Read Kissi Kundalan 32 Bible Online

Kundalan 32 - Kissi bible

Kundalan 32

¹Cuavaa-imamaa Rubɛn-nda a cuavaa-imamaa Kad-a ndáà nɔ cɔlua taw-taw. Má ca maa tàndá Yaesɛr-o a tàndá Kalaad-o láà bɛnda le cɔlua mandaa.

²Le hee, má komal Moise, Eleasar vana-solia-lasálàá a vanaa va bolii lapangɛi Israɛlla coo-a, má dimul nda aa:

³«Kobilan Atarɔt, Dibɔn, Yaesɛr, Nimra, Hɛsbɔn, Eleale, Sebam, Nebo a Beɔn,

⁴lá co o lɛŋnde Mɛlɛka yɔngu Israɛlla len nin-ndan, la bɛnda taw-taw le cɔlua mandaa. Nduyɛ, naa buɛyaa nɔmnda, n nɔ cɔlua taw o ba.»

⁵Má cɔɔlu vɛlɛ dimi aa: «Lelan, mɛɛ n ce naa ɲia yɛ, yɔngu naa lɛŋnde len mì le lo le naa, tɛ́ɛ́ngùù naa Yurdɛn leeloo le yandi.»

⁶Mí Moise mulul vanaa fula kan o polale Kad len nin a o polale Rubɛn-nden nin-nda aa: «Le yɛɛ mì puapilɛa niaa kɔɛ o cɔwvo, mì niaa lonnun icali nanu yili?

⁷Le yɛɛ niaa co yɛ Israɛlla yoomuan solio mà vi n'dial le luɛyɔɔ o lɛŋnde Mɛlɛka ke nda len nin?

⁸Nuaa koni fuɲaa niaa mamaa tosa telen naa n va vɔ Kadɛs-Barnea, mí viam nda suansuaannden tosaa le lɛŋnden mɛɛndanndo-o ni.

⁹Má heelu háá o dɛngbɛ bɛndoo Ɛskɔl, má mɛɛndian lɛŋnden. Kɛ mɛɛ nda muungu, má kɔ soli Israɛlla yoomuan le kɔlan o lɛŋnde Mɛlɛka mandal nda len nin.

¹⁰Mí Mɛlɛka tuulu kɔl a nda paale len háá mó tiaŋnun aa:

¹¹‹Vanaa fula haa Esipte má nɔ hau vɔsilan bidiin háá hiovɔɔ bidiin-nda, a luei o lɛŋnde ya mɛnalan Abraham, Isaak Yakɔb le nda len keo len nin te few. Kani a bii diom nuu mà lo lecoo le,

¹²fɔ Kalɛb po Yefune Kenisiinɔ-o a Yosue po Nun-ndo co luɛyɔɔ lenin ni. Nda bii ya Mɛlɛka diom má lo lecoo ni.›

¹³Lekɛ́ndɛi, mí Mɛlɛka tuulu kɔl a Israɛlla, mó mal nda laasianndo o lɛŋnde veselɛilen nin o vɔsilan belehiɔɔlu bɛngu, háá mí vanaa tɛɛmbuu kan Mɛlɛka kɔl-la cuu vu kpow.

¹⁴Sisa vɛlɛ, niaa vanaa kɔlvesɛiya ha, la yeema mì la tosa maa fuɲaa niaa kan, la yeema vɛlɛ mì la tuisi kɔltuw Mɛlɛka-o Israɛlla coo.

¹⁵Kani te la kɛɛ pɛ le diom ndɔɔ biyɔɔ, o co vɛlɛ niaa malɔɔ laasianndo o lɛŋnde veselɛilen nden nin, mì la tosa vɛlɛ mì vannda kpow a dɔwnun yɛɛvɛ.»

¹⁶Má mulul Moise aa: «Ɛ-ɛ, vɔ̀lɛ́lan kínɛí naa n co baŋɔɔ nanu le saa naa a cuinaa naa ni, mì n tangul cieon bɛndon le cuavaa naa.

¹⁷Naa pila yɛ, n có tamala le ɲɛm cɔwvon cuaa le Israɛlla simndan laci le. N co nda lo kɔlan laci háá mì n kɔ luei nda o lɛŋnde yɔngun nda len nin. Yungula naalan kínɛí la co lo nanu o kobila kungan a kpakilan-ndan nin ni, ma và a viannannda lenin le siòòŋii vanaa co icali o lɛŋnden nden nin-nda.

¹⁸Fɔ mì Israɛlla kpow, vana-vana sɔla kɛ́ ndɔɔ a nɛɛ ndɔa calaa malan naa n muungu o calta naalan.

¹⁹Kɛ naa n bɛnda lɛ mi n sɔla kɛ́ lelɛŋ Yurdɛn leeloo a laci le, kani naa n co lɛŋnden a yondolan sɔla Yurdɛn leeloo nanu, a ba paalen le can-ndo.»

²⁰Mí Moise mulul nda aa: «Te la lo pɛ o diomnde niaalen coo, mì la bɛɛndian le cɔwvo tosaa Mɛlɛka o hɔl,

²¹te kuubaa niaa cɔwva taŋ pɛ Yurdɛn leeloo Mɛlɛka o hɔl háá mì Mɛlɛka puu yaamɔaa ndɔa ɲɔɔn o ba,

²²te la lo pɛ cɔwvo tosaa háá mì Mɛlɛka hɛlu lɛŋnde len malan niaa muungu nanu, mɛɛ la cii yoole niáà baa len peelu. La sɔla lɛnin yaala Mɛlɛka o ba a Israɛlaa tɔ̀a o ba le. O kon, la nɔla niko mì la sɔla lɛŋnden nden kɛ́ɔ o cɛlɔɔ Mɛlɛka-o bɛngu.

²³Kɛ te la tosa lende le, mɛɛ la cua hakio a Mɛlɛka, mɛɛ niaa pila kɔmnde yɔŋ vɔɔn niaa co delɔɔ o lebol ni.

²⁴Lelan, la tangul cieon bɛndon le yungula niaalan a vɔ̀lɛ́lan le cɔlua niaa. Kɛ la bɛnda mì la peelu sɔɛi fula niaa o lasondo-e.»

²⁵Mí cuavaa-imamaa Kad-a a cuavaa-imamaa Rubɛn-nda dimul Moise aa: «Vana bɛndoo, naa buɛyaa nɔmnda n co tosa mɛɛ n dimul naa yɛ.

²⁶Cuavaa naa, laandaa naa a cɔlua naa kpede a co lo o cieon nin o tàndá Kalaad-o nin nanu,

²⁷mì naa buɛyaa nɔmnda, a kɛ́-kɛ̀ a nɔla cɔwvo tosaa, n taŋ peo Yurdɛn Mɛlɛka o hɔl, mì n kɔɛ le cɔwvo, mɛɛ nɔm vana bɛndoo pila dimi yɛ.»

²⁸Mí Moise soaa le nda o Eleasar vana-solia-lasálàá lo, o Yosue po Nun-ndo lo a o vanaa va bolii lapangɛi Israɛlla coo-a lo,

²⁹mó dimul nda aa: «O polale Kad len nin a o polale Rubɛn-nden nin, te vanpiaandua nɔla cɔwvo tosaa-a kpow a taŋ pɛ peo Yurdɛn niaa ndaa, mà kɔɛ le cɔwvo tosaa Mɛlɛka o hɔl, te la bii pɛ lɛŋnde len mì la hɛlu len, la yɔngu nda tàndá Kalaad-o, kɛ́ ndaa co kon ni.

³⁰Kɛ taa kɛɛ pɛ le taŋɔɔ niaa ndaa, mà kɛɛ le kɔlan o cɔwvo, mɛɛ a bɛnda mà kɔ sɔla lɛŋnden niaa tɛɛn o lɛŋnde Kanaan-nden nin.»

³¹Mí cuavaa-imamaa Rubɛn-nda a cuavaa-imamaa Kad-a dimi aa: «Ɲɛ Mɛlɛka dimul naa le tosaa-o, n co ndu tosa.

³²N co ɲɛm cɔwvon cua mì n taŋ Mɛlɛka o hɔl le cɔwvo tosaa o lɛŋnde Kanaan-nden nin, kɛ lɛŋnde naa n loonin kɛ́ɔ len le co va Yurdɛn leeloo nanu.»

³³O kon, mí Moise yɔngu polale Kad len, polale Rubɛn-nden a polale tálále Manase po Yosɛf-o len lɛŋnde va Sihon, masa Amoriia o ba bɛngu len a lɛŋnde va Ɔk, masaa Basan o ba bɛngu len. Kandɔɔ lɛŋii ken, kobila va lenin-ndan a yondola lɛŋii ken kpede, mó yɔngu nda.

³⁴Mí polale Kad len le mingi kobilan ndan tangul: Dibɔn, Atarɔt, Aroɛr,

³⁵Atrɔt-Sofan, Yaesɛr, Yɔkbeha,

³⁶Bɛt-Nimra a Bɛt-Haran. Má kunga lan a kpakio, má baŋ vɛlɛ vɔ̀lɛ́lan le saa ndaa a cuinaa ndaa.

³⁷Mí polale Rubɛn-nden le mingi Hɛsbɔn, Eleale, Kiriataim,

³⁸Nebo a Baal-Meɔn tangul, má mangala kobila lan diolan, má mingi vɛlɛ Sibma tangul. Má ke kobila nda mingi tangul tan diola celen.

³⁹Mí cuavaa-imamaa Makir po Manase-o-a bɛɛ a tiw o tàndá Kalaad-o nin kpow, má hialu tàndá kon Amoriaa va icali lenin-nda o ba.

⁴⁰Mí Moise yɔngu nda lɛŋnde Kalaad le len, má cal lenin.

⁴¹Mí Yair, fulaa o polale Manase len coo, kɔ del sɔndɔkɔlta Amoriia lapum coo, mó bii lan, mó ke lan diolan aa «Sɔndɔkɔlta Yair lan.»

⁴²O kon kɔɔli, mí Noba del kobio Kenat coo, mó bii ndu a cieon va ndu o ba bɛngu-on. Mó ke lan diola ndɔla ndu pila lan.