Read Kissi Nahum 3 Bible Online

Nahum 3 - Kissi bible

Nahum 3

¹«Dɛnɛ palaa co le kobi diuvaa n'vanndo ho. Kobi pɛ hoo a kafalan a á kɔlvesɛiyo-o, o co hoo hiovɔɔ laci a vannda delɔɔ coo-o pɛɛn.

²Ɲɛ vana tuɛi diom lon-ndo co hoo ni: siondii nda soaŋ vannda-e, pelun soa, a idikidikii ɲɛla ɲaanannda soa nan-ndan.

³Vanaa ɲaanun o soa coo-a co vannda kuello, mɔɔn cɔwvon co volio iŋɛlɛngi-ŋɛlɛngiei, báltan la co volio maa piɔɔ-volia. Vanaa cɛɛlun-nda co sɛ́lɛ́ taw. Vanvílɛ́iya co bémbéla bɛndulan, a cuu cɔm te. Vannda co keiyo boŋio o vanvílɛ́yaa kalaa.»

⁴«Kon kpede tosan, le tùú Ninivea suunda taw, mí ɲɔɔ hiaw nda ba yelelanndo, má va vannda pisio o suundaa bɛngu, má va vannda vuɔɔlan a koovan-ndo,

⁵Diom Mɛlɛka-Nɔ-Kpaayaa-Kpow-vo dimi-o co hoo ni aa: ‹Má cè ya nɔm kuello! I co bɔɔla doma nɔm bɛndoo heelu nɔm o hɔl, mì soli tun fondo nɔmndo vanaa-mangalaa-isɔɔa o hɔl, mì tɛɛmbuu nɔm bɛɛlan masɛi o hɔl.

⁶I co nɔm sasɔɔ o loolio nin, mì tuisi nɔm siɛmbulan, mì soli nɔm vannda o hɔl kpendekele.

⁷O kon, vana-vana ce nɔm pɛ, o ɲaanun, o dimi aa: ‹Kpòkóó, Ninive tambu fɔ́! Nɛ̀ɛ́-nɛ̀ tuinun yɛnin ndu iɲíí?›»

⁸«Vɛ̀ɛ̀ nɔm Ninive co fisa a kobio Tɛb[1] ni? Tɛb vannun kon o mɛnndan tɛɛn, mí peo Nil ndóò balu ndu sɔ́-o pɛɛn. O mɛnndan tɛɛn déŋ o vannun ni, man ma va kpaki ndɔɔ ni.

⁹Etiopii a Esipte ndóò tiindan ni, kani ndáà nɔ kpaayaa taw. Vannda Put a haa Libii va vanaa ndɔa malaa ni.

¹⁰Kɛ a kon kpede, vanaa kan Tɛb bɛɛ, má kɔa a nda o biyɔɔ nin. Má vɔɔciaa cɛlɛkpɛa ndaa o nɛilan kpow demullo. Mí vannda mal siondei, má piɔvan simlacia ndaa, má kɔa a vanaa ndaa bɛndua kpow o yɔlɔn.

¹¹Nɔm Ninive bɛɛ, lende koni dɛnɛ palaa toalnin nɔm coo ni mɛɛ mɔima bii vana. A yɔkpanin a sangaa, ma nuwviaa nɛɛ viannannda le yaamɔaa nɔmnda hiɔlɔnndo.»

¹²«Fondala mayoomula nɔmndan kpow, maa voosun diw yɛnguu-yɛnguuon la co ni. Vana hiiluu dɔ́ɔ́ pɛ vosu tumndo, n cɛɛlun vana yeema le mun dioo-o o sondo.

¹³Maa n'vanlaandu kuubaa nɔmnda co ni. Diola luɛyaala nɔmndan la co lan pila kumbinndo yaamɔaa nɔmnda laci vankpandan. Yinnden le cii sɔkɔma diola lan lomɔɔ.

¹⁴Vannda Ninive sei, la kɔndu mɛnndan le calta niaalan mingio tangullo, le fondala niaala mayoomulan mingio bɛɛndiaa. La linda puulu bɔwvo mì la bɛɛndiaa multan le kpilion lɔu.

¹⁵Kɛ niaa yɛ, la vunin o yinnde nin, yinnde vanin kobi niaa lomɔɔ len pɛɛn, te kon te la vunin o mɔɛi cɔwve bɛngu. La cɛɛlunnin mɛɛ kamballa cɛɛluu billo nuaa yɛ.» «La va a cuungiannda nɛɛ pilɛ maa n'kambala, niáà kui vɛ́ɛ́lɛ̀-vɛ̀ɛ̀lɛ̀ maa n'sóónɔ.

¹⁶Yulaa nɔmnda vannun nin sɛ́lɔ́ɔ́ taw, ndáà hiow nin vaa sɛ́lɛ́ a loeon o halataala, vanáà ca nda ko aa kambalaa cii dioo má va cɔnɔnndo coocoo-a ni.

¹⁷Vanaa nɔmaa bɛndua ndáà kui nin bɔɔ maa n'sóónɔ, cuavaa niaa baalaa va nin bɔɔ sɛ́lɛ́ maa pumbu n'kambala kei calle o bɔɔla iyɔmndan coo tuma ihoeiyo-a. Te paalen le kendu pɛ, a cɛn, a kɔɛnnun nɛɛ vana sina le-a. Kuɛɛ nɛ kan kpow a co yɛ?»

¹⁸«Nɔm masaa Asiri, vanaa nɔmaa bɛndua hiownun o lɔan, a tindu lɛnin lɔ́ɔ́-lɔ́ɔ̀ le. Kuubaa nɔmnda connun ihini lɛ́ɛ́siɛ́n. Nɔm yɛ, vanaa nɔmnda co a sɛŋiannda kpow o pembon coo, vana co le nda mɔɔsiaa le.

¹⁹Kpundɛ nɔ maɲulu loo del nɔm coo dɛ! Yɔŋulɔnnda nɔmndan yɔŋulɔnnda piɔ́mndan la co ni. Vana-vana tuei pɛ dɛnɛ nɔmndo tɔ́ɔ́, o tɛm balan a dɛnɛ kon. Kani nɛ̀ɛ́-nɛ̀ co yɛ, o n tuisi dɛnɛ palaa coo loo?»