Read Kissi Kundalan 24 Bible Online

Kundalan 24 - Kissi bible

Kundalan 24

¹Mɛɛ Balaam sina maa o naŋ Mɛlɛka o hɔl le Israɛlla duaa dɔvɔɔ, o kue lɛ Hala ɲuna celen maa o tasendɔ le. Kɛ mó mulin a ba lɛŋnde veselɛilen.

²Mɛɛ o tofa, mó ca Israɛlla icali a kundalan o dɔ́ɔ́ngɔ́ɔ̀ nin. O kon, mí Kɔl Hala-o toal ndu coo.

³Mó soaa vɛlɛ o ɲamakalalen nin aa: «Sɔɛi fula ya Balaam, po Beɔr-o o sondo-e co hee ni: Ya vana dɔaw sɔɔn taasi-o co sɔɛi ni.

⁴Ya ni, ya tuɛi sɔɔn Hala-on-ndo sɔɛi he co fulaa o sondo nuaa ni. Ya ca vundule Vana-Kpaayaa-Kpow len-ndo co sɔɛi nuaa ni. Ya dèl lɛŋ mì ca sɔɔn viannanndon ni, kani i va ndu pɛ biiloo, o cɔmnun ya.

⁵Cɛila-kolala-toandaala niaalan la naŋ bɔɔ, niaa fula haa Yakɔb o ipulu-a. Calta niaalan la naŋ bɔɔ, niaa polale Israɛl-ten.

⁶Calta niaalan la kɔɛnnun kɛ́-kɛ̀ maa ladɛɛla. Vana ca lan ko aa nakɔla tɔlnun o peo kɔngɔ lan ni. Vana ce pɛ aa yɔmii aloɛs Mɛlɛka tɔl-le ni. Vana ca ko aa yɔmii sɛɛdrei co hindɔɔ o mɛnndan kɔngɔ-e ni.

⁷Ì mɛnndan ma co piɔu o fɛngɛla ndɔlan nin mì ma coŋ-nde, i kulun ndɔn tɔlnun o ciɛi co pɔɔlianndo-e nin-nde. Masa ndaa hiow masaa Akak yoomuan, masale ndalen le sɔlanin kpaayaa taw.

⁸Mɛɛ Hala soli nda Esipte a kpaayaa maa kpaaya cìí, má kei vanaa simul nda-a diw, má yimi nda paalan, má cɛɛluu nda a kɔɔn.

⁹Má ce nda ihini pɛngio maa n'yàlà. Nɛ̀ɛ́ cua yɛnin nda? Vana dɔw pɛ niaa duaa, duaa co le ndu. Vana dɔw pɛ niaa danga, dangaa co le ndu.»

¹⁰O kon, mí Balak tuulu kɔl a Balaam, mó koaŋ bala ndɔlan, mó dimul ndu aa: «Le yaamɔaa nia dangaa dɔvɔɔ ya yoongu nɔm ni. Kɛ mí nɔm dɔaw nda duaa háá bɛmbɛ leyáá.

¹¹Lelan sisa, kɔnnun, muungun o nɔm ndo. Yáà yeema mì yáà biilu nɔm taw, kɛ Mɛlɛka tuŋ nɔm bɛɛle len.»

¹²Mí Balaam mulul ndu aa: «I dimul vanaa n vim ya-a ndi vakpa aa:

¹³‹Hali Balak yɔngu ya bɛɛ volion a sianion n'piaa cɛi ndɔ lemasaa ca, i tɛɛmbuunin ɲɛ Mɛlɛka dimulnin ya le tosaa-o le dɛnɛ kɛndɛ celen, te kon te le dɛnɛ vɔɔn celen tosaa le. Ɲɛ Mɛlɛka dimulnin ya-o kpafii ya tɛɛnguunin ni.›

¹⁴Lelan sisa, i co hunɔɔ muungu yungu nuu o ibuŋ. Kɛ telen pá ya kɔa, hun mì dimul nɔm ɲɛ vannda ha tosalnin vanaa nɔmnda siɔdii laci-o.»

¹⁵Mó soaa vɛlɛ o ɲamakalalen nin a: «Sɔɛi fula ya Balaam po Beɔr-o o sondo-e co hee ni: Ya vana dɔaw sɔɔn taasi-o co sɔɛi ni.

¹⁶Ya ni, ya tuɛi sɔɔn Hala-on-ndo sɔɛi he co fulaa o sondo nuaa ni. Ya sina dɛnɛ sinaa Ó-Hiow-Ɲɔɔn-Kpow-vo ni! Ya ca vundule Vana-Kpaayaa-Kpow len-ndo co sɔɛi nuaa ni. Ya del lɛŋ mì ca sɔɔn viannanndon ni.

¹⁷I ce ɲɛ co hunɔɔ yɔŋnɔn-ndo, kɛ o co vɔ́ le hau le. I co ndu mɛɛndanndo, kɛ o co vɔ kpɛɛlun te. Loei tengɛi fula o cuavaa Yakɔb-a nin, Tinda lemasaa fula o cuavaa Israɛl-la tɛɛn. Tinda kon soŋ yungoo Moab kpaŋun miunndon. O lɔɔ cuavaa-imamaa Sɛt-a[19] kpow kpokpolan.

¹⁸O co lɛŋnde Edɔm-nden biyɔ̀ɔ̀. O co yaamɔaa ndɔa Seir biyɔ̀ɔ̀ ma va ndu o ba bɛngu. Israɛlla co bɔɔ bɛmɛi cɔmndo.

¹⁹Vana fulanin o pulun Yakɔb-on nin-ndo siŋnunnin masa tɔ́ɔ́ bɛndoo. Ndu diwnin vanaa lonin yoomu o kobilan nin-nda ni.»

²⁰Mɛɛ Balaam ce Amalɛkea, mó dimi aa: «Amalɛkea va vanaa-mangalaa-isɔɔa tɔ̀a kpow bollen ni, kɛ yɛyii ndɛi cuu itambu mí i ɲum.»

²¹Mɛɛ o ce Keniia, mó dimi aa: «Niaa Keniia, calta niaalan la co lakala poŋ, vɛɛŋii niɛi co itangulɛi o pow kpovaa coo.

²²Kɛ vɛɛŋii niɛi co cuvɔɔ ŋɔ kpow lɔ́ɔ́ Asur kɔanin a cuavaa niaa imamaa o biyɔɔ nin-ndo.

²³Mó dimi niko sɔɔn mɛɛlan aa: Kpòkóó! Te Hala tosa pɛ isɔɔ, nɛ̀ɛ́ lo yɛnin yoomu kpeekpei?[20].

²⁴Dɛ̀ndɛ̀la bɛndula mamɛnndan la cɛn Kitim mí la hun. Vanaa hin a lan-nda delnin yungu Asur-o coo, a biinin cuavaa-imamaa Hebɛr-a, kani cuavaa-imamaa Hebɛr-a kan bɛɛ, tambei co nda laci.»

²⁵O kon kɔɔli, mí Balaam bii nɛiyo, mó muungu o ndu lo. Mí Balak bɛɛ kɔannun kpengii ndɔɛi.