Read Kissi Kundalan 2 Bible Online

Kundalan 2 - Kissi bible

Kundalan 2

¹Mí Mɛlɛka soaa o Moise nda Aarɔn ndo, mó dimul nda aa:

²«Israɛlla, vana-vana bɛnda mò cal o fonda ndɔɔ nin, o lɛfɛ co le yungu ndɔɔ-o bɛngu, o cɛi-kola-toandaa-labɔɔŋianndo balɔɔ sɔ́.

³Mì polale Yuda len le cal o fonda ndaa nin, o lɛfɛ landaa ndaa bɛngu a ba paalen le can-ndo. Mà cal mɛɛ kundala ndala cɔwlan la co yɛ. Vana co bolle pangale ndalen-ndo co Naasɔn, po Aminadab-o ni.

⁴Kunda o co bollen-ndo, vanaa cɔwva co vaalan belaŋɔmmɛw a lahiɔɔlu a kɛmɛ leŋɔmpum (74 600), vanpiaandua kposon.

⁵Kundala bɛnda mì la cal nda ikɛi lan la co polale Isakar len ni, vana co bolle pangale ndalen-ndo co Netaneɛl, po Suar-o ni.

⁶O polale len coo, vanaa cɔwva co vaalan beleŋuɛɛnu a lahiɔɔlu a kɛmɛ lehiɔɔlu (54 400), vanpiaandua kposon.

⁷O polale Sabulɔn-nden coo, vana bɛnda mò sim nda laci-o co bolle pangale ndalen ni, Eliab, po Helɔn-ndo pɛɛn.

⁸O polale len nin, vanaa cɔwva co vaalan beleŋuɛɛnu a laŋɔmmɛw a kɛmɛ lehiɔɔlu (57 400), vanpiaandua kposon.

⁹O fonda polale Yuda len le co icali nin-ndo nin, vanpiaandua sɛvan-nda co vaalan kɛmɛ a belaŋɔmaa a laŋɔmpum a kɛmɛ lehiɔɔlu (186 400) le vanaa cɔwva kundala yàála lan. Nda bɛnda ni mà sim laci o kɔlan.

¹⁰Mì polale Rubɛn-nden le cal a ba too o fonda ndaa nin mɛɛ kundala ndala cɔwlan la co yɛ, o lɛfɛ landaa ndaa bɛngu nda vanin icali ni. Vana co bolle pangale ndalen-ndo co Elisur, po Sedeur-o ni.

¹¹O polale len nin, vanaa cɔwva co vaalan belehiɔɔlu a laŋɔmpum a kɛmɛ leŋuɛɛnu (46 500), vanpiaandua kposon.

¹²Polama bɛnda mì ma cal polale Rubɛn-nde len ikɛi-yan ma co man ni: polale Simeɔn-nden, vana bɛnda mò sim nda laci-o co bolle pangale ndalen ni, Selumiɛl, po Surisadai-yo.

¹³O polale len coo, vanaa cɔwva co vaalan beleŋuɛɛnu a laŋɔmahiɔɔlu a kɛmɛ leyáá (59 300), vanpiaandua kposon.

¹⁴O len kɔɔli, polale Kad len, vana bɛnda mò sim nda laci-o co bolle pangale ndalen ni, Eliasaf, po Reuɛl-lo.

¹⁵O polale len nin, vanaa cɔwva co vaalan belehiɔɔlu a laŋuɛɛnu a kɛmɛ leŋɔmpum a beleŋuɛɛnu (45 650), vanpiaandua kposon.

¹⁶O fonda polale Rubɛn-nden le co icali nin-ndo nin, vanpiaandua sɛvan-nda co vaalan kɛmɛ a beleŋuɛɛnu a ò pilɛ a kɛmɔɔ lehiɔɔlu a beleŋuɛɛnu (151 450) le vanaa cɔwva kundala yàála lan. Nda bɛnda le kɔlan kunda tasoo kɔɔli fiɔ́ɔ́-fiɔ́ɔ̀ ni.

¹⁷Te nda kɔɛ pɛ, polale Levii len le kɔɛ nda kɔɔli a cɛi-kola-toandaa-labɔɔŋianndo o kundala tɔ̀lan tɛɛn. Mà kɔɛ mɛɛ nda co icali a fondalan o dɔ́ɔ́ngɔ́ɔ̀ nin yɛ, mì vana-vana kɔɛ o lɛfɛ landaa ndɔɔ bɛngu.

¹⁸Lɛfɛ landaa co le polale Efraim-nden-ndo bɛnda mò va a ba paalen le del-lo. Mì vannda va a kɛsiaa mɛɛ kundala cɔwla ndalan la co yɛ, vana co bolle pangale ndalen-ndo co Elisama, po Amihud-o ni.

¹⁹O polale len coo, vanaa cɔwva co vaalan belehiɔɔlu a kɛmɔɔ leŋuɛɛnu (40 500), vanpiaandua kposon.

²⁰Vanaa bɛnda mà cal polale Efraim-nden ikɛi-ya co haa ni: polale Manase len, vana bɛnda mò sim nda laci-o co bolle pangale ndalen ni, Kamliɛl, po Pedasur-o.

²¹Vanaa cɔwva co vaalan beleyaa a latiɔn a kɛmɛ lediin (32 200) o polale len coo, vanpiaandua kposon.

²²O kon kɔɔli, polale Bɛnyamɛn-nden, vana bɛnda mò sim nda laci-o co bolle pangale ndalen ni, Abidan, po Kideoni-o.

²³Vanaa cɔwva co vaalan beleyaa a laŋuɛɛnu a kɛmɛ lehiɔɔlu (35 400) o polale len coo, vanpiaandua kposon.

²⁴O fonda polale Efraim-nden le co icali nin-ndo nin, vanpiaandua sɛvan-nda co vaalan kɛmɛ a laŋɔmaa a kɛmɛ (108 100), le vanaa cɔwva kundala yàála lan. Nda bɛnda ni mà va kunda yàándɔɔ le kɔlan.

²⁵O fonda calaa polale Dan-nden, ó va a ba luaŋ-ndo-o, mà cal lenin mɛɛ kundala ndala cɔwlan la co yɛ. Vana bɛnda mò sim nda laci-o co bolle pangale ndalen ni, Ahiesɛr, po Amisadai-yo.

²⁶Vanaa cɔwva co vaalan belaŋɔmpum a latiɔn a kɛmɛ leŋɔmmɛw (62 700) o polale len nin, vanpiaandua kposon.

²⁷Kundala bɛnda mì la cal polale len ikɛi lan la co lan ni: polale Asɛr len, vana bɛnda mò sim nda laci-o co bolle pangale ndalen ni, Pakiɛl po Okran-ndo.

²⁸Vanaa cɔwva co vaalan belehiɔɔlu a ò pilɛ a kɛmɛ leŋuɛɛnu (41 500) o polale len nin, vanpiaandua kposon.

²⁹O len kɔɔli, polale Nɛftali len. Vana bɛnda mò sim nda laci-o co bolle pangale ndalen ni, Ahira, po Enan-ndo.

³⁰Vanaa cɔwva co vaalan beleŋuɛɛnu a layàá a kɛmɔɔ lehiɔɔlu (53 400) o polale len nin, vanpiaandua kposon.

³¹O fonda polale Dan-nden le va icali nin-ndo nin, vanpiaandua sɛvan-nda co vaalan kɛmɛ beleŋuɛɛnu a laŋɔmmɛw a kɛmɛ leŋɔmpum (157 600). Nda co kunda mɛɛlaa kpɔ́ŋ le kɔlan a lɛfɛ landaa ndaa ni.»

³²Mí Israɛlaa piaandua nda sɛva a yungulan lapilɛn-pilɛnndan, má kɛsi nda mɛɛ kundala ndala cɔwlan la co yɛ kpow-va bɛnda vaalan kɛmɔɔ leŋɔmpum a layàá a kɛmɛ leŋuɛɛnu a beleŋuɛɛnu (603 550).

³³Maa mɛɛ Mɛlɛka pila sila Moise yɛ, a sɛva polale Levii len a Israɛlaa tɔ̀a latulu le.

³⁴Mí Israɛlla tosa ɲɛ-ɲɛ Mɛlɛka dimul Moise mó tɛɛngul nda ndu. Má kila fondala ndalan o lɛfɛla landaala ndalan bɛngu, má va kɔlan a yungulan, a kundala n'vanayalan.