Read Kissi Kundalan 31 Bible Online

Kundalan 31 - Kissi bible

Kundalan 31

¹Mí Mɛlɛka soaa o Moise lo, mó dimul ndu aa:

²«Mingul yungoo Madian màá le dɛnɛ vɔɔn nda tosal Israɛlla-o. A cii pɛ màá kon mingi, a dem niko fuɲaa nɔmaa mamaa vi-a ciee-piɔ́m.»

³Mí Moise soaa o sɛ́lɛ́ Israɛlla lo, mó dimul nda aa: «O niaa tɛɛn, vanpiaandua pum a bɛɛndian ma cua ɲɛm cɔwvon, ma kɔ del Madiannda coo, haliko ma mingul nda màá Mɛlɛka pila kelu le nda mingullo-o.

⁴O lepola oo lepola coo, la cua Israɛlaa piaandua vàá pilɛ le kɔlan o cɔwvo.»

⁵O kon, o vanaa cɔwva Israɛl tɛɛn, má cua vanpiaandua vàá pilɛ o lepola oo lepola coo le cɔwvo. Mí kon bɛnda kpow vanaa cɔwva vaalan tɔ́ a latiɔn (12 000)

⁶Mí Moise viam nda kpow o cɔwvo. Mó mal nda Pineas, po Eleasar vana-solia-lasálàá kɔɔli. Pineas kon ɲɛm diandan co le vali Mɛlɛka-o-on va o ba ni, a bulula hɔŋaalan le tɔɔmaseloo yɔngoo le cɔwvo kaandɔɔ.

⁷Má kɔ del Madiannda coo mɛɛ Mɛlɛka pila vem nda a sondo Moise-o yɛ, má diw vanpiaandua kpow.

⁸Má diw vɛlɛ masaa Madiannda nda ŋuɛɛnu: Evi, Rekɛm, Sur, Hur a Reba. Má dii vɛlɛ Balaam po Beɔr-o a mɔɛi cɔwve.

⁹Má bii vanlaandua Madiannda a cuavaa ndaa, má cua cɔlua ndaa a ɲɛm ndan sɔvɛɔn kpow.

¹⁰Má mal kobila nda va icali nin-ndan kpow yin, má loam vɛlɛ sɔndɔkɔlta ndalan kpow.

¹¹Má kɔannun a ɲɛm nda puu o cɔwvo-on, a vanndacieea ndáà bii-a a á cɔlua ndáà biw-va.

¹²Má cua vanaa ndáà bii kan-nda a cɔlua kan a ɲɛm nda puu mun o cɔwvo-on, má yoo Moise, Eleasar a Israɛlaa tɔ̀a. Tuma kon, Israɛlla va vɔ icali o dɔ́ɔ́ngɔ́ ndaa nin, o dɛɛlalan Moab nin, lá holnun peo Yurdɛn Yeriko o hɔl-ndɔ lan.

¹³Mí Moise, Eleasar vana-solia-lasálàá a bolii lapangɛi fulà o dɔ́ɔ́ngɔ́ɔ̀ nin le kɔlan nda demullo.

¹⁴Mí Moise tuulu kɔl a vanaa cɔwva, a vanaa va kundala n'van vàá-vàálan a kundala n'van kɛmɛ-kɛmɛlan bolle-a, a va fulaa o cɔwvo-a pɛɛn.

¹⁵Mó ɲuna nda aa: «Le yɛɛ nɛ niaa mɛi yɛ vanlaandua ha yoomu?

¹⁶La loonun maa nda Balaam yɔngu silala vɔɔnndan ni ma tosa mí Israɛlla del kasi a Mɛlɛka o dɛnɛ Peɔr-o nin[26]. Nduyɛ kon tosa ni mí nàà halimaa toal kunda Mɛlɛka-o coo.

¹⁷Lelan, la diw poambɔa piaandua kpow a vanlaandua sina nin dɛnɛ vanapɔnɔɔ-a kpow.

¹⁸Vanaa niaa bɛnda le mɛiyo yoomu mì la manda nda le niaa pila-a co cuaambɔa laandua hiw-vɔ vanapɔnɔ kɔɔli le-a ni.

¹⁹Le niaa pila yɛ niko, vanaa diw vanndacieea-a kpow a vanaa pilan vanvílɛ́iya-a kpow, á lo vɔ o dɔ́ɔ́ngɔ́ɔ̀ kɔɔli le palɛi ndii ŋɔmmɛw. A bɛnda mà dindin o paale yàándɔlen a o paale ŋɔmmɛwndɔlen coo, nda pila a vanlaandua nda hin o biyɔɔ nin-nda.

²⁰Mì la dindi vɛlɛ volɔɔla niaala cuɛinanndan, ɲɛm toosian a yáwla visia-on, kolala toosian a yiiŋii cuinnda lan a ɲɛm-laandun toosian a yɔmndo-on kpow.»

²¹Mí Eleasar vana-solia-lasálàá dimul vanaa fula o cɔwvo-a aa: «Silala Mɛlɛka yɔngu Moise lan la co lan ni:

²²Ɲɛm cɔwnun a sianion, volin humbon, daɲan, cilinnde, liion,

²³kon co dimio ni maa ɲɛm nɔla ŋɔu o yin te-on, la bɛnda mì la dindi mun a yinnden, mì la yɔva mun o mɛmma dindianndan nin. Ɲɛm ŋɔa-on yɛ, mì la vow mun o mɛmma dindianndan nin daama.

²⁴O paale ŋɔmmɛwndɔlen coo, la dindi volɔɔla niaala cuɛinanndan. O kon kɔɔli, la nɔla niko mì la muungu a diandaa, mì la luɛi o dɔ́ɔ́ngɔ́ɔ̀ nin.»

²⁵Mí Mɛlɛka dimul Moise aa:

²⁶«Cua Eleasar vana-solia-lasálàá a vanaa co bolii lapangɛi o cuavaa Israɛlla coo-a, mì la cɔm ɲɛ-ɲɛ niaa bii o cɔwvo tɛ́kpɛ́-tɛ́kpɛ́: vanaa kaasoa a cɔlua.

²⁷A cii pɛ nda cɔm, a piɔw nda kundalan tan tiɔn kpen-kpen, vanaa cɔvaa kɔɛ o cɔwvo-a cua kundaa o pilɛ, sɛ́lɛ́ tɔ̀u kpow cua kundaa pilɔɔ.

²⁸O kon, a faŋa o pum o kunda vanaa kɔɛ o cɔwvo-a coo le ya Mɛlɛka yɔngoo, ɲɛ kon bɛnda mò va vanacieo o pilɛ o vanndacieea kɛmɛ leŋuɛɛnu coo, cɔloo o pilɛ o cɔlua kɛmɛ leŋuɛɛnu coo: cɔlua bɛndua, sofɛlɛa a cɔlua pɔmbɔa.

²⁹La bɛnda mì la faŋa kan o kunda co le vanaa cɔwva-o coo, mì nɔm Moise yɔngu Eleasar vana-solia-lasálàá nda maa ɲɛ nda faŋa le ya Mɛlɛka-o.

³⁰O kunda Israɛlaa tɔ̀a sɔlanin-ndo coo bɛɛ, ma faŋa vanacieo o pilɛ o vanndacieea beleŋuɛɛnu coo, cɔloo pilɛ o cɔlua beleŋuɛɛnu coo: cɔlua bɛndua, sofɛlɛa, cɔlua pɔmbɔa, cɔlua kpow, ma yɔngu leviia ɲɛm mun, á co vallo tosaa o Calta Mɛlɛka lan nin-nda pɛɛn.»

³¹Mí Moise nda Eleasar vana-solia-lasálàá a tosa mɛɛ Mɛlɛka dimul Moise yɛ.

³²Nduyɛ, o ɲɛm vanaa va o cɔwvo-a ndáà hin o ba-on nin, ɲɛ lo-o va hoo ni: saa a cuinnda vaalan kɛmɛ leŋɔmpum a belaŋɔmpum a laŋuɛɛnu (675 000),

³³nawva vaalan belaŋɔmmɛw a latiɔn (72 000),

³⁴sofɛlɛa vaalan belaŋɔmpum a ò pilɛ (61 000),

³⁵cuaambɔa laandua lemboa hiw-vɔ vanapɔnɔ kɔɔli le-a va vaalan beleyaa a latiɔn (32 000).

³⁶Kunda vanaa kɔɛ o cɔwvo-a sɔla-o va hoo ni: saa a cuinnda vaalan kɛmɛ leyáá a beleyaa a laŋɔmmɛw a kɛmɛ leŋuɛɛnu (337 500).

³⁷O cɔlua kan coo, má faŋa le Mɛlɛka saa a cuinnda kɛmɛ leŋɔmpum a belaŋɔmmɛw a à ŋuɛɛnu.

³⁸Nawva va vaalan beleyaa a laŋɔmpum (36 000), má yɔngu belaŋɔmmɛw a à ŋiɔn le Mɛlɛka.

³⁹Sofɛlɛa va vaalan beleyaa a kɛmɛ leŋuɛɛnu (30 500), má yɔngu belaŋɔmpum a ò pilɛ le Mɛlɛka.

⁴⁰Vanndacieea va vaalan tɔ́ a laŋɔmpum (16 000), má yɔngu beleyaa a à ŋiɔn le Mɛlɛka.

⁴¹Mí Moise cua ɲɛ-ɲɛ yɔngun le Mɛlɛka, mó sɔaa Eleasar vana-solia-lasálàá o ba maa mɛɛ Mɛlɛka dimul ndu yɛ.

⁴²Kundaa pilɔɔ yɛ, o Israɛlaa tɔ̀a sɔla-o, o Moise piɔw kpen-kpen a kunda vanaa cɔvaa kɔɛ o cɔwvo-a mó kɛsi ikɛi-yo

⁴³va hoo ni: saa a cuinnda vaalan kɛmɛ leyáá a beleyaa a laŋɔmmɛw a kɛmɛ leŋuɛɛnu (337 500),

⁴⁴nawva vaalan beleyaa a laŋɔmpum (36 000),

⁴⁵sofɛlɛa vaalan beleyaa a kɛmɛ leŋuɛɛnu (30 500),

⁴⁶vanndacieea vaalan tɔ́ a laŋɔmpum (16 000).

⁴⁷Mí Moise faŋa vanacieo o pilɛ o vanndacieea beleŋuɛɛnu oo beleŋuɛɛnu coo, cɔloo o pilɛ o cɔlua beleŋuɛɛnu oo beleŋuɛɛnu coo, mó yɔngu leviaa kan, á va vallo tosaa o Calta Mɛlɛka lan nin-nda, maa mɛɛ Mɛlɛka ndóò dimul ndu yɛ.

⁴⁸Mí vanaa cɔwva fula o kundala cɔwla yɛ́-yɛ́lan nin, a va kundala n'van vàá-vàálan bolle-a a á va kundala n'van kɛmɛ-kɛmɛlan bolle-a, má hun o Moise lo,

⁴⁹má dimul ndu aa: «Naa buɛyaa nɔmnda, n cɔm vanaa cɔvaa naa n kɔɛ o cɔwvo-a kpow, o pilɛ bɛɛ feŋan lecoo le.

⁵⁰Lelan naa n hin a sálàá ho o Mɛlɛka lo ni. Vana-vana hin a ɲɛ o sɔla-o, ɲɛm cɔwnun a sianion-ndon: yɔlɔn pɔmbɔn, kelan laban, kelan n'suon, kelan lanion a yɔlɔn labolon. N hin a mun le naa faleŋii baŋannde tosaa coo Mɛlɛka o hɔl.»

⁵¹Mí Moise nda Eleasar vana-solia-lasálàá a bii nda ɲɛm cɔwnun mún a sianion-ndon o laba.

⁵²Sianin vanaa va kundala n'van vàá-vàálan a kundala n'van kɛmɛ-kɛmɛlan bolle-a faŋa mún le Mɛlɛka sálàá solullo-on va lusoo kilolan kɛmɛ a belaŋɔmmɛw (170).

⁵³Kɛ vanaa cɔvaa tɔ̀a yɛ, mì vana-vana manda ɲɛm o kɔndu o cɔwvo-on le ndu pila.

⁵⁴Mí Moise nda Eleasar vana-solia-lasálàá a cua sianin vanaa va kundala n'van vàá-vàálan a kundala n'van kɛmɛ-kɛmɛlan bolle-a hin-ndon, má kɔa a mun Mɛlɛka o hɔl o cɛi-kola-toandaa-labɔɔŋianndo nin, haliko mi kon va ɲɛ loonanndo le Israɛlla.