Read Kissi Kundalan 22 Bible Online

Kundalan 22 - Kissi bible

Kundalan 22

¹Mí Israɛlla muungu, má kɔ kila dɔ́ɔ́ngɔ́ɔ̀ o dɛɛlalan Moab nin, o peo Yurdɛn leeloo, Yeriko o hɔl-ndɔ.

²Balak, po Sipɔr-o ndóò tuei nin mɛɛ Israɛlla tosa a Amoriia yɛ kpow.

³O kon, mí siòòŋii Israɛlla bii vanaa va icali Moab-a taw, kani a va sɛ́lɛ́, mí siòònde bii nda, má yɔŋnun yoloma-yoloma.

⁴Mí Moabua dimul kaasoŋaa kɔlkalua Madian aa: «Vannda ha co hunɔ̀ɔ̀ lɛŋnde naalen tɛɛmbuu mɛ̀ɛ́-mɛ̀ɛ́ nawvo dia bil puiyaa yondoo nin nuaa yɛ.» Tuma kon, Balak, po Sipɔr-o va masalen tosaa Moab ni.

⁵Mó viam kiilaa o Balaam po Beɔr-o lo, Balaam kon va icali Petɔr o pee bɛndoo Efrate ikɛi, lɛŋnde ndɔlen le va len ni. Mó congun nda aa mà kɔ veelul ndu ndu mà dimul ndu aa: «Vannda pum fula Esipte, má hun tiw o tàndà naa nin sɔ́, a kila calta ndalan ya macɛlu.

⁶Lelan, a yandi, hun cɔ́-cɔ́ má hun dow ya vanaa kan danga. Kani a hiow ya kpaayaa. Bɔɔle mì nɔla nda, mì tow nda mà faŋan o lɛŋnde nilen nin, kani i sina maa vana-vana n dɔw pɛ duaa, ndu dɔwnun duaa, vana-vana n dɔw pɛ danga, ndu dɔwnun danga.»

⁷Mí kaasoŋaa kɔlkalua Moab a kaasoŋaa kɔlkalua Madian a cua ɲɛm kɛndɛ-kɛndɔn le Balaam vana vianaa yavaa yoo, má kɔa a mun. Mɛɛ nda tiiya o Balaam ndo, ma tuisi sumialle, má downun ndu kona mɛɛ Balak congun nda yɛ.

⁸Mí Balaam mulul nda aa: «La lɔl hau nanu, siɔdii i mulul niaa mɛɛ Mɛlɛka dimulnin ya le tosaa yɛ.» Mí simlacia fula kan Moab-a lɔl ɲinkon o Balaam ndo.

⁹Mí Hala hun o Balaam ndo, mó ɲuna ndu aa: «Nɛ̀ɛ̀aa co yɛ haa o nɔm ndo cɛinin?»

¹⁰Mí Balaam muli aa: «Kiilaa Balak, po Sipɔr-o, o co masalen tosaa Moab-o vim ya-a ni. O vem nda le ya dimullo aa

¹¹vanaa-mangalaa-isɔaa fula Esipte-a hun tiw o lɛŋnde ndɔlen nin sɔ́, aa ya i kɔ mì kɔ dow ndu nda danga, aa bɔɔle mo tiw nda ba mo tow nda mà faŋan o lɛŋnde ndɔlen nin.»

¹²Kɛ mí Hala dimul Balaam aa: «Kɔa niaa ndaa le! Dɔaw vanaa kan danga le! Kani a cùù duaa dɔwnɔn.»

¹³Diimandɔɔ idiiyo púŋ, mí Balaam can, mó dimul simlacia Balak vem-nda aa: «La muungu o lɛŋnde niaalen nin, kani Mɛlɛka cɛl mì n kɔɛnnùn naa niaa le.»

¹⁴Mí simlacia Moab a can, má muungu Balak o ibuŋ, má kɔ dimul ndu aa: «Balaam kɛɛ le hunɔɔ naa ndaa.»

¹⁵Mí Balak viam vɛlɛ simlacia celen sɛ́lɛ́ bɛndoo hiovɔɔ a tasea coo.

¹⁶Mɛɛ kan tiiyaa o Balaam ndo, má dimul ndu aa: «Balak, po Sipɔr-o dimi aa nɔm ce ndu lɛŋ sakpo, aa nɔm kɛ̀ɛ̀ le ndu sɔɔnguuo mayoomu le yandi,

¹⁷aa o yɔngunin nɔm bɛɛlen mò tosa ɲɛ-ɲɛ n ɲunanin ndu. Kɛ aa, yandi, nɔm kɔ ma kɔ dow ndu vannda ha danga.»

¹⁸Mí Balaam mulul buɛyaa Balak-a kan aa: «Hali Balak pei bɛɛ volion a sianion o cɛi ndɔ lemasaa nin ca mò ke ya cɛi kon, i nɔla mì huuluu diomnde Mɛlɛka, o co Hala nuu-o dimul-la len coo le.

¹⁹Kɛ o va bɛɛ lende, niaa bɛɛ la lɔl hau nanu, haliko mi sina ɲɛ Mɛlɛka nɔ vɛlɛ le ya dimullo-o.»

²⁰Icɔllo, mí Hala hun o Balaam ndo, mó dimul ndu aa: «Te le kɔlan niaa ndaa latulu vannda ha hin nɔm kɔɔli ni, mɛɛ cɔn mì la kɔɛ niaa ndaa. Kɛ nduyɛ, ɲɛ ya dimulnin nɔm-ndo daama n bɛnda ma tosa ni.»

²¹Diimandɔɔ idiiyo, mí Balaam handu ɲɛ-calaa o sofɛlɛ ndɔ laandoo coo, má bii kɔlan nda simlacia fula kan Moab-a latulu.

²²Mí Hala tuulu kɔl le kɔla Balaam cɛn-ndan. Mí mɛlɛkanɔ Hala-o sim Balaam laci o nɛi, le ndu kuunaa hiovɔɔ. Nduyɛ, Balaam va icali o sofɛlɛ ndɔɔ coo, buɛyaa ndɔa va ndu liilaa nda ŋiɔn.

²³O kon, mí sofɛlɔɔ ca mɛlɛkanɔ Hala-o isisi o nɛi a mɔɛi ndɔɛi cɔwve o ba. Mɛɛ o ce ndu, mó mal nɛiyo, mó sɔndan yondoo nin. Mí Balaam soaŋ sofɛlɔɔ le ndu mingio o nɛi.

²⁴O kon, mí mɛlɛkanɔ Hala-o kɔ sim o pemale va o nakɔ n'rɛsɛnndo nin o kungalan tan tiɔn tɛɛn-nden.

²⁵Mí sofɛlɔɔ ca vɛlɛ mɛlɛkanɔ Mɛlɛka-o, mó holnun o kungaa, mó ŋɔaw Balaam pelei o kungaa. Mí Balaam lɔaa ndu vɛlɛ.

²⁶Mí mɛlɛkanɔ Hala-o hiaw vɛlɛ nda laci, mó kɔ sim o fonda sɔɔkɛɲɛɛo pum, nɛɛ ndáà nɔla lɛ ndu kpakpala le-a, o va o ba kɛndɛ coo o va o ba mɛl coo.

²⁷Mɛɛ sofɛlɔɔ ce vɛlɛ mɛlɛkanɔ Mɛlɛka-o, mó hinin lɛŋ, Balaam va lecoo. Mí Balaam tuulu kɔl taw-taw, mó va ndu lɔɔ taw a tindaa.

²⁸Mí Mɛlɛka kumbi dɔ́ɔ́ sofelɔɔ sondoo, mó soaa, mó ɲuna Balaam aa: «Yɛɛ nɛ ya tosal-lɛ nɔm má lɔaa ya háá bɛmbɔɔ le yaa?»

²⁹Mí Balaam mulul ndu aa: «Kani tɛɛndanndo n tɛɛndan ya ni. Te yáà nɔ pɛ mɔɛi cɔwve o ba, o foofo nanu ya va nɔm diyɔɔ ni.»

³⁰Mí sofɛlɔɔ mingi sondo aa: «O co sofɛlɛ nɔm n kela coo lɔ́ɔ́-lɔ́ɔ̀-o le ya co le? Vɛ̀ɛ̀ nuaa ya dema nɔm paandu tosal ni?» Mí Balaam muli aa: «Ɛ-ɛ.»

³¹O kon, mí Mɛlɛka kumbi Balaam hɔltan, mó ca mɛlɛkanɔ Hala-o isisi o nɛi a mɔɛi cɔwve o ba. Mí Balaam toal, mó baŋ vulan, mó del o kuumbuan o kɔl coo.

³²Mí mɛlɛkanɔ Hala-o dimul ndu aa: «Le yɛɛ n lɔɔ yɛ sofɛlɛ nɔmndo háá bɛmbɛ leyáá? Ya hin le nɔm kuunaa hiovɔɔ ni, kani i ce maa nɛiyo yelelalnin nɔm te[16].

³³Sofɛlɔɔ va ya cɔu, lelan o kpakpala ya bɛmbɛ leyáá ni. Te ndóò kpakpala ya le, maa yáà dii nihau nɔm, mì yáà mɛi ndu yoomu.»

³⁴Mí Balaam dimul mɛlɛkanɔ Hala-o aa: «I tosa dɛnɛ vɔɔndo, kani i ve sina maa nɔm te kelu nɛiyo ya laci le. Lelan sisa, te kɔla ya co lan-ndan la hɛnan nɔm te, i muungun o ya lo.»

³⁵Mí mɛlɛkanɔ Hala-o dimul ndu aa: «Kɔ niaa vannda ha, kɛ sɔɔn ya dimulnin nɔm-ndon kínɛí n bɛnda ma dimi ni.» Mí Balaam kɔa nda simlacia Balak vem kan-nda.

³⁶Mɛɛ Balak tuei maa Balaam co hunɔɔ, mó kɔa ndu kpɛngbɛlaa o kobi Moab-o pum nin, kobi va o pɛɛngulan a lɛŋnde ndɔlen o peo Arnɔn ikɛi-yo.

³⁷Mó ɲuna Balaam aa: «I vem kiilaa tasea o nɔm ndo le kɔlan nɔm veeloo, le yɛɛ a cɛl le hunɔɔ le? Bàà nuaa nɔm óò yiyan ni maa yáà nɔlanin nɔm biiloo ɲɛkɛndɛi le?»

³⁸Mí Balaam mulul ndu aa: «Mɛɛ i hin niko. A ce ya. Kɛ sina maa i diminin ɲɛ-ɲɛ ó ya pila nin te, sɔɔn Hala pila vownin ya o sondo-on kínɛí ya diminin ni.»

³⁹Mí Balaam del Balak kɔɔli, má kɔa Kiriat-Husɔt.

⁴⁰Mí Balak soli sálàá a nawva a á saa, mó cua kundalan lapum o sálà kon nin, mó yoo Balaam a simlacia o hin-nda.

⁴¹Diimandɔɔ idiiyo, mí Balak hun Balaam kɔɔli, mó heelu ndu Bamɔt-Baal. A lo lon, má ca Israɛlla kundaa pilɛ.