Read Kissi Kundalan 34 Bible Online

Kundalan 34 - Kissi bible

Kundalan 34

¹Mí Mɛlɛka soaa o Moise lo, mó dimul ndu aa:

²«Soo o Israɛlla lo ma dimul nda aa: ‹Lɔ́ɔ́ niaa tiiyanin o lɛŋnde Kanaan-nden nin-ndo, lɛŋnde vanin kɛ́ niaa len, pɛɛngulan ndɔlan la vanin ndan ni:

³A ba too, pɛɛngula lɛŋnde niaalen la kandunnin a lɛŋnde veselɛilen Sin, mì la pilapilan lɛŋnde Edɔm-nden. A kpengii paalen le can-nde, pɛɛngula niaalan a ba too la cannin a mɛmma hɛlii bɛnduan,

⁴mì la tuusu a ba too a kpengii helɔɔ-ngeemaa, mì la kei a Sin, mì la kɔ fula a Kadɛs-Barnea a ba too. Mì la kei a Hasar-Adar, mì la kɔ fula Asmɔn dí.

⁵Pɛɛngulan la kei pɛ a lon, la kɔɛ a ba pee pɔmbɔɔ Esipte le kɔlan delɔɔ o mɛmma ihɛllan coo.

⁶A kpengii paalen le del-le, mɛmma ihɛllan Mediteranee ma vanin pɛɛngulan ni.

⁷A ba luaŋ-ndo, pɛɛngula niaalan la cannin a mɛmma ihɛllan Mediteranee, mì la kɔ ciŋa háá o pembei Hɔr.

⁸La cɛn pɛ lon, la kɔɛ a Lebo-Hamat, la kɔ fula a Sedad.

⁹La cɛn pɛ lon, la kei Sifron, la kɔ tiiya Hasar-Enan. Pɛɛngulan a ba luaŋ-ndo la co lan ni.

¹⁰A ba paalen le can-ndo, pɛɛngula niaalan la cɛn pɛ Hasar-Enan, la kei a Sefam,

¹¹la kɔ tol a Ribla, Ayin a ba paalen le can-ndo, la kɔ fula a kɔngɔ dala bɛndoo Kinnerɛt.

¹²La cɛn pɛ lon, la kei a peo Yurdɛn le kɔlan delɔɔ o mɛmma hɛlii bɛnduan coo. Lɛŋnde niaalen le vanin len a pɛɛngula ndɔlan ni.›»

¹³Mí Moise tɛɛngul Israɛlla sɔɔn mun, mó dimul nda aa: «Lɛŋnde len niaa bɛnda ni mi la piɔvan a siondei malɔɔ. Len Mɛlɛka yɔngu le piɔwvo polama ŋɔmahiɔɔlu a tálá-an tɛɛn ni.

¹⁴Kani polale Rubɛn-nden a yungula ndɔlan, polale Kad len a yungula ndɔlan a polale tálále Manase len a yungula ndɔlan, man ma sɔla nin kɛ́ ndaa.

¹⁵Polama miɔmma man a polale tálále len, man ma cii kɛ́ nda lelɛŋndo sɔla o peo Yurdɛn leeloo nanu, Yeriko o hɔl-ndɔ, a ba paalen le can-ndo.»

¹⁶Mí Mɛlɛka soaa vɛlɛ o Moise lo, mó dimul ndu aa:

¹⁷«Vanpiaandua bɛnda mà piɔw lɛŋnden niaa tɛɛn-nda co haa ni: Eleasar vana-solia-lasálàá a Yosue po Nun-ndo.

¹⁸O nda kɔɔli, mì la soli bolle pangalen le pilɛ o lepola oo lepola coo le lɛŋnden piɔwvo.

¹⁹Diola vanpiaandua kan la co lan ni: le polale Yuda len, Kalɛb po Yefune-o,

²⁰le polale Simeɔn-nden, Samiɛl po Amihud-o,

²¹le polale Bɛnyamɛn-nden, Elidad po Kislɔn-ndo,

²²le polale Dan-nden, Buki po Yɔkli-o,

²³le polale Manase po Yosɛf-o len, Hanniɛl po Efɔd-o,

²⁴le polale Efraim po Yosɛf-o len, Kemuɛl po Siftan-ndo,

²⁵le polale Sabulɔn-nden, Elisafan po Parnak-o,

²⁶le polale Isakar len, Paltiɛl po Asan-ndo,

²⁷le polale Asɛr len, Ahihud po Selomi-o,

²⁸le polale Nɛftali len, Pedahɛl po Amihud-o.»

²⁹Vanpiaandua Mɛlɛka hɛli le lɛŋnde Kanaan-nden piɔwvo polama Israɛlla tɛɛn-nda yɔŋnun kan ni.