Read Kissi Kundalan 20 Bible Online

Kundalan 20 - Kissi bible

Kundalan 20

¹O paangii tasei o vɔsi kon nin, mí Israɛlla kpow a tiiya o lɛŋnde veselɛilen Sin nin, má kila dɔ́ɔ́ngɔ́ ndaa Kadɛs. Lon Miriam vi ni, lon koni nda kumbu ndu ni.

²Mɛmma kolaama ve lon te, mí Israɛlla cuungian, má simul Moise nda Aarɔn.

³Má ciŋilan Moise, má dimul ndu aa: «O co fisa mí náà n vinnun telen puapilɛa naa va vuo Mɛlɛka o hɔl-lo.

⁴Le kɔlɔ yɛɛ niaa hin yɛ a kunda Mɛlɛka-o o lɛŋnde veselɛilen nden nin? Vɛ̀ɛ̀ le naa diwvo a cɔlua naa niaa hin a naa ni?

⁵Le yɛɛ niaa faŋa yɛ naa Esipte mí la hun a naa o mɔnɛi he nin? Vana nɔla ɲɛ-ɲɛ vàà nanu le. Voosu tum co nanu le, rɛsɛn tum co le, krenadiee co le. Hali mɛmma kolan ma co nanu le.»

⁶Mí Moise nda Aarɔn a faŋan sɛ́lɔ́ɔ́ ikɛi, má kɔa o cɛi-kola-toandaa-labɔɔŋianndo sondoo, má deli lɛŋ ndon a kuumbuannda o kɔl coo. O kon, mí biilu Mɛlɛka-o cɔmnun nda.

⁷Mí Mɛlɛka soaa o Moise lo, mó dimul ndu aa:

⁸«Cua tinda nɔmndo mì la cuungiaa sɛ́lɔ́ɔ́ nɛɛ pilɛ niaa Aarɔn bɛ nɔm. A cuungian pɛ, la dimul pow kpovaa ho nda o hɔl le mɛmma ndɔan yɔngoo. O kon, a solul sɛ́lɔ́ɔ́ mɛnndan o pow kpovaa ho, a koesi nda a cɔlua ndaa.»

⁹Mí Moise cua tinda va kon o kɛsiaa Mɛlɛka o hɔl-lo mɛɛ mɛlɛka pila dimul ndu yɛ.

¹⁰Mí Moise nda Aarɔn a veelu sɛ́lɔ́ɔ́ kpow o pow kpova Mɛlɛka cɔm kon-ndo hɔl-ndɔ, mí Moise dimul nda aa: «La yaŋ-ndɔ nilan, niaa vanaa nila kalua ha. Vɛ̀ɛ̀ n tiwba mì n solul niaa mɛnndan o pow kpovaa ho?»

¹¹O kon, mí Moise heelu ba ndɔɔ coo, mó lɔaa pow kpovaa lediin a tinda ndɔɔ. Mí mɛnndan ma fula taw-taw. Mí vanndacieea a cɔlua kol, má pum ca.

¹²Kɛ mí Mɛlɛka dimul Moise nda Aarɔn aa: «La lo o diomnde nilen coo le, la cɔm diondɔɔ nuu Israɛlla o hɔl te. Lelan, o co lɛ niaa le tiiyanin a sɛ́lɔ́ɔ́ ho o lɛŋnde ya yɔngu nda len nin te.»

¹³Lelan mɛmma man má sɔla diolan ni aa mɛnndan Meriba (kon co dimio ni aa «Mɛmma lasɛɛngianndan»), kani lon Israɛlla nuwviaa sɛɛngianndo Mɛlɛka o n'dial ni. Lon o cɔm diondɔɔ ndɔɔ nda o hɔl ni.

¹⁴A lo Kadɛs, mí Moise viam kiilaa o masa va Edɔm-ndo lo le ndu dimullo aa: «Cuavaa puapilɛ nɔmndo Israɛl a soaa nuaa ni: Nɔm pila sina sangala kei naa coo lan kpow.

¹⁵Fuɲaa naa mamaa kɔɛ sindɛ o lɛŋnde Esipte len nin ni, mí naa cuavaa ndaa n cii vɔsila bɔɔ-bɔɔ lon. Kɛ mɛɛ Esiptea luei nda mɔnɛi tei, má mulin vɛlɛ má tuisi naa pila sangaa coo taw.

¹⁶O kon mí n koŋul Mɛlɛka o lani, mó tuɛi somisomin naa. Mó viam mɛlɛkanɔɔ, mo kɔ faŋa naa Esipte lon. Sunsun, n tiiya Kadɛs, kobi co o lɛŋnde nɔmnden mɛɛlulan-ndo.

¹⁷Lelan, cɛl yandi mì n kei o lɛŋnde nɔmnden nin. N keinin o ciɛɔn niaan nin te, n keinin o nakɔla niaala n'rɛsɛnndan nin te. Hali mɛmma co o soonnda kólaala niaalan nin-ndan, n kolnin man te. O nɛi bɛndoo coo sanaa naa n co lakɔ ni, háá mì n cii lɛŋnde nɔmnden taŋɔɔ, n seinin o ba kɛndɛ coo le, n seinin o ba mɛl coo le.»

¹⁸Mí masa va kon Edɔm-ndo mulul nda aa: «La kei o lɛŋnde nilen nin te. Te la pila pɛ pelei lenin, i del niaa coo a cɔwvo.»

¹⁹Mí vanaa Israɛlla vem nda dimul ndu aa: «Nɛi bɛndoo sanaa naa n co lakɔ kɔɔli ni, te naa pila a cɔlua naa n kol pɛ mɛmma nɔmndan, n dɔw man vɔngu. N ɲuna nɔm ɲɛ-ɲɛ celen te, fɔ le naa cɛlɔɔ mì n kei o lɛŋnde nɔmnden nin a n'pelu.»

²⁰Kɛ mí masaa Edɔm dimul nda aa: «La kei nanu le.» O kon, mí Edɔmnda can kundala bɛndulan, má kɔa Israɛlla diomɔɔ a vanaa cɔwva taw-taw.

²¹Mɛɛ masaa Edɔm kuuna Israɛlla le keiyo o lɛŋnde ndɔlen nin, má bii kɔlan a nɛi celen.

²²Mí Israɛlla faŋan Kadɛs kpow, má tiiya o pembei Hɔr,

²³o lɛŋnde Edɔm-nden mɛɛlulan. Mí Mɛlɛka dimul Moise nda Aarɔn aa:

²⁴«O lo ɲɛ-pɔmbɔ mì Aarɔn dem vanaa ndɔa ciee-piɔ́m. O lueinin o lɛŋnde ya yɔngu Israɛlla len nin te, kani la sɛɛngiaa ya a dɛnɛ mɛnndan Meriba o kɔɔ.

²⁵Lelan, cua Aarɔn nda Eleasar po ndɔ, ma hel a nda o pembei Hɔr coo.

²⁶La tiiya pɛ, a soli Aarɔn volɔɔla ndɔla solia lasálàlan lekɔɔ, a vow Eleasar po ndɔ lan. Lon Aarɔn co vanaa ndɔa diomɔɔ ciee-piɔ́m ni, lon o co vu ni.»

²⁷Mí Moise tosa ɲɛ-ɲɛ Mɛlɛka dimul ndu, má hel o pembei Hɔr coo nda yáá Israɛlla kpow o hɔl.

²⁸Mí Moise soli Aarɔn volɔɔlan lekɔɔ, mó vow Eleasar po ndɔ lan. Mí Aarɔn vu o pembei tullo lon. Mí Moise nda Eleasar a toal pembei.

²⁹Mí sɛ́lɔ́ɔ́ kpow ca maa Aarɔn vi. O kon, mí Israɛlla kpow a tosa biisi ndɔɔ o palɛi beleyaa bɛngu.