Read Kissi Kundalan 30 Bible Online

Kundalan 30 - Kissi bible

Kundalan 30

¹Mí Moise tɛɛngul Israɛlla ɲɛ-ɲɛ Mɛlɛka dimul ndu le tosaa kpow[25].

²O kon kɔɔli, mí Moise soaa o vanaa va bolii lapangɛi o polama Israɛlla coo-a lo, mó dimul nda aa: «La tuei-yɔ ɲɛ Mɛlɛka dimul naa le tosaa-o:

³Te vanndo baa pɛ yoolen o Mɛlɛka lo, te kon te, te vanndo cua pɛ ciɛ́i a mɛnanndo, o bɛnda mò kɛɛ sɔɛi fula ndu o sondo-e peelu le. O bɛnda mò tosa mɛɛ o dimi yɛ.

⁴Te cuaambɔ laandu lemboo baa pɛ yoolen o Mɛlɛka lo, mò cua ciɛ́i telen o co vɔ fuɲa ndɔ o ba-o,

⁵te fuɲa ndɔ tuei pɛ maa cua ndɔɔ cua ciɛ́i mó baa yoolen o Mɛlɛka lo, mò dimul ndu ɲɛ-ɲɛ le, mɛɛ cuaambɔ laandu kon bɛnda mò peelu ɲɛ o dimi-o.

⁶Kɛ te fuɲa ndɔ tuei pɛ sɔɛi ken, mò kɛɛ dɛnɛ kon paale o tuei ndu len, ciɛ́i o cua-e a yoole o baa len ve lɛnin le peelu le. Mɛlɛka malnin ndu haki le sɔɛi ken, kani fuɲa ndɔ cii yoole o baa len tɛɛmbuu.

⁷Te cuaambɔ laandu lemboo baa pɛ yoolen, te kon te mò cua ciɛ́i, mò cal o nɔu,

⁸te pɔnɔ ndɔ tuei pɛ sɔɛi ken, mò tɛɛmbuu dɛnɛ kon paale o tuei ndu len te, mɛɛ o bɛnda mò timbi yoole o baa len a ciɛ́i o cua-e.

⁹Kɛ te pɔnɔ ndɔ kɛɛ pɛ sɔɛi ken paale o tuei ndi len, mò tɛɛmbuu yoole o baa len a ciɛ́i o cua-e, Mɛlɛka malnin cuaambɔ kon haki le sɔɛi ken kɛɔ peeloo.

¹⁰Kɛ te vanalanɔ pɔnɔ ndɔ vi-o, te kon te vanalanɔ kɛyan nda pɔnɔ ndɔ-o baa pɛ yoolen, te kon te mò cua ciɛ́i, o bɛnda mò peelu ɲɛ o dimi-o.

¹¹Te vanalanɔ co o nɔu-vo baa pɛ yoolen, te kon te mo cua ciɛ́i a mɛnanndo,

¹²te pɔnɔ ndɔ tuei pɛ sɔɛi ken, mò dimi ɲɛ-ɲɛ le, mɛɛ o lo o yiinanndo a yoole o baa len a á ciɛ́i o cua-e.

¹³Kɛ te pɔnɔ ndɔ tɛɛmbuu pɛ sɔɛi ken paale o tuɛinin ndi len, ɲɛ-ɲɛ fula cua kon o sondo, o va o leyoo baa nin, o va o iciɛ́ɛ́ cua nin, ndu bɛɛ tambu. Kani pɔnɔ ndɔ faŋa ndu sɔɛi ken kuee. Mɛlɛka malnin ndu cua kon haki le sɔɛi ken kɛɔ peeloo.

¹⁴Te vanalanɔɔ baa pɛ yoolen, te kon te mò cua ciɛ́i, pɔnɔ ndɔ tósà ni mì sɔɛi fula ndu o sondo-e peelun, ndu koni tósà vɛlɛ ni mì i kɛɛ peelɔn.

¹⁵Kani te o tuei ndi pɛ, mò kuuna laa ndɔ le háá diimandɔɔ, mɛɛ laa ndɔ co lo o yiinanndo a yoei o baa-e, te kon te a ciɛ́ɔn o cua-on kpow. Kani kon cɔm ni maa pɔnɔ ndɔ cɛl sɔɛi ken, bau o kuuna ndu paale o tuei ndi len te.

¹⁶Te paale o tuei ndi len le hiow pɛ, mò yeema le sɔɛi ken tɛɛmbuuo paale celen, mɛɛ ndu pila haki laa ndɔ kon co va o lebol ni.»

¹⁷Tɔŋnda Mɛlɛka yɔngu Moise le calii pɔnɔɔ a lanɔɔ, le calii fuɲaa nda cua ndɔ felengi co vɔ ndu o bɛngu coo-o lan la co lan ni.