Read Kissi Kundalan 23 Bible Online

Kundalan 23 - Kissi bible

Kundalan 23

¹Mí Balaam dimul Balak aa: «Cow ya fondala-loamaa-lasálàlan tan ŋɔmmɛw, ma bɛɛndial-la navaa tovaa nda ŋɔmmɛw a saa kóndóa nda ŋɔmmɛw.»

²Mí Balak tosa ɲɛ Balaam dimul ndu-o. Nda ŋiɔn kpow, má soli cɔlua kan sálà: o fonda-loamaa-lasálà oo fonda-loamaa-lasálà coo, nawvo o pilɛ a saa kóndóó o pilɛ.

³Mí Balaam dimul Balak aa: «Lo o sálà loamaa nɔmndo ikɛi nanu mì yifan-ndɔ tiŋ. Bɔɔle mì Mɛlɛka cɔmnun ya. O soo pɛ o ya lo, i hun cɔm nɔm ɲɛ o dimulnin ya le tosaa-o.» Mó kɔa o pembei bollen.

⁴Mí Hala cɔmnun ndu lon. Mí Balaam dimul ndu aa: «I toosiaa fondala-loamaa-lasálàlan tan ŋɔmmɛw, mí loam naw tovaa o pilɛ a saa kóndóó o pilɛ o ò kɛ́-kɛ̀ coo.»

⁵O kon mí Mɛlɛka cɔm Balaam mɛɛ o bɛnda le sɔɛi yɛ, mó dimul ndu aa: «Muungu Balak o ibuŋ ma kɔ tɛɛngul ndu sɔɛi he.»

⁶Mí Balaam muungu nɛɛ Balak va-a, mó komal ndu isisi o sálà loamaa ndɔɔ ikɛi nda simlacia Moab kpow.

⁷O kon, mí ndu Balaam soaa o ɲamakalalen nin aa: «I va Aram mí Balak veelu ya nanu. I va o tàndá n'pemboo nin nɛɛ paalen le can-nda, mí masaa Moab cuu ya nanu. Mó dimul-la aa: ‹Hun dow ya polale Yakɔb len danga, hun ma hun vueinun Israɛlla le ya.›

⁸Kɛ vɛ̀ɛ̀ ya dɔaw yɛnin vanaa Hala dow danga le-a danga? Vɛ̀ɛ̀ ya nɔla yɛnin vanaa Mɛlɛka pila vueinún te-a vueinɔn?

⁹I sim o powta kpovalan bollen, mí ca nda. I sim o pembon coo, mí mɛɛndan nda. A toɲa, vanaa calta ndalan la connun teengen-nda nda co ni. Nda co ɲɛ pilɛ a vanaa-mangalaa-isɔɔa tɔ̀a le.

¹⁰Nɛ̀ɛ́ nɔla yɛ polale Yakɔb len cɔmndo tɛ́kpɛ́-tɛ́kpɛ́? Nɛ̀ɛ́ nɔla yɛ mò cɔm cundu co lɛŋ-ndo o pilɛn-pilɛnndo? Nɛ̀ɛ́ nɔla yɛ mò cɔm cuavaa-imamaa Yakɔb-a?[17] Màá piɔ́m nuu yɔŋnun maa piɔ́m vanaa sandaa! Màá mɛɛlula nilan la yɔŋnun maa mɛɛlula ndalan!»

¹¹Mí Balak ɲuna Balaam aa: «Yɛɛ n tosal-lɛ ya hoo? I veelu nɔm le yaamɔaa nia dangaa dɔvɔɔ, mí nɔm hun dɔw nda duaa taw-taw.»

¹²Mí Balaam mulul ndu aa: «Bàà mi dimi sɔɛi celen o sɔɔn Mɛlɛka sɔɔ ya o sondo-on kɔɔli?»

¹³Mí Balak dimul Balaam aa: «N kɔ vɔ o fonda celen ma kɔ cɔ vɛlɛ vannda ha lon. A nɔlanin nda cɔu faw le, kunda pɔmbɔɔ daama n canin ni. Ma dow ya nda danga o fonda kon.»

¹⁴Mí Balak kɔa a ndu o Yondo Mɛngɛlaa[18], o pembei Piska bollen. Lon bɛɛ, mó cɔaw fondala-loamaa-lasálàlan tan ŋɔmmɛw, mó soli naw tovaa o pilɛ a saa kóndóó o pilɛ sálà o fonda-loamaa-lasálà oo fonda-loamaa-lasálà coo.

¹⁵Mí Balaam dimul Balak aa: «Lo isisi o sálà loamaa nɔmndo ikɛi nanu mì kɔ cum yoongoo pum o nda.»

¹⁶Mí Mɛlɛka cɔmnun Balaam, mó vow ndu sɔɔn o bɛnda le dimio-on o sondo, mó handu lecoo aa: «Muungu Balak o ibuŋ ma kɔ soo o ndu lo mɛɛ ya dimul nɔm yɛ.»

¹⁷Mí Balaam muungu nɛɛ Balak va-a, mó komal ndu isisi o sálà loamaa ndɔɔ ikɛi nda simlacia Moab. Mí Balak ɲuna ndu aa: «Vɛ̀ɛ̀ Mɛlɛka soo yɛ?»

¹⁸Mí Balaam soaa vɛlɛ o ɲamakalalen nin aa:: «Cɔn ma yaŋ nilan, Balak! Po Sipɔr-o, mei-yɔ kpili ma tuei!

¹⁹Hala co vanaciee le lacòò dimi le. O co vɛlɛ po vanaciee le diom ndɔɔ mangalaa le. O dímì isɔɔ mò kɛɛ ndi tosa le, O sólìn lediom o sondo mò kɛɛ len peelu le.

²⁰Ɲɛ o dimul-la-o co le duaa dɔvɔɔ ni. Ndu cii nda duaa dɔvɔɔ, ya i mangalanin ɲɛ-ɲɛ le.

²¹O ci dɛnɛ vɔɔn o Yakɔb nin te. O ci dɛnɛ sandaa lepɛŋ o Israɛl nin te. Mɛlɛka Hala ndaa co nda ikɛi. A co ndu lisaa kpeekpei le masale ndɔlen.

²²Mɛlɛka soli nda Esipte ni, mɛɛ cìíyo nɔ yoomuan nuaa yɛ nda nɔ kpaayaa ni.

²³Dɛnɛ viamaa yava co o polale Yakɔb len coo le. Dɛnɛ lemande co Israɛlla tɛɛn te. O telen kelun-ndo nda dimulnin pulun Yakɔb-on ɲɛ Hala co tosa-o ni, Israɛlla-la pɛɛn.

²⁴Vannda ha, vana ce nda pɛ cɔnɔnndo aa yàlàá ni, vana ce nda pɛ huuloo aa yàlà co ɲɛdiaa nuwviaa-o ni. O hínì le fɔ mò de ɲɛ o co mɛngɛlaa-o, mò kol kooma visia o bii-a.»

²⁵Mí Balak dimul Balaam aa: «Taa nɔla le nda danga dɔvɔɔ le, mɛɛ dɔaw lɛ nda duaa le.»

²⁶Mí Balaam mulul ndu aa: «Kɛ i dimul nɔm maa ɲɛ Mɛlɛka dimulnin ya le tosaa-o ya tosanin ni.»

²⁷Mí Balak dimul Balaam aa: «Hun mi kɔɛ a nɔm o fonda celen. Bɔɔle lon ndu, Mɛlɛka cɛlnin ma dow ya nda danga.»

²⁸Mó yaa ndu o pembei Peɔr bollen dí, vanáà lo lon mì vanáà ce lɛŋnde veselɛile Israɛlla va nin-nden kpede.

²⁹Mí Balaam dimul vɛlɛ Balak le ndu fondala-loamaa-lasálàlan cowvo tan ŋɔmmɛw a le ndu navaa tovaa nda ŋɔmmɛw a saa kóndóa nda ŋɔmmɛw bɛɛndiallo.

³⁰Mí Balak tosa mɛɛ Balaam dimul ndu yɛ, mó soli naw tovaa o pilɛ a saa kóndóó o pilɛ sálà o fonda-loamaa-lasálà oo fonda-loamaa-lasálà coo.