Read Kissi Kundalan 14 Bible Online

Kundalan 14 - Kissi bible

Kundalan 14

¹Mí Israɛlla kpow a koŋul, má lɔl caŋndo pii.

²Má soaa sɔɔn pɔmbɔn a Moise nda Aarɔn, má dimul nda aa: «Te naa n vinnun pɛ o lɛŋnde Esipte len nin, te kon te o lɛŋnde veselɛilen nden nin, kon va fisa le naa ni.

³Le kɔlɔ yɛɛ Mɛlɛka co yɛ naa yɔɔ ho o lɛŋnden nden nin le kɔlan piɔ́mndo sɔlaa o mɔɛi cɔwve bɛngu, mì yaamɔaa naa kɔ poondiaa laandaa naa a hɔ́aa naa? O co fisa le naa mì n muungun Esipte le?»

⁴Má dimulan vellaa-velle aa: «N cuannun simlacinɔ celen mì n muungun Esipte.»

⁵Mí Moise nda Aarɔn a deli lɛŋ a kuumbuan o kɔl coo Israɛlla kpow o hɔl.

⁶Mí Yosue, po Nun-ndo a Kalɛb, po Yefune-o a sɛɛsiaa volɔɔla ndala cuɛinanndan, nda bɛɛ va o kunda vanaa kɔɛ suansuaannden o lɛŋnde len nin-nda tɛɛn.

⁷Má dimul sɛ́lɛ́ Israɛlla kpow aa: «Lɛŋnde naa n kela len nin mí n mɛɛndian len-nden le co bɔɔ lɛŋnde kɛndɛ bɛndu.

⁸Te Mɛlɛka ce naa pɛ ɲia, o co naa yɔɔ mò yɔngu naa lɛŋnde cɔlua a tɔlɔɔlan la naŋ nin taw-taw len.

⁹Kɛ nduyɛ, la simul Mɛlɛka le. La yɔŋ vɛlɛ siòònde a vanaa co o lɛŋnde len nin-nda le. N co lakɔ nda miɔɔnɔn maa dɔɔma, kani a co lɛ o levundu bɛngu le, vundule va nda kandaa len le faŋan nda coo, naa yɛ Mɛlɛka co naa ikɛi. La vo nda le few.»

¹⁰Mí vannda kpow va dimio le nda[12] viiyo a powtan, telen kon kpafii biilu Mɛlɛka-o fula ceen o cɛi-kola-toandaa-labɔɔŋianndo coo Israɛlla kpow o hɔl ni.

¹¹Mí Mɛlɛka dimul Moise aa: «Mì vannda ha lo ya pɛɛsaa háá lɔ́ɔ́ kuɛɛ nɛ? Mà lo ya kɛɔ laalanndo háá lɔ́ɔ́ kuɛɛ nɛ? Nduyɛ, i tosa sɔɔn kaaman taw nda tɛɛn.

¹²I co nda nàà vɔɔn halimaa tuisi coo mà cuu kpow, mì soli vanaa-mangalaa-isɔɔa hiow nda va sɛ́lɛ́-a a á hiow nda kpaayaa-a nɔm o ipulu.»

¹³Mí Moise mulul Mɛlɛka aa: «Esiptea sina maa nɔm Mɛlɛka soli vannda ha nda tɛɛn a kpaaya nɔmndo ni,

¹⁴mí nda pila dimul vanaa co o lɛŋnden nden nin-nda maa nɔm Mɛlɛka, a co nda tɛɛn, maa kpendekele n cɔmnun nda ni, maa tindile ikumnde nɔmnden le co nda isisi laci, maa o vundule leyinnden nin n sim nda laci icɔl ni.

¹⁵Taa diw niko pɛ vanaa kan kpede, vanaa-mangalaa-isɔaa yɛ́-yɛ́a tuei nɔm tɔ́ɔ́-a co dimi aa:

¹⁶‹Mɛlɛka ndóò tiwba le vannda ha lueiyo o lɛŋnde o yiilu nda kpemaa mó mɛnan-nden nin te, lelan o kei nda bololan kili o lɛŋnde veseleilen nin nuaa ni.›

¹⁷Le hee, Maalii, màá kpaaya nɔmndo cɔmnun a yoomuma nɔmndan kpede! Bau nɔm pila dimi maa:

¹⁸‹Ya co Mɛlɛka biwnanndo ni, vana lo o lediom coo kpeekpei-yo ya co ni. I mal vana haki le yɔŋ vɔɔndo a le biondɔnndan, kɛ i ci vana tɛɛmbua tɔŋndo vana kɛndɛ le, i tuisi cuawva dɛnɛ palaa coo le hakila fuɲaa ndaa háá o lambi yàándɔɔ, háá o lambi hiɔɔlundɔɔ bɛɛ.›

¹⁹Lelan, i tɛɛlun nɔm a yandi, mal vannda ha haki le yɔŋ vɔɔn ndaa mɛɛ canyɛi nɔmnde co ibɔɔ yɛ, mal nda haki mɛɛ n dema nda haki malɔɔ kabi cɔnɔn ndaa Esipte háá sisa yɛ.»

²⁰Mí Mɛlɛka muli aa: «Mɛɛ n ɲuna le nda hakio malɔɔ yɛ, i mal nda haki.

²¹Kɛ nduyɛ, le mɛɛ ya co yoomu yɛ, le mɛɛ biilu nuu pei lɛŋnden ca yɛ,

²²vanaa-vanaa ce haa biilu nuu a sɔɔn kaaman ya tosa o lɛŋnde Esipte len nin a o lɛŋnde veselɛilen nin-ndon, a kon kpede, má tɔɔndan ya bɛmbɔɔ tɔ́, má kɛɛ le sɔɛi nii biyɔɔ-a,

²³vanaa kan kpow o pilɛ bɛɛ ci lɛŋnde ya yiilu fuɲaa ndaa mamaa kpemaa, mí mɛnalan nda le nda len yɔngoo len a lehɔl te. Vanaa pɛɛsa ya-a kpede, o pilɛ bɛɛ luei lenin te.

²⁴Kɛ Kalɛb vana ni baalaa ndu, mó sɔla yiyan kɛndɔɔ, háá o mɛɛlulan o kiisan le sɔɛi nii biyɔɔ le, lelan ya co ndu luei o lɛŋnde len nin ni, lɛŋnde o kɔɛ len nin-nden pɛɛn, haliko mi cuavaa ndɔa imamaa hun siinguu len lɛŋnde nda.

²⁵Mɛɛ Amalɛkea a Kanannda co icali o dɛɛlaa nin yɛ, le sɛ pɛ dɔ́ɔ́ siɔdii, la muungu a ba lɛŋnde veselɛilen, la kɔɛ a kpengii mɛmma ihɛlma makpɛ̀ndɛ̀an.»

²⁶Mí Mɛlɛka soaa vɛlɛ o Moise nda Aarɔn ndo, mó dimul nda aa:

²⁷«Mì mal vɛlɛ vanaa lanila kalua ha ya ciŋilanndo háá lɔ́ɔ́ kuɛɛ nɛ? Kani i tuei caŋnda Israɛlla co lɔ́ɔ́-lɔ́ɔ̀ a ya ciŋilanndo lan.

²⁸Lelan, dimul nda aa Mɛlɛka dimi aa le mɛɛ o co yoomu yɛ, o co niaa biyɔɔ mɛɛ niaa co cɛɛŋɔnndo a ndu ciŋilanndo yɛ.

²⁹La co cɛɛlɔn a vílɛ́iya o lɛŋnde veselɛilen nden nin taw. Niaa vanaa nda sɛva diolan-nda kpede, niaa nɔ vɔsilan bidiin a hiovɔɔ o bidiin coo-a, le tùú niaa caŋ a ya o sondo-o, mɛ̀ɛ́-mɛ̀ɛ́ niaa co sɛ́lɛ́ kpede,

³⁰la luei o lɛŋnde ya mɛnan mí yii kpemaa le niaa kɔlan kɛsio lenin-nden nin te few. Fɔ Kalɛb, po Yefune-o a Yosue po Nun-ndo co luɛyɔɔ lenin ni.

³¹Kɛ hɔ́aa niaa, á niaa dimi aa yaamɔaa niaa co nda diw-va, i co nda yɔɔ lon mà kɔ sina lɛŋnde niaa kɛɛ len-nden.

³²Niaa pila yɛ, o lɛŋnde veselɛilen nden nin niaa co cuvɔɔ vu kpede ni.

³³Poaa niaa co lo hiŋnɔnndo lenin a cɔlua ndaa mandaa háá le vɔsilan belehiɔɔlu. Simul niaa simul-la-o, poaa niaa lonin sanga kon sɔlaa háá mì niaa pila cuu vu o lɛŋnde veselɛilen nden nin.

³⁴La tosa palɛi belehiɔɔlu o suansuaannden nin, la sɔlanin vɛlɛ sangaa le yɔŋ vɔɔn niaa o vɔsilan belehiɔɔlu bɛngu, vɔsio pilɛ le paalen lepilɛ. Lepalaa-lepala, la co va kɔmnde yɔŋ vɔɔn niaa kiɔndɔɔ. O kon, la sinanin mɛɛ sala vana simul ya Mɛlɛka-o co yɛ.

³⁵Ya Mɛlɛka soo nuaa ni. Lende ya co tosa a vanaa lanila kalua liiman kan kpungbɛi le ya simullo-a ni. A co lo vuo o lɛŋnde veselɛilen-nden nin maa cuu kpow.»

³⁶Vanaa Moise ndóò vem le lɛŋnden mɛɛndanndo, má tosa mí vanaa tɔ̀a kpow a caŋ a Moise o sondo, má saan cɔmndo mɛɛ lɛŋnde len le co yɛ-a,

³⁷a soo kan sɔɔn vɔɔnndon a lɛŋnde len-nda, mí Mɛlɛka lɔaa nda, má cuu vu o lepilɔɔ kpede lon.

³⁸O vanaa kɔɛ kan suansuaannden tosaa o lɛŋnde len nin-nda tɛɛn kpow, fɔ Yosue po Nun-ndo, a Kalɛb po Yefune-o lo yoomu ni.

³⁹Mɛɛ Moise kɔ tɛɛngul Israɛlla sɔɔn mun, mí mɔnɛi bii nda kpow, má somisomin taw.

⁴⁰Diimandɔɔ idiiyo púŋ, má can, má heelu a kpengii tàndá pembun bɛndoo, má va dimio aa: «N cua hakio, kɛ sisa, n co lakɔ o fonda Mɛlɛka dimul naa le kɔlan-ndo.»

⁴¹Mí Moise dimul nda aa: «Le yɛɛ nɛ niaa co yɛ faŋanndo o diom Mɛlɛka dimi-o coo? Tambei niaa co kɔlan nuaa ni.

⁴²La kɔa lon te, kani Mɛlɛka co niaa tɛɛn te. La kɔa le, yɔŋii yaamɔaa niaa kɔ dɔw niaa yɛɛvɛ.

⁴³Kani te la kɔɛ pɛ, la co Amalɛkea a Kanannda komal nɛi-tɛɛn ma diw niaa. Mɛɛ niaa faŋan Mɛlɛka o ibuŋ yɛ, ndu bɛɛ venin niaa tɛɛn te.»

⁴⁴O nila kalula ndalan nin, má heelu o lɛŋnde n'pembulen nin, kɛ kesu kpemaa faŋan o dɔ́ɔ́ngɔ́ɔ̀ nin te, Moise bɛɛ faŋan te.

⁴⁵Mí Amalɛkea a Kanaŋaa va icali o pembon coo-a toal, má soaŋ nda taw, má toaw nda háá Hɔrma, ma sɛŋin.