Read Kissi Kundalan 17 Bible Online

Kundalan 17 - Kissi bible

Kundalan 17

¹Mí Mɛlɛka soaa o Moise lo, mó dimul ndu aa:

²«Soo o Eleasar, po Aarɔn vana-solia-lasálàá lo, ma dimul ndu mò soli bonyun fuusan o yinnden nin, mò kɔ hulu dɛngultan lándán, kani n siŋnun teengen le vali Mɛlɛka-o.

³Ma cua bonyun fuusan vanaa cua haa hakio má sɔla piɔ́mndo-a-on, ma lɔɔ mun a káángoo, ma toosiaa ciliŋun bɔɔpɔn, ma kumbu fonda-loamaa-lasálàá a mun. Kani a cii mun Mɛlɛka cɔm mí n siŋnun teengen le vali ndɔɔ. Mun vanin tɔɔmaseloo le Israɛlla kanalanndo ni.»

⁴Mí Eleasar vana-solia-lasálàá cua bonyun fuusan n'daɲan va vanaa yinnden le lom-nda o ba-on, ma tosa mun ciliŋun bɔɔpɔn le fonda-loamaa-lasálàá kumbɔɔ.

⁵Ciliŋun mun yɔngu Israɛlla yiyanndo ni maa vana-vana co o polale Aarɔn-nden nin te, o bɛnda mò sɔɔnguu le ansan lomɔɔ Mɛlɛka o hɔl te, yɔŋii dɛnɛ palaa tol ndu coo maa Kore nda vanaa va ndu kɔɔli-a mɛɛ Mɛlɛka dimi a sondo Moise-o yɛ.

⁶Diimandɔɔ, mí sɛ́lɛ́ Israɛlla kpow a tambu kɔl a Moise nda Aarɔn, má va dimio aa: «Niaa diw yungu Mɛlɛka-o ni.»

⁷Kɛ telen nda va cuungianndo le nda delɔɔ coo-o, má mulin a ba cɛi-kola-toandaa-labɔɔŋianndo, má ca mí kumnde kumbu cɛi-kola-toandaa kon, mí biilu Mɛlɛka-o cɔmnun kpendekele.

⁸Mí Moise nda Aarɔn a kɔ sim o cɛi-kola-toandaa-labɔɔŋian kon sondoo.

⁹Mí Mɛlɛka soaa o Moise lo, mó dimul ndu aa:

¹⁰«La faŋan vannda ha ikɛi mì cii nda o lepilɔɔ kpede.» Má del lɛŋ a kuumbuannda o kɔl coo,

¹¹mí Moise dimul Aarɔn aa: «Cua bonyii fuusɛi nɔmnde cɔ́-cɔ́ ma cua dɛngulta biyaalan o fonda-loamaa-lasálàá coo, ma vow lenin, ma cucu ansan lecoo, ma kɔɛ Israɛlla o ibuŋ a lan cɔ́-cɔ́, ma kɔ tosa faleŋii baŋannde le haki ndaa. Kani Mɛlɛka tuulu kɔl taw-taw, nduyɛ, nàà halimaa kandu nihau vannda biyɔɔ.»

¹²Mí Aarɔn tosa mɛɛ Moise dimul ndu yɛ, mó cua bonyii fuusɛi, mó kɔa a kiltan Israɛlla tɛɛn, nàà halimaa ndóò kandu nin vannda biyɔɔ lekɛ́ndɛi. Mí Aarɔn fuusa ansan le faleŋii baŋannde tosaa le haki ndaa.

¹³Mó sim vanaa vi-a a vanaa va vɔ yoomu-a tɛɛn, mí vannda pɛngi vuo.

¹⁴Vanaa vi a nàà kon-nda va vaalan tɔ́ a lahiɔɔlu a kɛmɛ leŋɔmmɛw (14 700), faŋanndo o a vi o dɛnɛ Kore-o nin-nda coo.

¹⁵Mí Aarɔn muungu Moise o ibuŋ o cɛi-kola-toandaa-labɔɔŋianndo sondoo. Mí dɛnɛ palaa pɛngi.

¹⁶Mí Mɛlɛka soaa o Moise lo, mó dimul ndu aa:

¹⁷«Ɲuna Israɛlla mì lepola oo lepola le yɔngu nɔm tindaa o pilɛ, mì vanaa co bolii lapangɛi o polama man coo-a a yɔngu nɔm tindalan tɔ́ a latiɔn, ma sɛva diola vana-vana o tinda ndɔ o yɔngunin-ndo coo.

¹⁸Ma sɛva diola Aarɔn-ndan o tinda polale Levii len le yɔngunin-ndo coo. Kani vana-vana co bolle pangalen o polalen coo nɔnin tindaa o pilɛ.

¹⁹Ma kɛsi tindala lan o cɛi-kola-toandaa-labɔɔŋianndo nin o kesu kpemaa hɔl-ndɔ, o fonda ya bɔŋan a niaa-o.

²⁰Tinda pei lendei kuumiaanin-ndo, mɛɛ vana nɔ tinda kon-ndo ya hɛli ni. O tosan pɛ lende, mɛɛ i cii cɛɛŋɔnnda Israɛlla co ya o lani a niaa o sondo lan.»

²¹Mí Moise tɛɛngul Israɛlla sɔɔn mun, mí vanaa va bolii lapangɛi-ya kpede a cuu ndu tindala lan, bolle panga oo bolle panga tindaa pilɛ o diola cɛi ndɔɔ, má hun a tindalan tɔ́ a latiɔn. Tinda Aarɔn-ndo va o tindala lan tɛɛn.

²²Mí Moise kɛsi lan Mɛlɛka o hɔl o cɛi-kola-toandaa kesu kpemaa nin.

²³Diimandɔɔ, mó luɛi o cɛi-kola-toandaa kon nin, mó ca maa pei lendei kuumiaa o tinda Aarɔn-ndo coo, ó va o kɛsiaa le polale Levii len-ndo, mó ca maa pei lendei ken piɔsi mí komɔɔla tɔlɔɔ amanndiee la fula ladiuvaalan o fondala lan.

²⁴Mí Moise cua tindala va lan lakɛsiaalan Mɛlɛka o hɔl-tan kpow, mó yoo Israɛlla lan, mí nda pila ca ɲɛ tosan-ndo, mí vana-vana bii tinda ndɔɔ.

²⁵Mí Mɛlɛka dimul Moise aa: «Mingi tinda Aarɔn-ndo kɛsi o kesu kpemaa hɔl-ndɔ. O co va o mandaa lon le vanaa yeema le niaa simullo-a kanalanndo. Lende n bɛnda ni ma cii cɛɛŋɔnnda nda co o ya lo a niaa o sondo lan, yɔŋii nda sɔla piɔ́mndo.»

²⁶Mí Moise tosa mɛɛ Mɛlɛka dimul ndu yɛ.

²⁷O kon kɔɔli, mí Israɛlla dimul Moise aa: «A ce maa n tambu, n dɔwnun yɛɛvɛ, n co cuvɔɔ vu kpow.

²⁸Kani vana-vana sɔɔnguu pɛ o Calta Mɛlɛka lan ikɛi, o sɔla piɔ́mndo. Bàà naa kpow mì n cuu vu háá vana mɛɛlaa?»