Read Kissi Kundalan 4 Bible Online

Kundalan 4 - Kissi bible

Kundalan 4

¹Mí Mɛlɛka soaa o Moise nda Aarɔn ndo, mó dimul nda aa:

²«La sɛva cuavaa-imamaa Kehat-a o polale Levii len tɛɛn a kundala ndala n'vanayalan a á yungula ndalan,

³kandɔɔ vanaa nɔ vɔsilan beleyaa-a, kɔ bii a á nɔ vɔsilan beleŋuɛɛnu-a, á vanin vallo pum tosaa o cɛi-kola-toandaa-labɔɔŋianndo nin-nda kpow.

⁴Vali nda vanin tosaa o cɛi-kola-toandaa-labɔɔŋianndo nin-ndo vanin le hɔlla landɔɔ o ɲɛm valin diandaa-diandan coo ni.

⁵Te la puusiaa pɛ dɔ́ɔ́ngɔ́ niaa vanin nin-ndo le hiovɔɔ laci, mì Aarɔn nda poaa ndɔa timbi kola-landaa kelu Fonda-Diandaa a Fonda Diandaa-Diandaa tɛɛn-ndo, a kuumbuu ndu o kesu kpemaa coo,

⁶a handu kola nda toosiaa a yáwla kálà-kálàlan lapum-ndo lecoo, a handu vɛlɛ kola nda yin a kaan-ndo o kon coo. A cii pɛ kon, a sɔɔ yɔmii co le kesu kpema kon cuaa-e.

⁷O kon, a pɛngɛla vɛlɛ kola nda yin a kaan-ndo o tabali bulu sálà nda kɛsi ya Mɛlɛka o hɔl-lo co coo-o coo, a handu sɛtilan, taalala kólaalan, hɛngɛilan a ɲɛla vovaa mamɛnndan lecoo le sálàla mamɔilan solio. Bulu co o kɛsiaa o tabalio coo lɔ́ɔ́-lɔ́ɔ̀-o, ndu bɛnda mò lo lecoo.

⁸Kon cuu pɛ, a pɛngɛla kola nda yin yinɔɔ siaŋa vólotótoo-o o ɲɛm mun coo, a kumbu niko kon kpow a kola nda toosiaa a yáwla kálà-kálàlan lapum-ndo. O kon, a sɔɔ yɔmnde le tabali kalaa cuaa.

⁹A cua kola nda yin a kaan-ndo, a kumbu ɲɛ kɛsiaa lafitinaa, fitinala ndɔlan, kpaɲala ndɔla pɔmbɔlan, ɲɛla ndɔla dɔavaa lapultan a ɲɛm nda vow cuɛima lafitinan nin-ndon kpow a kola kon.

¹⁰A cii pɛ, a simbul ndu a ɲɛm ndɔn vallon kpow o kola toosian a yáwla kálà-kálàlan lapum-ndo, a sɔɔ yɔmii co le ndu cuaa-e,

¹¹a pɛngɛla kola nda yin a kaan-ndo o fonda-loamaa-lasálà n'sianio coo, a kuumbuu yáw kàlà-kálàá pum lecoo, a sɔɔ yɔmii co le ndu cuaa-e.

¹²O kon, a cua ɲɛm valin nda tosa vallo o Cɛi-Diandaa nin-ndon kpow, a vow mun o kola nda yin a kaan-ndo nin, a simbul mun o kola nda toosiaa a yáwla kálà-kálàlan lapum-ndo nin. A simbul pɛ lende, a heelu mun o yɔmnde pum coo maa sángá[3],

¹³a kɔndu pulta macuɛila co o fonda-loamaa-lasálàá coo lan, a pɛngɛla kola siaŋa sɔɔtɔtɔɔ lecoo,

¹⁴a handu volɔɔla valta fonda-loamaa-lasálà kon lecoo: bonyun fuusan, cukanila n'ciŋndan, ɲɛla ɲindaa lapultan, taalala fasaŋiaa makòólan. O kon, a kumbu kon kpow a kola nda toosiaa a yáwla kálà-kálàlan lapum-ndo, a sɔɔ yɔmnde le ndu cuaa.

¹⁵Te Aarɔn nda poaa ndɔa cii pɛ Cɛi-Diandaa a ɲɛm ndɔn laandon simbul lende, telen niaa vanin cɔnɔnndo le kɔlan-ndo, cuavaa-imamaa Kehat-a nda hun cua niko ɲɛla lan le kɔlan a lan. À bɛnda mà pilan ɲɛm diandan mun pila nuaa sakpo le, yɔŋii nda sɔla piɔ́mndo. Vali yɔngun cuavaa-imamaa Kehat-a a cɛi-kola-toandaa-labɔɔŋianndo o kɔɔ-o co kon ni.

¹⁶Eleasar, po Aarɔn vana-solia-lasálàá yɛ, ndu nɔnin hɔlla o ɲɔɔn mun coo ni: cuɛima co le lomɔɔ o ɲɛ kɛsiaa lafitinaa nin-ndan, ansan, sálà kpeyan nda loam lepalaa-lepala-o a cuɛima co le pɔlaa-an. Ndu nɔnin hɔlla o Calta Mɛlɛka la lan coo a o ɲɛm co lenin-ndon kpow coo ni, kandɔɔ a ɲɛm ndɔn valin diandan, kɔ bii a ɲɛm ndɔn laandon kpow.»

¹⁷Mí Mɛlɛka soaa vɛlɛ o Moise nda Aarɔn ndo, mó dimul nda aa:

¹⁸«La tósà mì cuavaa-imamaa Kehat-a cuu vu leviaa tɔ̀a tɛɛn te.

¹⁹Taa sɔɔnguu pɛ o Fonda Diandaa-Diandaa ikɛi, ɲɛ niaa bɛnda mì la tosa le nda yɔŋii nda vu-o co hoo ni: nɔm Moise, Aarɔn a poaa ndɔa, la bɛnda mì la luɛi, mì la cɔm vana-vana vali ndɔɔ a ɲɛ diandaa o bɛnda le cuaa-o.

²⁰À bɛnda mà luɛi nda pilɛ kpé le ɲɛm diandan tofaa hali o telen pɔmbɔ bɛngu le, yɔŋii nda sɔla piɔ́mndo.»

²¹Mí Mɛlɛka soaa vɛlɛ o Moise lo, mó dimul ndu aa:

²²«Sɛva vɛlɛ diola cuavaa-imamaa Kɛrsɔn-nda a pilɛn-pilɛnnda mɛɛ nda co a kundala ndala n'vanayalan a á yungula ndalan yɛ.

²³Ma cɔm vanpiaandua nɔ vɔsilan kandɔɔ beleyaa háá beleŋuɛɛnu-a, á nɔlanin vallo tosaa o cɛi-kola-toandaa-labɔɔŋianndo nin-nda.

²⁴Baala cuavaa-imamaa Kɛrsɔn-nda bɛnda le tosaa-o a ɲɛm nda bɛnda le vilio-on co mun ni:

²⁵Nda cuanin kolala Calta Mɛlɛka lan ni: cɛi-kola-toandaa-labɔɔŋianndo, kola ndɔɔ, kola ndɔ vuaa nda tosa a yáwla kálà-kálàlan-ndo, kola-landaa co o dio cɛi-kola-toandaa-labɔɔŋianndo-o,

²⁶kolala kunga bɛɔ, a kola-landaa co o dio kunga bɛɔ-vo, la balu Calta Mɛlɛka lan a fonda-loamaa-lasálàá lan, yoei ndɛi a ɲɛm-laandun co lon-ndon kpow. Vali oo vali co a ɲɛm mun o kɔɔ, nda bɛnda le ndu tosaa ni.

²⁷Aarɔn nda poaa ndɔa o ba bɛngu nda bɛnda le vali kon kpow tosaa ni, le ɲɛm nda bɛnda le vilio-on vilio a le vali yɔngun nda-o tosaa. Mì la cɔm nda ɲɛ-ɲɛ nda bɛnda le vilio.

²⁸Vali cuavaa-imamaa Kɛrsɔn-nda bɛnda le tosaa o cɛi-kola-toandaa-labɔɔŋianndo nin-ndo co kon ni. Itamar, po Aarɔn-ndo o ba bɛngu nda bɛnda le vali kon tosaa ni.»

²⁹«Ma sɛva vɛlɛ diola cuavaa-imamaa Merari-a a pilɛn-pilɛnnda mɛɛ nda co a kundala ndala n'vanayalan a á yungula ndalan yɛ.

³⁰Ma cɔm vanpiaandua nɔ vɔsilan kandɔɔ beleyaa háá beleŋuɛɛnu-a, a nɔlanin vallo tosaa o cɛi-kola-toandaa-labɔɔŋianndo nin-nda.

³¹Ɲɛm nda bɛnda le vilio o volɔɔla cɛi-kola-toandaa-labɔɔŋianndo nin-ndon co mun ni: pɛngɛn Calta Mɛlɛka lan, kandola ndɔlan, sungbuan, fondala sungbuan ma kɛsi tumndan nin-ndan,

³²sungbuma co o kunga bɛɔ-van, fondala ma kɛsi tumndan nin-ndan, pikion, yoei a ɲɛm co le cɛi kon simio-on kpow. Mì la cɔm vana-vana ɲɛm o bɛnda le vilio-on.

³³Vali yɔngun cuavaa-imamaa Merari-a-o co kon ni, vali nda bɛnda le tosaa o cɛi-kola-toandaa-labɔɔŋianndo nin-ndo co kon ni. Itamar, po Aarɔn vana-solia-lasálàá o ba bɛngu nda vanin vali kon tosaa ni.»

³⁴Mí Moise, Aarɔn a bolii lapangɛi Israɛlla a sɛva cuavaa-imamaa Kehat-a a pilɛn-pilɛnnda mɛɛ nda va a kundala ndala n'vanayalan a á yungula ndalan yɛ.

³⁵Má cɔm vanpiaandua nɔ vɔsilan kandɔɔ beleyaa háá beleŋuɛɛnu-a, á nɔla le vallo tosaa o cɛi-kola-toandaa-labɔɔŋianndo nin-nda.

³⁶Vanaa nda sɛva o yungula ndalan nin-nda va vàála tiɔn a kɛmɛ leŋɔmmɛw a beleŋuɛɛnu (2 750).

³⁷Cuavaa-imamaa Kehat-a va vallo o cɛi-kola-toandaa-labɔɔŋianndo nin a pilɛn-pilɛnnda-a a yɔŋnun kan ni. Kan Moise nda Aarɔn a sɛva ni mɛɛ Mɛlɛka dimul nda a sondo Moise-o yɛ.

³⁸Cuavaa-imamaa Kɛrsɔn-aa nda sɛva-a yɔŋnun haa ni, mɛɛ nda cɔm nda a kundala ndala n'vanayalan a á yungula ndalan yɛ:

³⁹vanpiaandua nɔ vɔsilan kandɔɔ beleyaa háá beleŋuɛɛnu-a, a sɔla hɛlio le baalaa tosaa o cɛi-kola-toandaa-labɔɔŋianndo nin-nda,

⁴⁰a va kpow-kpow vàála tiɔn a kɛmɛ leŋɔmpum a beleyaa (2 630).

⁴¹Cuavaa-imamaa Kɛrsɔn-nda, a nda cɔm a kundala ndala n'vanayalan a á yungula ndalan-nda, á va vallo tosaa o cɛi-kola-toandaa-labɔɔŋianndo nin-nda, á Moise nda Aarɔn a sɛva mɛɛ Mɛlɛka dimul nda a sondo Moise-o-a a yɔŋnun kan ni.

⁴²Cuavaa-imamaa Merari-a nda sɛva-a yɔŋnun haa ni, mɛɛ nda cɔm nda a kundala ndala n'vanayalan a á yungula ndalan yɛ.

⁴³Vanpiaandua nɔ vɔsilan kandɔɔ beleyaa háá beleŋuɛɛnu-a, áà tiwba le baalaa tosaa o cɛi-kola-toandaa-labɔɔŋianndo nin-nda,

⁴⁴a va kpow-kpow vàálan layàá a kɛmɛ lediin (3 200).

⁴⁵Lende yungula cuavaa-imamaa Merari-a la va sɛ́lɛ́ ni telen Mɛlɛka vem Moise nda Aarɔn le nda cɔmndo-o. Lende Mɛlɛka ndóò dimul Moise le tosaa ni.

⁴⁶Vanaa Moise, Aarɔn a bolii lapangɛi Israɛlla a sɛva kpow-kpow o leviia tɛɛn a kundala ndala n'vanayalan a á yungula ndalan-nda,

⁴⁷vanaáà nɔ vɔsilan kandɔɔ beleyaa háá beleŋuɛɛnu-a, a hɛlin le vallo tosaa o cɛi-kola-toandaa-labɔɔŋianndo nin-nda,

⁴⁸à va vàála ŋɔmaa a kɛmɛ leŋuɛɛnu a belaŋɔmaa (8 580).

⁴⁹Mɛɛ Mɛlɛka dimi yɛ, mí Moise cɔm vana-vana vali ndóò bɛnda le tosaa-o a ɲɛm ndóò bɛnda le vilio-on. Mó tosa mɛɛ Mɛlɛka cɔm ndu yɛ.