Read Kissi Kundalan 5 Bible Online

Kundalan 5 - Kissi bible

Kundalan 5

¹Mí Mɛlɛka soaa o Moise lo, mó dimul ndu aa:

²«Dimul Israɛlla kpéŋ-kpéŋ maa vana-vana nɔ nàà siaŋaa, vana-vana nɔ kɔɔsinaa a vana-vana pilan vana vílɛ́iyo, te kon te cɔlu vílɛ́iyo, mó nɔɔla Mɛlɛka o hɔl, a bɛnda mà faŋa vanaa vaa lende o dɔ́ɔ́ngɔ́ɔ̀ nin.

³La bɛnda mì la faŋa vanaa kan, o va vanapɔnɔ o va vanalanɔ, mì la yɛɛ nda o dɔ́ɔ́ngɔ́ɔ̀ kɔɔli, yɔŋii nda nɔɔliaa dɔ́ɔ́ngɔ́ nda kon, o ya Mɛlɛka co icali nin-ndo.»

⁴Mí Israɛlla bii sɔɛi Mɛlɛka dimul nda ken-nde, má soli vanaa kan o dɔ́ɔ́ngɔ́ɔ̀ kɔɔli mɛɛ Mɛlɛka ndóò dimul Moise le tosaa yɛ.

⁵Mí Mɛlɛka soaa o Moise lo, mó dimul ndu aa:

⁶«Soo o Israɛlla lo, ma dimul nda aa: ‹Te vanndo, o va vanapɔnɔ o va vanalanɔ, o de pɛ ɲɛ pilaa a sondo yeelaa, mɛɛ o siŋnun vana vɔɔndo Mɛlɛka o hɔl, a bɛnda mà bii ndu maa vana tɛɛmbua tɔŋ.

⁷Lelan, o bɛnda mò sɔlɔlan dɛnɛ vɔɔn o tosa-o, mò mingul vana o de kon ɲɛ ndɔɔ a sondo yeelaa-o ɲɛ kon kpow, mò tuu vɔngu ɲɛ kon, mò handu ipilɛ o ŋuɛɛnu oo ŋuɛɛnu coo o vɔngu vana-solia-lasálàá kelu-o coo le ndu mingullo.

⁸Te o va pɛ maa vana o dil kon ɲɔɔ-o vi nin, kɛ o mɛi vana le kɛ́ ndɔɔ cuaa le, mɛɛ ɲɛ kon kpow bɛnda mò va le Mɛlɛka, kon co dimio ni maa le vana-solia-lasálàá, mò handu saa kóndóó lecoo le sálà co le hakio sɔlaa malɔɔ-o solio. A saa kóndó kon vana-solia-lasálàá tosanin faleŋii baŋannde ni haliko mi vana tɛɛmbuu kon tɔŋndo-o sɔla hakio malɔɔ.

⁹Ɲɛ-ɲɛ Israɛlla faŋa pɛ o ɲɛm diandan nda yɔ̀ngù vana-solia-lasálàá le sálàá solio-on coo, le vana-solia-lasálà kon ɲɛ kon co ni.

¹⁰Te vanndo yɔngu pɛ Mɛlɛka ɲɔɔ, a yɔngu vana-solia-lasálàá ɲɛ kon. Kɛ ɲɛ-ɲɛ vanndo yɔngu nin pɛ vana-solia-lasálàá, le vana-solia-lasálà kon ɲɛ kon co ni.›»

¹¹Mí Mɛlɛka soaa o Moise lo, mó dimul ndu aa:

¹²«Soo o Israɛlla lo ma dimul nda aa: ‹Ɲɛ niaa bɛnda le tosaa-o co hoo ni: te vanalanɔ co o nɔu-vo pala pɛ pɔnɔ ndɔ, mò hiŋ ndu hɔlla,

¹³te vanapɔnɔ celen suunda pɛ a ndu o vionnɔnndo nin, mì pɔnɔ ndɔ sina vɔ dɛnɛ kon ɲɛkɛndɛi le, te sei oo sei ve le ndu cɔɔmuuo le, taa bìí ndu o suunda kon nda vanapɔnɔ kon te, nuaa niaa bɛnda le dɛnɛ kon biyɔɔ ni.

¹⁴Te paŋalaa bii pɛ pɔnɔ ndɔ, mò ciiku laa ndɔ a sɔɛi vaa lende, laa ndɔ tósá dɛnɛ nɔɔlɛi vaa lende, ò tósà ndu le,

¹⁵o bɛnda mò kɔɛ a ndu o vana-solia-lasálàá lo, mò yɔngu kpeyan ɔrse kiloo leyàá le sálàá solio le ndu, kɛ o bɛnda mò vow cuɛiyan lecoo le, o bɛnda vɛlɛ mo handu ansan lecoo le. Kani sálà paŋalaa co kon ni, sálà yɔngu vana loonɔnndo a yɔŋ vɔɔndo-o.

¹⁶O kon, vana-solia-lasálàá sɔɔnguu vanalanɔ kon, o simi ndu Mɛlɛka o hɔl.

¹⁷O kɔndu mɛmma sálàn[4] o kpɛɛnɛi puuluei nin, o kɔndu cundoo o Calta Mɛlɛka lan nin, o vow ndu o mɛnndan nin.

¹⁸O simi vanalanɔ kon Mɛlɛka o hɔl, o tiimbuu ndu yiinde o lebol, o sɔɔ ndu sálà yɔngu vana loonɔnndo a hakio-o o ba, sálà paŋalaa pɛɛn, kɛ mì vana-solia-lasálàá pila bii mɛmma lolɛima sendío co man nin-ndan o ba.

¹⁹O kon kɔɔli, o vem vanalanɔ kon mɛnanndo, o dimul ndu aa: Te vanapɔnɔ celen sina nɔm vanalanɔ le[5], taa nɔɔlian-ndɔ má pala pɔnɔ nɔm kabi n cal o nɔu ho le, màá mɛmma lolɛima sendío co man nin-ndan ma tuísì nɔm sanga coo le!

²⁰Kɛ te o va pɛ maa a pala pɔnɔ nɔm, má hiŋ ndu hɔlla, maa a nɔɔlian Mɛlɛka o hɔl, mí vanapɔnɔ celen sina nɔm vanalanɔ,

²¹mɛɛ mɛnan-ndɔ, mì Mɛlɛka tosa mì sendío ho bii nɔm, mì vanaa niaa cal-la cua tɔɔmaseloo nɔm coo telen nda vanin mɛnaa-o. Màá Mɛlɛka siinguu nɔm vanalanɔ vilu loo, mì demboo pɛ nɔm cɔfuu,

²²telen mɛmma lolɛima sendían man ma co nɔm tiiya o dembe-o! O kon, vanalanɔ kon bɛnda mò muli aa: Amiina! Màá o tosan lende!

²³Vana-solia-lasálàá bɛnda mò sɛva sendíla lan, mò pɔɔla sɛbɛ kon o mɛmma lolɛima man nin háá mì sɛva kon vɔɔsun.

²⁴Mò koesi vanalanɔ kon mɛmma lolɛima sendío co man nin-ndan, mì mɛnndan ma luɛi ndu nin.

²⁵Mò bii vanalanɔ kalaa kpeyan sálà paŋalaa o ba, mò tosa faleŋii vana heelu ɲɔɔ coo le Mɛlɛka ndu cɔmndo-e, mò kɔɛ a kpeyan kon o fonda-loamaa-lasálàá coo.

²⁶Mò kɔndu kpeyanndo baa ca, ɲɛ loonanndo co kon ni, mò lom ndu o fonda-loamaa-lasálàá coo. O cii pɛ kon, o koesi vanalanɔ kon mɛmma man.

²⁷Te o va pɛ maa o yii pɔnɔ ndɔ dúmbú[6] lekɛ́ndɛi, mò nɔɔlian Mɛlɛka o hɔl, mɛɛ mɛmma sendíma o kol man-ndan ma co tosa mì sendío bii ndu, mì demboo pɛ ndu cɔfuu, mò siŋnun vana vilu loo, mò sɔla dangaa vanaa nda cal-la tɛɛn.

²⁸Kɛ te o va pɛ maa vanalanɔ kon nɔɔlian Mɛlɛka o hɔl a dɛnɛ kon te, maa o connun o diandaa, mɛɛ sendío nɔla mò bii ndu le, o nɔla vɛlɛ mò velu cuawva.

²⁹Tɔŋndo co kon a dɛnɛ paŋalaa o kɔɔ ni, te vanalanɔ co o nɔu-vo yii pɛ pɔnɔ ndɔ dúmbú mò nɔɔlian Mɛlɛka o hɔl,

³⁰te kon te, te paŋalaa bii pɛ vanapɔnɔɔ mo ciiku laa ndɔ o suundaa, o bɛnda mò kɔɛ Mɛlɛka o hɔl, mì vana-solia-lasálàá tosa a ndu mɛɛ tɔŋndo dimi yɛ.

³¹O kon, sɔɛi venin pɔnɔɔ kuee le tɛɛmbuu kon te, kɛ vanalanɔɔ i vanin o lebol ni.›»