Read Kissi Nahum 2 Bible Online

Nahum 2 - Kissi bible

Nahum 2

¹«Vannda Yuda sei! La tofa vɔ kiilaa hunɔɔ o pembon coo a yoongu kɛndɔɔ, Yoongu kɛndɛ kɔlɲuloo pɛɛn. Lelan, la tosa kafola niaala lekaanndan. La cuu Hala ɲɛm niaa bàá yoolen o ndu lo-on. Kani vana tɛɛmbua n'vanndo luei lɛnin o lɛŋnde niaalen nin te. O tambu mó ɲum bombo cú!»

²«Vanaa vɔɔnda co nɔm kuello, nɔm Ninive! Bɛɛndiaa vanaa nɔmaa cɔwva le fondala mayoomulan kandaa dɛ! La vá cumullo o nɛilan coo mì la bɛɛndian le cɔwvo. La sim a yoomuma niaan kpede.

³Kani Mɛlɛka co bɔɔbɔɔyɛi polale Yakɔb len mingi o piawvo maa mɛɛ o tosal Israɛl-lɛ. Nda yɔŋnun nakɔ n'rɛsɛn vanaa del vannda coo-a ndáà del coo mí ndáà tɛɛmbuu ndu-o ni.»

⁴«Kɔ̀ɔ̀la cɔwla kuubaa ndaa la co la siaŋa. Volɔɔla ŋɛlɛngi-ŋɛlɛngilan la co nda lekɔɔ ni. Taa cɛn pɛ le kɔlan cɔwvo, yinnden le fula o ɲɛla ɲaanannda ndala soa nan-ndan, bálta ndalan la biiŋun.

⁵O kon, ɲɛla ɲaanannda ndala soa nan-ndan la saan ɲaanɔnndo o nɛilan coo a o bɛ́ɛ̀lan nɛɛ-nɛɛ ka maa visia iyola, vana ca ko aa tɛngɛla leyinndan ni. Maa piɔɔ-volia la keleŋa ni.

⁶Masaa Ninive co simlacia vanaa ndɔa cɔwva veeloo, kɛ a co hunɔɔ a boŋio. Vannda co hunɔɔ cɔ́-cɔ́ a kpengii kpaki kobio le nda delɔɔ coo. A sim nɛɛ pum le vionnɔnndo.

⁷Fɔ́ɔ́fɔ̀, mí diola luɛyaala va a ba peelan-ndan la bɛɛŋun, mí cɛi lemasaa biinun.

⁸Piɔm laandu va lon-ndo solin ceen, a kɔɛnnun a ndu. Vanlaandua va baalaa tosaa o cɛi piɔm kon nin-nda co koŋullo maa n'poonpoon, a co balan handɔnndo o takpa a mɔnɛi.

⁹Ninive siŋnun maa fɛngɛ mɛmma ndɔan ma co lullo-o, A co vanaa co ɲaanɔnndo-a yondallo aa: ‹La sim-ndɔ! La sim-ndɔ!› Kɛ vana pilɛ bɛɛ co mulin te.

¹⁰La koeindi volion a sianion cɛilan nin. Bolofaa co o kobio ho nin-ndo cuu cua le, ɲɛm sɔvɛn súú-súù ka n co n'piaa lenin ca.

¹¹N'tiŋ cɔwvian, n'pum tɛɛmbun, n'pum puunun! Ninivea vi n'diallon pɛ́! Vulan la co nda ɲiiyaa, nda pila yɔŋnun lɔngulɔn, hɔlla mangalan nda yifidii.»

¹²Vɛɛ nɛ foofola yàlàá ha la yɔŋnun yɛ? Lenin yàlàà cuawva va baloo dioo ni. Yàlà piaandoo ndóò kɔ bɛɛ doosulen, vanaa óò kpeeŋiaa cuavaa ndɔa le.

¹³Yàlà piaandu va kon visia diwvo le cuavaa ndɔa, mí ndóò va nda sɛɛsiaa le yàlàá ndɔa laandua-o, ó va kon bɛ̀mɛ́lta ndɔlan peiyo a ɲɛmahiloo-o, kuɛɛ nɛ o co yɛ niko?

¹⁴Diom Mɛlɛka-Nɔ-Kpaayaa-Kpow-vo dimi-o co hoo ni: ‹I hinul nɔm, nɔm Ninive. I malnin ɲɛla ɲaanannda nɔmnda soa nan-ndan o yin. Mɔɛi cɔwve ciinin yàlàà téndéa nɔmnda diw. Nɔm Ninive, i mel lɛnin nɔm ɲɛm pilan puuo o lɛŋnden coo le. Vana tui lɛnin kiilaa nɔmnda diom te.›»