

Kundalan 13 - Kissi bible

Kundalan 13

¹Mí Mɛlɛka soaa o Moise lo, mó dimul ndu aa:

²«Hɛli vanpiaandua o simlacia Israɛlla tɛɛn, o lepolaa-lepola nin vana pilɛ, ma vem nda suansuaannden le kɔlan lɛŋnden Kanaan fɛfɛlaa, lɛŋnde ya yɔngu Israɛlla len.»

³O kon, mí Moise viam vannda cɔnɔnndo nɛɛ nda va icali o lɛŋnde veselɛilen Paran nin-nda, mɛɛ Mɛlɛka ndóò dimul ndu yɛ. Nda kpow simlacia Israɛlla nda va ni.

⁴Diola ndalan la va lan ni: le polale Rubɛn-nden, mó viam Samua, po Sakur-o,

⁵le polale Simeɔn-nden, mó viam Safat, po Hori-o,

⁶le polale Yuda len, mó viam Kalɛb, po Yefune-o,

⁷le polale Isakar len, mó viam Yikal, po Yosɛf-o,

⁸le polale Efraim-nden, mó viam Hosea, po Nun-ndo,

⁹le polale Bɛnyamɛn-nden, mó viam Palti, po Rafu-o,

¹⁰le polale Sabulɔn-nden, mó viam Kadiɛl po Sodi-o,

¹¹le polale Yosɛf len, kon co dimio ni aa polale Manase len, mó viam Kadi, po Susi-o,

¹²le polale Dan-nden, mó viam Amiɛl, po Kemali-o,

¹³le polale Asɛr len, mó viam Setur, po Mikaɛl-lo,

¹⁴le polale Nɛftali len, mó viam Nabi, po Vɔfsi-o,

¹⁵le polale Kad len, mó viam Keuɛl, po Maki-o.

¹⁶Diola vanaa Moise vem suansuaannden le lɛŋnden mɛɛndianndo-a la co lan ni. Mí Moise ke Hosea, po Nun-ndo diolan aa Yosue[11].

¹⁷Mí Moise viam nda le lɛŋnde Kanaan-nden sinaa, mó dimul nda aa: «La kei a Nekɛv, mí la kɔɛ o tàndá n'pemboo nin,

¹⁸mì la mɛɛndian lɛŋnden. Mì la tofa mɛɛ le co yɛ a mɛɛ vanaa co lenin-nda co yɛ, mì la dɔw taasi te vanaa kan nɔ kpaayaa, taa nɔ kpaaya le, taa co sɛ́lɛ́, taa co sɛ́lɛ́ le.

¹⁹Mì la mɛɛndan mɛɛ lɛŋnde nda co nin-nden le co yɛ, te le naŋ, te le niŋ te. Mì la tofa vɛlɛ mɛɛ kobila ndalan la co yɛ, te la co lakungaa a kpaki le, te kon te la co lakungaalan a kpakio.

²⁰Mì la tofa vɛlɛ te lɛŋnden le co lɛŋnde naŋaa ɲɛ, te le co lɛŋnde naŋaa ɲɛ le, te yɔmii bɛnduei co lon, te i co lon te. La kindikindin mí la hin a kɔmnde tɔlɔɔla co o lɛŋnde len nin-ndan.» Nduyɛ, a boondii ken ndáà kiandu rɛsɛŋun tason ni.

²¹O kon, mí suansuaŋaa kan kɔa, má kɔ mɛɛndan lɛŋnden, kandɔɔ a lɛŋnde veselɛilen Sin, háá Rehɔb, Lebo-Hamat ikɛi.

²²Má hel a ba Nekɛv-vo, má tiiya háá Hebrɔn, nɛɛ yungula Ahiman, Sesai a Talmai lan la va icali-a, cuavaa-imamaa Anak-a pɛɛn. Hebrɔn kiolɔnndo, vɔsilan tan ŋɔmmɛw o kon kɔɔli, má kialu Soan o lɛŋnde Esipte len nin.

²³Mɛɛ nda tiiya o dɛɛla bɛndoo Ɛskɔl nin, má kialu lɛvi rɛsɛn tumndo, rɛsɛnndon va lon kpɔ̀nyɔ̀ɔ́. Le tùú kpɔ̀nyɔ̀ kon ndóò lusul taw-vo, má landu ndu o yɔmndo, mí vanaa ŋiɔn cua ndu. Má cua vɛlɛ krenadeon a buumbun koaman.

²⁴Kandɔɔ paale len, má ke fonda kon diolan aa dɛɛla bɛndoo Ɛskɔl (kon co dimio ni aa «Dɛɛla bɛndu kpɔ̀nyɔ̀ɔ́»), le loonɔnndo a kpɔ̀nyɔ̀ n'rɛsɛn Israɛlla kelu lon-ndo.

²⁵Mɛɛ nda kɔ cii palɛi belehiɔɔlu, má cii suansuaannde ndalen, má muungu.

²⁶Má komal Moise, Aarɔn a Israɛlla kpow nɛɛ nda va icali o lɛŋnde veselɛilen Paran nin Kadɛs-a, má downun nda kona, má cɔm nda kɔmnde tɔlɔɔla co o lɛŋnde len nin-ndan.

²⁷Kona nda dɔwnun-ndo yɔŋnun hoo ni, má dimi aa: «N kɔɛ mí n tiiya o lɛŋnde n vem naa nin-nden nin. Toɲaa, lɛŋnde cɔlua a tɔlɔɔlan la naŋ nin taw-taw len le co ni.

²⁸Kɛ nduyɛ, vanaa co lenin-nda nɔ bɔɔ kpaayaa, kobila bɛndulan pila nda nɔ ni, la co vɛlɛ o kpakilan nin. Mí n ca vɛlɛ bɛɛ cuavaa-imamaa Anak-a.

²⁹Amalɛkea co icali o tàndàá Nekɛv nin ni, Hitiia, Yebusiia a Amoriia co icali o tàndá pembun bɛndoo nin ni, Kanannda co icali o mɛmma ihɛllan Mediteranii holnɔnndo a o dɛɛla bɛndu balu Yurdɛn-ndo nin ni.»

³⁰Ndáà kandu nin Moise tɛɔ biyɔɔ, mí Kalɛb kpaa nda, mó dimul nda aa: «N kɔnnun mì n hɛlun lɛŋnde len, kani n nɔla mi n hɛlu len few.»

³¹Kɛ mí vanaa nda kɔɛ suansuaannden latulu-a va dimio aa: «N nɔ́là vanaa co kan o lɛŋnde len nin-nda le, kani a hiow naa yoomuan.»

³²Má kandu cɔmndo Israɛlla o hɔl mɛɛ lɛŋnde len le co yɛ, má dimi aa: «Lɛŋnde naa n kela len nin mí n mɛɛndian len-nden, diwvo le diw vanaa co icali lenin-nda ni. Vanaa naa n ce lon-nda yɛ, langbaa hongoɲonnda pila nda co ni.

³³Mí n ca vɛlɛ vanaa vilɛi-vilɛiya lon, cuavaa-imamaa Anak-a pɛɛn, a fula o polale vanaa vilɛyaa kan nin-nda. Tuma naa n tiiya vanaa kan o hɔl-lo, naa pila n va cɔnnɔnndo maa n'sóónɔ, lende koni nda bɛɛ va naa cɔu ni.»