Read Kissi Nahum 1 Bible Online

Nahum 1 - Kissi bible

Nahum 1

¹Yamɛi kilulun Ninive-e. Vundule Nahum fula Ɛlkɔs-o ce len.

²«Mɛlɛka paŋalaa Hala co ni, ndu mingi máá ni. Mɛlɛka mingi máá, o pɛ a hiilɛi. Mɛlɛka mìngùl yaamɔaa ndɔa màá, mò mandan kɔltuw o nɔ a nda-o o kɔl.

³Mɛlɛka biwnùn, kpaaya ndɔɔ co o bɔɔ. O bíì vana tɛɛmbùù dɛnɔɔ-o maa vanaa tɛɛmbúú dɛnɛ loo le. O va pɛ kɔlan felenfelenndo cɛn. Yumbuyumboo co cundu can ndu o pelon bɛngu-o ni.

⁴O kɔngɔlan mɛmma ihɛllan, mí ma vela sɛ́ɛ́n. Ndu veeliaa peelan kpow ni. Bil puiyaa Basan a hoo o pembei Karmɛl yɛngullo vesa kékélé. Yandɔɔ billo Liban ɲɔfɔliaa.

⁵Mɛlɛka tosa ni mì pembun bɛndon ɲiiya, mì pembun pɔmbɔn piɔsi. Ɲiiyaa lɛŋnden le ɲiiya ndu o hɔl ni, lɛŋnden a vanaa co le coo-a kpow.

⁶Nɛ̀ɛ́-nɛ̀ nɔla yɛ mò simul kɔl ndɔ tuwvo? Nɛ̀ɛ́ tiw yɛ ba mò lo yoomu a yinnde ndɔle kɔltuwlen? Maa leyin kɔl ndɔ tuwvo keleŋa tiwvo ni, hali powtan mi la piɔsi ndu o hɔl.

⁷Mɛlɛka naŋ bɔɔ! Ndu co nɛɛ viannanda o palɛi dɛnɛ palai nin ni. O nɔ hɔlten vanaa viannun ndu o ba bɛngu-a kpede coo,

⁸tuma kpundɔɔ hun maa mɛmma hunaa-o. Kɛ o toaw yaamɔaa ndɔa o ɲumma piɔ́mndan nin, mò tɛɛmbuu nda kpede.»

⁹«Vɛ̀ɛ̀ niaa co yɛ yiyanndo a Mɛlɛka o kɔɔ? Ndu co yaamɔaa niaa tɛɛmbuuo ni, o kon dɛnɛ palaa tul lɛnin niaa coo o diinndɔɔ le.

¹⁰Yaamɔaa niaa vueinun bɛɛ maa bɔɔla n'yɔ, mɛ̀ɛ́-mɛ̀ɛ́ nda pum mɔiyan, a co ŋɔ mà cuulu mungén mɛɛ bil vesɛiyo ŋɔa nuaa yɛ.

¹¹O nɔm Ninive nin vana kon fula ni, vana va kon tuuvo le Mɛlɛka ciŋilanndo-o, ó va kon tuula tɛɛmbualan bɛɛndiaa-o pɛɛn.

¹²Nuaa Mɛlɛka dimi ni aa: ‹Hali yaamɔaa niaa va bɛɛ sɛ́lɛ́, mà nɔ yoomuan taw, à co cuvɔɔ kpede, o kɛ́-kɛ̀ lonin te. Yáà tuisi niaa paandu sangaa coo, kɛ i saangiaa lɛnin niaa le.

¹³O laan ndu, i co kpòndó co niaa o lebol-lo yomɔɔ, mì kili yɔlɔn nda baiyiaa niaa-on.›

¹⁴Niaa yungoo Ninive, nuaa Mɛlɛka dimi a niaa o kɔɔ ni aa: ‹Cuavaa niaa, vana-vana lonin yoomu le diola niaalan mɛiyo ceen te. I solinin halaa niaa o cɛila máánnda niaalan nin, piɔmaa niaa iyɔmnda a piɔmaa niaa n'ciliŋaa kan pɛɛn. I co sɛi niaa tovɔɔ, kani la co lɛ ɲɛ-ɲɛ ya o hɔl te.›»