Read Kissi Kundalan 15 Bible Online

Kundalan 15 - Kissi bible

Kundalan 15

¹Mí Mɛlɛka soaa o Moise lo, mó dimul ndu aa:

²«Soo o Israɛlla lo ma dimul nda aa: ‹Te la tiiya pɛ o lɛŋnde ya co niaa yɔngu le calta niaalan kilaa lenin-nden nin,

³mì la yeema le ya sálàla ŋɔa o yin-ndan solullo, o bɛnda mò va cɔlua bɛndua, te kon te cɔlua pɔmbɔa. Sálà ya tuɛi cun mì ɲɔɔ hɛnan ya-o co kon ni, o va sálà loamaa, o va sálà niaa soli le yoole niaa bàá len timbio-o, o va o niaa pila soli a yeemɛi niɛi-yo, o va o niaa soli o kafola niaalan o pilɛ coo-o,

⁴la va ndu pɛ solio, la handu dɛɔ kiloo leyàá lecoo, dɛɛ vɔɔcan a cuɛiyan litilio pilɛ a tálá-o pɛɛn,

⁵a mɔiyan litilio pilɛ a tálá le sálà mamɔiyo solio. Sálà ɲɛm vaa kon a sálà mamɔi kon la bɛnda mì la handun o saa téndé oo saa téndé niaa vanin sálà loamaa, te kon te sálà kɔlɲuloo solio coo.

⁶Le saa kóndóó pilɛ, la bɛnda mì la vɔɔca kpeyanndo kiloo leŋɔmpum o cuɛiyan litilan latiɔn nin,

⁷a mɔima sálàn litililan latiɔn. O kon, i tuei lan cun, ɲɔɔ hɛnan ya.

⁸Te naw téndóó niaa soli sálàá o ya Mɛlɛka lo ni, o va sálà loamaa, o va sálàá le yoole niaa bàá o ya Mɛlɛka lo len timbio, o va vɛlɛ sálà kɔlɲuloo,

⁹la bɛnda mì la handu dɛɔ kiloo leŋɔmahiɔɔlu lecoo, dɛɛ vɔɔcan a cuɛiyan litililan layàá-o,

¹⁰a mɔima sálàn litililan layàá lecoo. Sálàla ŋɔa o yin-ndan la co lan ni, la ya tuɛi cun mì ɲɔɔ hɛnan ya lan.

¹¹Lende niaa bɛnda ni mi la soli nawvo, saa kóndóó, saa téndóó, te kon te cuin téndóó sálà.

¹²Mɛ̀ɛ́-mɛ̀ɛ́ niaa soli cɔlua sálà, la bɛnda mì la handu sálà ɲɛm vaa a mɔima bɛnda le sálà kon-ndan o sálà kalaa coo.

¹³Vana-vana co Israɛlnɔ kpeekpeiyo, o bɛnda mò bii silalan ndan le sálàla ŋɔa o yin-ndan solio, sálàla ya Mɛlɛka tuɛi cun mì ɲɔɔ hɛnan ya lan.

¹⁴Mial co niaa icali o bɛngu coo-o, te kon te mial co nin niaa icali tɛɛn lɔ́ɔ́ levil-lo bɛɛ va pɛ sálàá solio, o bɛnda mò yɔngu cɔwviaala pilɛ lan maa niaa, le sálà ŋɔa o yin-ndo solio, o ya Mɛlɛka tuɛi cun mì ɲɔɔ hɛnan ya-o.

¹⁵Tɔŋ pilɔɔ kpé co le vannda kpow ni. Le fɛɛn a fɛɛn, tɔŋ kon bɛnda mò mangalan te. Mɛlɛka o hɔl, ɲɛ pilɔɔ dɛnɛ kon co le niaa cuavaa pilacieea a le mialla ni.

¹⁶Tɔŋ pilɔɔ a sila pilɔɔ co le niaa pila a le mialaa co icali niaa o bɛngu coo-a ni.›»

¹⁷Mí Mɛlɛka soaa o Moise lo, mó dimul ndu aa:

¹⁸«Soo o Israɛlla lo ma dimul nda aa: ‹Te la tiiya pɛ o lɛŋnde ya co niaa yɔɔ nin-nden nin,

¹⁹mì la va ɲɔɔn o lɛŋnde len nin dioo, la bɛnda mì la faŋa ɲɛm mun n'pum le Mɛlɛka sálàá solullo a mun.

²⁰Te la va pɛ bulu niaa lomɔɔ, la bɛnda mì la faŋa kpungbɛi tasei niaa loam-nde mɛɛ vana faŋa tumbu tasoo o ɲɛm koavan coo yɛ, mì la solul-la kpungbɛi ken sálà.

²¹Le fɛɛn a fɛɛn, lende niaa Israɛlla bɛnda ni mi la solul-la sálàá a bulula niaala tasela niaa loam o cɛila loamaala bulula niaalan nin-ndan ni.›»

²²«Te o va pɛ maa o sina lepɛŋndo nin, la bii tɔŋnda ya yɔngu Moise lan o pum te,

²³mì la bii silala ya yɔngu niaa a sondo Moise-o lan o pum te, kandɔɔ paale ya handu lan-nden háá le fɛɛn a fɛɛn,

²⁴te o sina lepɛŋndo nin biondɔn kon tosan ni, mì vannda bii ndi bila le, Israɛlla kpow a bɛnda mà yɔngu naw tovaa o pilɛ le sálà loamaa solio, sálà ya tuɛi cun mì ɲɔɔ hɛnan ya-o co kon ni, a cuin toovio pilɛ le sálà co le hakio sɔlaa malɔɔ-o solio.

²⁵O kon, vana-solia-lasálàá tosa faleŋii baŋannde le hakio sɔlaa malɔɔ le Israɛlla kpow. O kon, a sɔla hakio malɔɔ le biondɔn kon, kani o sina lepɛŋndo nin nda bendun biondɔn kon ni. Lelan nda hin a sálà ŋɔa o yin-ndo, o ya tuɛi cun mì ɲɔɔ hɛnan ya-o a á cɔlu sálà co le hakio sɔlaa malɔɔ-o ya o hɔl le biondɔn nda bendun kon o sina lepɛŋndo nin-ndo ni.

²⁶Kon tosan pɛ, Israɛlla kpow a sɔla hakio malɔɔ, mialaa co nda tɛɛn-nda bɛɛ sɔla hakio malɔɔ, kani o sina lepɛŋndo nin vannda kpow a bendun biondɔn kon ni.

²⁷Te vanndo ndu pilɛ bendun o sina lepɛŋndo nin ni, o bɛnda mò yɔngu cuin téndé nɔ vɔsio pilɛ-o le sálà co le hakio sɔlaa malɔɔ-o.

²⁸O yɔngu pɛ, vana-solia-lasálàá tosa faleŋii baŋannde Mɛlɛka o hɔl le vana bendun kon o sina lepɛŋndo nin-ndo. Te faleŋii baŋaŋii ken tosan pɛ, o sɔla hakio malɔɔ.

²⁹Tɔŋ pilɛ kon vanin le Israɛlaa pilacieea a le mialaa vanin icali nda tɛɛn-nda ni.

³⁰Kɛ te vanndo tosa pɛ dɛnɛ vɔɔndo a kɔlvesɛiyo, o va cua pilaciee o va mial, mɛɛ ya Mɛlɛka o tɛɛndan ni. Lelan, a bɛnda mà faŋa ndu Israɛlla tɛɛn few.

³¹Kani o pɛɛsa sɔɛi nii, mó tɛɛmbuu tɔŋ nuu, o bɛnda mò faŋan vanaa tɔ̀a tɛɛn. Nduyɛ sanga tɛɛmbuu ndɔɔ vanin ndu pila o lebol.»

³²Tuma Israɛlla va o lɛŋnde veselɛilen nin-ndo, má saalun langbanɔɔ pum yɔmnde tingɔɔ o paale pɛngiaalen coo.

³³Mí vanaa saalun ndu-a hun a ndu o Moise, Aarɔn a o sɛ́lɔ́ɔ́ kpede lo.

³⁴Má bii ndu, má manda ndu, kani ɲɛ-ɲɛ ndóò dimin-ndɔ a dɛnɛ ndɔɔ o kɔɔ le.

³⁵Mí Mɛlɛka dimul Moise aa: «Langbanɔɔ ho bɛnda mò sɔla piɔ́mndo, sɛ́lɔ́ɔ́ kpow a bɛnda mà vii ndu a powtan o dɔ́ɔ́ngɔ́ɔ̀ kɔɔli háá mo vi.»

³⁶O kon, mí sɛ́lɔ́ɔ́ soli ndu o dɔ́ɔ́ngɔ́ɔ̀ kɔɔli, má vii ndu a powtan háá mó vu mɛɛ Mɛlɛka dimul Moise le tosaa yɛ.

³⁷Mí Mɛlɛka soaa o Moise lo, mó dimul ndu aa:

³⁸«Soo o Israɛlla lo ma dimul nda aa: ‹Kandɔɔ a niaa pila, kɔ bii a cuavaa niaa imamaa, la bɛnda mì la sɔɔluu kɛilan o domala niaalan cɔcɔn, mì la kei kɛi kola nda yin a kaan-ndo o kɛila lan nin.

³⁹O kon, te la vanin pɛ kɛila lan cɔu, la loonun a tɔŋnda Mɛlɛka lan, la kela lecoo. Te ken tosan pɛ, la laasian ndɛnin o yiyannda kɔlta niaalan nin mì hɔlta niaalan la luei niaa o dɛnɛ nɔɔlɛiyo nin te[13].

⁴⁰La vanin loonɔnndo a tɔŋnda nilan mì la bii lan. O kon, la vanin a diandaa le Hala niaa.

⁴¹Ya co Mɛlɛka ni, Hala niaa pɛɛn. Ya soli niaa o lɛŋnde Esipte len nin le vaa Hala niaa ni. Ya co Mɛlɛka ni, Hala niaa pɛɛn.›»