Read Kissi Kundalan 28 Bible Online

Kundalan 28 - Kissi bible

Kundalan 28

¹Mí Mɛlɛka soaa o Moise lo, mó dimul ndu aa:

²«Soo o Israɛlla lo ma dimul nda aa: ‹A cuu ya sálà co le ya-o o telen kelun-ndo, ɲɛm dian ŋɔa mun o yin le ya Mɛlɛka-on, n ya tuɛi cun kɛndɔɔ mì ɲɔɔ hɛnan ya-on pɛɛn.

³Ma dimul nda aa sálàla niaa bɛnda le solio mì la lom ndan o yinnden nin le ya Mɛlɛka lan la co lan ni: lepalaa-lepala saa téndéa nɔ vɔsio pilɛ-a, a nɔ lenamta le-a a ŋiɔn. Le fɛɛn a fɛɛn, la bɛnda mì la va ya sálà kon solullo.

⁴Ma soli sálà idiiyo a ò pilɛ, ma soli sálà paale delaa a o pilɔɔ.

⁵Mì la handu dɛɔ kiloo leyàá le saa téndé oo saa téndé, dɛɛ nda vɔɔca o cuɛima olivema sɛnɛiyan litilio o pilɛ a tálá-an nin-ndo.

⁶Sálà loamaa vanin kon solinndo lepalaa-lepala-o bɛnda mò solin mɛɛ ndóò solin o pembei Sinai yɛ. Sálà ŋɔa o yin le ya Mɛlɛka-o co kon ni, o ya tuɛi cun mì ɲɔɔ hɛnan ya-o.

⁷Mì la handu vɛlɛ sálà mamɔiyo lecoo, mɔima kɛndɛ-kɛndɛan litilio o pilɛ a tálá le saa téndé tasoo, o Fonda-Diandaa nin mɔima man ma bɛnda ni mi ma yɔngun Mɛlɛka.

⁸Saa téndé diinndɔɔ bɛnda mò solin sálà a dɛɔ a paale delaalen, a sálà mamɔiyo lecoo maa o tasoo. Sálà ŋɔa o yin le ya Mɛlɛka-o co kon ni, o ya tuɛi cun mì ɲɔɔ hɛnan ya-o.›»

⁹«O paale pɛngiaalen coo, a bɛnda ma soli sálàá a saa téndéa nɔ lenamta le-a nda ŋiɔn, a nɔ vɔsio pilɛ-a, ma handu dɛɛ vɔɔcan a cuɛiyan-ndo kiloo leŋɔmpum a sálà mamɔiyo lende kpafii.

¹⁰Sálà loamaa paale pɛngiaa kon bɛnda mò cɔɔlu solin o sálà solin lepalaa-lepala-o coo a o sálà ndɔ mamɔiyo coo.»

¹¹«O ipaangu oo ipaangu kandɔɔ, la bɛnda mì la solul-la sálà loamaa a navaa tovaa téndéa nda ŋiɔn, saa kóndóó o pilɛ a saa téndéa nɔ vɔsio pilɛ-a nda ŋɔmmɛw, cɔlua kan kpow a bɛnda mà nɔ lenamta le.

¹²Naw tova oo naw tova bɛnda mò solin sálà a dɛɛ vɔɔcan a cuɛiyan-ndo kiloo leŋɔmpum, saa kóndóó bɛnda mò solin sálà a dɛɛ vɔɔcan a cuɛiyan-ndo kiloo leŋɔmpum,

¹³saa téndé oo saa téndé bɛnda mò solin sálà a dɛɛ vɔɔcan a cuɛiyan-ndo kiloo leyàá. Sálà loamaa cun kɛndɔɔ co kon le ya Mɛlɛka ni, o ya tuɛi cun mì ɲɔɔ hɛnan ya-o, sálà ŋɔa o yin le ya-o co kon ni.

¹⁴Sálàla mamɔila bɛnda mì la fula a cɔlua kan latulu lan la co lan ni: mɔiyan litililan layàá le naw tovaa o pilɛ, latiɔn le saa kóndóó o pilɛ, o pilɛ a tálá le saa téndé nɔ vɔsio pilɛ-o. Sálà kandaa ipaangoo co kon ni. O vɔsio kpow nin, sálà kon niaa bɛnda ni mi la va solio o ipaangu oo ipaangu kandɔɔ.

¹⁵Mì la solul-la sálà co le hakio sɔlaa malɔɔ-o a cuin toovio pilɛ, handɔɔ o sálà loamaa solin lepalaa-lepala-o a o sálà mamɔi ndɔɔ coo.»

¹⁶«O paale tɔ́ a lehiɔɔlundɔlen coo o paangii tasei o vɔsio nin, kafo-hiavaa-coo bɛnda mò tosan le Mɛlɛka biiloo.

¹⁷O paale tɔ́ a leŋuɛɛnundɔle paangii ken coo kafoo bɛnda mò kandun kpeekpei ni. O palɛi ndii ŋɔmmɛw bɛngu, la bɛnda mì la va bulu toosian a lɛvɛn too dioo.

¹⁸O paale tasele kafo kon co kandɔn-nden coo, la bɛnda mì la cuungian le kaannden tosaa. Paale len, la bɛnda mì la tosa vali niaa tosà paandu-o le.

¹⁹Mì la solul Mɛlɛka sálà loamaa, o ŋɔa o yin-ndo a navaa tovaa nda ŋiɔn, saa kóndóó o pilɛ a saa téndéa nɔ vɔsio pilɛ-a nda ŋɔmmɛw, cɔlua kan kpow a bɛnda mà nɔ lenamta le.

²⁰La bɛnda mì la handu kpeyan vɔɔcan a cuɛiyan-ndo lecoo: kiloo leŋɔmahiɔɔlu le naw tova oo naw tova, kiloo leŋɔmpum le saa kóndó oo saa kóndóó,

²¹kiloo leyàá le saa téndé oo saa téndé.

²²Mì la soli vɛlɛ sálà co le hakio sɔlaa malɔɔ-o a cuin toovio pilɛ le faleŋii baŋannde tosaa le haki niaa.

²³Kon kpede handunnin o sálà loamaa solin idii oo idii-o coo ni.

²⁴O palɛi ŋɔmmɛvii ken bɛngu, lepalaa-lepala, la bɛnda mì la va sálàá solio a ɲɛm dian mun, mì la va mun lomɔɔ o yin, cun kon ya Mɛlɛka tuɛi ni mì ɲɔɔ hɛnan ya. Ɲɛm mun co va cɔɔloo handɔnndo o sálà loamaa solin lepalaa-lepala-o a o sálà ndɔ mamɔiyo coo ni.

²⁵O paale ŋɔmmɛwndɔlen coo, la bɛnda mì la cuungian le kaannden. Paale len, la bɛnda mì la tosa vali niaa tosà paandu-o le.»

²⁶«O paale kafo koavaalen coo, telen niaa cuunin ya Mɛlɛka kpeyan sálà niaa solinin o ɲɛm sɛnɛin niaa koawnin o ciɛɔn niaan nin-ndon nin le kafo layasaa tosaa-o, la bɛnda mì la cuungian le kaannden. La bɛnda mì la tosa ɲinkon baala niaa tosa paandu-o le.

²⁷Mì la soli sálà loamaa, o ŋɔa o yin mì tuɛi ndu cun, mì ɲɔɔ hɛnan ya-o: navaa tovaa téndéa nda ŋiɔn, saa kóndóó pilɛ a saa téndéa nɔ vɔsio pilɛ-a nda ŋɔmmɛw.

²⁸Mì la handu sálà dɛɛ vɔɔcan a cuɛiyan-ndo lecoo: kiloo leŋɔmahiɔɔlu le naw tova oo naw tova, kiloo leŋɔmpum le saa kóndóó,

²⁹kiloo leyàá le saa téndé oo saa téndé.

³⁰Mì la dii vɛlɛ cuin toovio pilɛ le faleŋii baŋannde tosaa le haki niaa.

³¹Kon kpede cɔɔlunin handɔn o sálà loamaa solìn lepalaa-lepala-o a o sálà ɲɛm vaa ndɔɔ coo ni. Cɔlua niaa hɛlinin kan-nda kpow a bɛnda mà nɔ lenamta le, la bɛnda vɛlɛ mi la handu sálàla mamɔila tiw a nda lan lecoo.»