Read Kissi Kundalan 7 Bible Online

Kundalan 7 - Kissi bible

Kundalan 7

¹Paale Moise cii Calta Mɛlɛka lan tondɔɔ len, mó pɔla lan, mó tala cuɛiyan lecoo a o ɲɛm ndɔn vallon coo, mó tala vɛlɛ cuɛiyan o fonda-loamaa-lasálàá coo a o ɲɛm ndɔn vallon coo le lan kpow sɔɔ Mɛlɛka o ba.

²O kon, mí simlacia, a va bolii lapangɛi o polama Israɛlla coo-a, á sɔla hɛlio le vannda sɛvaa-a

³hun a sálàla ndalan Mɛlɛka o hɔl: ɲɛla ɲaanannda soa nan-ndan tan ŋɔmpum, la va lakumbaalan, a nawva tɔ́ a à ŋiɔn. Mɛɛ kon co dimio ni maa vanaa ŋiɔn a yɔngu ɲɛ ɲaanan soa nan-ndo o pilɛ, vana pilɛ yɔngu nawvo o pilɛ. O Calta Mɛlɛka lan sondoo nda hin a cuungiaala lan ni.

⁴Mí Mɛlɛka dimul Moise aa:

⁵«Bii ɲɛm-kéan mun nda o laba ma yɔngu leviia mun. Le vali cɛi-kola-toandaa-labɔɔŋianndo n co va ni. A va pɛ mun nda yɔngoo, a yɔngu mɛɛ nda co a pilɛn-pilɛnnda yɛ, a mɛɛ vana-vana nɔ le kpekoo solio yɛ.»

⁶O kon, mí Moise bii ɲɛla ɲaanannda lan a navaa kan, mó yɔngu leviia.

⁷Mó yɔngu cuavaa-imamaa Kɛrsɔn-nda ɲɛla ɲaanannda soa nan-ndan latiɔn a nawva a hiɔɔlu, mɛɛ vali ndaa va yɛ.

⁸Mó yɔngu cuavaa-imamaa Merari-a ɲɛla ɲaanannda lan lahiɔɔlu a nawva nda ŋɔmaa le vali nda va tosaa Itamar, po Aarɔn-ndo o ba bɛngu-o.

⁹O yɔngu cuavaa-imamaa Kehat-a ɲɛ-ɲɛ o ɲɛla lan nin te, kani nda va le hɔlla landɔɔ o ɲɛm valin diandan coo a le mun vilio o lacongú ni.

¹⁰Paale nda va fonda-loamaa-lasálàá kumbio len, mí vanaa va kan simlacia o polama Israɛlla coo-a hun a cuungiaala ndalan Mɛlɛka o hɔl.

¹¹O kon, mí Mɛlɛka dimul Moise aa: «Vanaa co simlacia o polama Israɛlla coo-a bɛnda mà hin à pilɛn-pilɛnnda. O paalen lepilɛ nin, vana pilɛ bɛnda le hunɔɔ ni. Lende nda bɛnda ni mà hin a ɲɛm-kéan ndan le fonda-loamaa-lasálàá kumbio.»

¹²O kon, má hun o polalen, vana-vana a cuungiaa le polale ndɔlen: Paale taselen, mí Naasɔn, po Aminadab-o, fulaa o polale Yuda len nin hun, Paale diinndɔlen, Netaneɛl, po Suar-o, fulaa o polale Isakar len nin, Paale yàándɔlen, Eliab, po Helɔn-ndo, fulaa o polale Sabulɔn-nden nin, Paale hiɔɔlundɔlen, Elisur, po Sedeur-o, fulaa o polale Rubɛn-nden nin, Paale ŋuɛɛnundɔlen, Selumiɛl, po Surisadai-yo, fulaa o polale Simeɔn-nden nin, Paale ŋɔmpumndɔlen, Eliasaf, po Deuɛl-lo, fulaa o polale Kad len nin, Paale ŋɔmmɛwndɔlen, Elisama, po Amihud-o, fulaa o polale Efraim-nden nin, Paale ŋɔmaandɔlen, Kamliɛl, po Pedasur-o, fulaa o polale Manase len nin, Paale ŋɔmahiɔɔlundɔlen, Abidan, po Kideoni-o, fulaa o polale Bɛnyamɛn-nden nin, Paale tɔ́ndɔlen, Ahiesɛr, po Amisadai-yo, fulaa o polale Dan-nden nin, Paale tɔ́ a lepilɛndɔlen, Pakiɛl, po Okran-ndo, fulaa o polale Asɛr len nin, Paale tɔ́ a lediinndɔlen, Ahira, po Enan-ndo, fulaa o polale Nɛftali len nin. M(...)

⁸⁴Kpow-kpow, má yɔngu sɛtila bɛndula cɔwnun a volin humbon-ndan tɔ́ a latiɔn, hɛngɛila cɔwnun a volin humbon-ndan tɔ́ a latiɔn vɛlɛ, a taalala kólaala cɔwnun a sianion-ndan tɔ́ a latiɔn.

⁸⁵Lusul sɛti bɛndoo o pilɛ va kiloo o pilɛ a kalamulan kɛmɛ leyáá, lusul hɛngɛiyo pilɛ va kalamulan kɛmɛ leŋɔmmɛw. O nda yɔngu kpow-vo va volin latámán kilolan bidiin a lahiɔɔlu, mɛɛ volin latámán va o Cɛi-Diandaa nin-ndon va yɛ.

⁸⁶Lusul taala kólaa nda cɔw a sianion-ndo o pilɛ va kalamulan kɛmɛ a tɔ́, o piaa cá a ansan. O nda yɔngu kpow-vo va le sianion kilolan tɔ́ a layàá a kalamulan kɛmɛ lediin.

⁸⁷Le sálà loamaa, má hun a navaa tovaa tɔ́ a à ŋiɔn, saa kóndóa tɔ́ a à ŋiɔn a saa téndéa nɔ vɔsio pilɛ-a tɔ́ a à ŋiɔn handɔɔ o sálàla kpeyanndan coo, a cuinaa toovia tɔ́ a à ŋiɔn le sálà va le hakio sɔlaa malɔɔ-o.

⁸⁸Le sálà kɔlɲuloo, má yɔngu kpow-kpow navaa tovaa tɔ́ a à ŋiɔn, saa kóndóa belaŋɔmpum, cuinaa toovia belaŋɔmpum a saa téndéa nɔ vɔsio pilɛ-a belaŋɔmpum. Mɛɛ nda cii fonda-loamaa-lasálàá pɔla, cuungiaala yɔngun le ndu kumbio lan la yɔŋnun ndan ni.

⁸⁹Te Moise ndóò luɛi pɛ o cɛi-kola-toandaa-labɔɔŋianndo nin le suukanndo nda Mɛlɛka, kpendekele ndóò tuɛi diomndo sɔɛi o kumbu va o handaa o kesu kpemaa coo-o coo ni. Ó mɛlɛkaa ŋiɔŋaa kanda ɲɛm Hala-on-nda tɛɛn ndóò tuɛi diom kon sɔɛi ni. O kon, mì ndáà suukan nda ndu lende.