Read Kissi Kundalan 36 Bible Online

Kundalan 36 - Kissi bible

Kundalan 36

¹Mí vanaa va bolii lapangɛi o cuavaa-imamaa Kalaad po Makir-o, po imama Manase-o, fulaa o polale Yosɛf len coo-a kɔa o Moise lo a o vanaa va bolii lapangɛi Israɛlla coo-a lo,

²má dimul Moise aa: «Mɛlɛka ke nɔm vana naa bɛndoo dío le lɛŋnden Israɛlla piɔwvo tɛɛn a siondei malɔɔ. O kon kɔɔli, mí Mɛlɛka dimul nɔm le cuavaa laandua Selofad-a kɛ́ lelɛŋ fuɲa nda-o keo.

³Nduyɛ, te vanlaandua kan cal pɛ vanapɔnɔ fula o polale celen nin-ndo o ba o nɔ̀u nin o Israɛlla tɛɛn, fɔ mì vana faŋa kɛ́ fuɲa nda-o lecoo le nda yɔngoo mà kɔ cɔɔlu kon handɔɔ o kɛ́ polale nda cal o ba o nɔ̀u nin-nden coo. Kon tosan yɛ pɛ, kɛ́ naa kɔɛ a faŋanndo lecoo.

⁴Te Vɔsi Kɔlkɛndɛ Bɛndoo tiiya pɛ le Israɛlla, ɲɛm vanlaandua kan sɔlanin-ndon kɔ cɔɔlu handɔn o kɛ́ polale nda cal o ba o nɔ̀u nin-nden coo. O kon, kɛ́ naa kɔɛ a dɔɔnanndo.»

⁵Mí Mɛlɛka dimul Moise sɔɔn mùn le Israɛlla tɛɛngullo aa: «Cuavaa-imamaa poaa Yosɛf-a nɔ dí.

⁶La yaŋ-ndɔ nilan mì la tuei ɲɛ ya Mɛlɛka dimi o dɛnɛ cuavaa laandua Selofad-a nin-ndo: vana-vana nda yeema pɛ, a nɔla mà cal ndu o ba o nɔ̀u nin, kɛ fɔ mì vanapɔnɔ kon va o yungu co o polale pilɛlen nin nda ndaa-o.

⁷O kon, kɛ́la Israɛlla la venin cɔnɔnndo polalen o ba mi la hiow polale celen o ba le. Israɛlla kpow, vana-vana lonin o yiinanndo o kɛ́la fuɲaa ndɔa mamaa.

⁸O polama Israɛlla coo, te cuaambɔ laandoo loo pɛ kɛ́ɔ, mɛɛ o bɛnda mò cal vanapɔnɔ fula o polale pilɛlen nin nda fuɲa ndɔ-o o ba, haliko mi Israɛlla kpow vana-vana manda kɛ́ fuɲaa ndɔa mamaa ɲɛkɛndɛi.

⁹Kɛ́ oo kɛ́ cennin polalen o ba mo hiow polale celen o ba le, vana-vana lonin o kɛ́ ndɔɔ coo.»

¹⁰Mí cuavaa laandua Selofad-a tosa mɛɛ Mɛlɛka dimul Moise yɛ:

¹¹Mí cuavaa laandua Selofad-a, Mala, Tirsa, Hɔkla, Milka a Noa a cal o nɔ̀lan poaa puapilɛa fuɲaa ndaa o ba,

¹²o polale Manase po Yosɛf-o len nin poaa kan ndáà fula ni. O kon, mí kɛ́ ndaa lo o polale fuɲa ndalen coo.

¹³Silalan a tɔŋnda Mɛlɛka yɔngu Israɛlla a sondo Moise-o o dɛɛlalan Moab nin-ndan lá yɔŋnun ndan ni. O peo Yurdɛn kɔngɔ nda va ni, Yeriko o hɔl-ndɔ.