Read Kissi Sofoni 1 Bible Online

Sofoni 1 - Kissi bible

Sofoni 1

¹Tuma Osia po Amon-ndo va masalen tosaa o tàndá Yuda-o coo-o, mí Mɛlɛka soaa o Sofoni lo. Po Kusi-o a po imama Kedalia-o Sofoni va ni, fulaa o polale Amaria len a o polale Esekia len nin.

²«I co ɲɛ-ɲɛ basɔɔ o lɛŋnden coo selemenden! Diom ya Mɛlɛka soo-o co kon ni.

³I co vanndacieea a cɔlua tɛɛmbuu, mì tɛɛmbuu vɛlɛ yowva coocoo a suwva o peelo. I tɛɛmbuunin vanaa kɔlvesɛiya a sɔɔn nda co tosaa mà va vannda lueiyo o pɔwlan nin-ndon. I vɔɔsuunin vanacieo o lɛŋnden coo few-few. Diom ya Mɛlɛka soo-o co kon ni.»

⁴«I co vanaa co icali o tàndá Yuda-o nin-nda a vanaa co Yerusalɛm ciee-a lɔɔ. I tɛɛmbuunin ɲɛm tɔ̀un lo o kaannde Baal-ten nin-ndon, mì ɲumi mun o fondaa ho. I tɛɛmbuunin vanaa baalaa ndɔa a vanaa-solia-lasálàà ndɔa, háá mì vannda pɔɛɛnun a dɛnɛ ndaa.

⁵I tɛɛmbuunin vanaa hel o yindɔla cɛilan coo, má va vulan baŋɔɔ le ɲɛm pangelen co o halataala-on biiloo-a. I tɛɛmbuunin vɛlɛ vanaa co vulan baŋɔɔ ya Mɛlɛka o labɛngunin, má va mɛnanndo o diola nilan, kɛ má va kpemalan yiiyo o diola piɔmndo Molɛk lan-nda kpow.

⁶I tɛɛmbuunin vanaa co faŋanndo ya Mɛlɛka ibuŋ, a co buulan te-a, vanaa co ya sɔɔnguu ikɛi le ya sila ɲuna le-a pɛɛn.

⁷La mei Maalii, o co Mɛlɛka-o o hɔl kpili, kani paale ndɔlen le co le tiiyaa. Mɛlɛka cii sálàá toosiaa, o cii nin vanaa o veelu le sálà kon-nda dindi.

⁸Mɛlɛka dimi aa: ‹Te paale solia sálà len le tiiya pɛ, i dɔawnin simlacia, poaa masaa a vanaa co cuɛinɔn súú celenndo-a kpow yɛɛvɛ.

⁹Paale len, i soaŋnin vanaa huulu o kèédei coo-a kpow, a pei cɛila vanaa ndaa bɛndua a bolofaa yɔŋ vɔɔndo a á ɲɛ-sɔlaa delɔɔcoo-a pɛɛn.

¹⁰Paale len, yoondiaalan a diomnda vɔkɔ-vɔkɔlan la tuɛinunnin a ba Dio-n'suwvo. Diom ya Mɛlɛka soo-o co kon ni. Vana tuɛinin hiiliaalan o bungɛi sɛnɛi kobio nin, ɲɔɔ piɔndinin taw a kpengii pembon.

¹¹Niaa vanaa co Maktɛs-a, la hiiliaa, kani yulaa niaa kpow co hunɔɔ vu, vanaa co lusul n'volio tuuvo-a kpede a cuunin!

¹²Paale len, i balunin Yerusalɛm mɛɛndianndo a tɛngɛla leyinndan. I co vanaa kɛɛ le kpeŋanndo ma vannun yili, mɛɛ kììyo cal o mɔiyan bɛngu nuaa yɛ-a soŋɔ̀ɔ̀ soŋɔ̀ɔ́ pila. Kani a co dimio aa: Mɛlɛka nɔla ɲɛ-ɲɛ tosa le, o va dɛnɛ kɛndɛ, o va o vɔɔn.

¹³Bolofaa ndaa co nda puunɔn o laba a paa-kala, mì cɛila ndalan la siŋnun bémbélan. A cɔawnin cɛilan, kɛ a celnin lenin te. A solinin nakɔla n'rɛsɛnndan, kɛ a kolnin mɔima rɛsɛŋun mun te.›»

¹⁴«La tofa vɔ! Paale bɛndule len le co le tiiyaa. Paale Mɛlɛka len le co nin kpɛɛlun. Vana tuɛinin somisominndo a caŋndo o paale Mɛlɛka len coo. Kuubaa hiow cɔwvo caa-a bɛɛ a koŋulnin.

¹⁵Paale kɔltuwlen paale len le vanin ni, paale ŋɔɔciannden a paale dɛnɛ palaalen le vanin ni. Paale tɛɛmbua len a paale imɔnɛ len le vanin ni, paale maɲumnden a paale ɲumma n'kpungbalen, paale yumbuyumbulen a paale mɔ́m bɛndulen le vanin ni.

¹⁶Paale bulu hɔŋaa a lee saa kóndóó soaanin-nden, paale len, vana tuɛinin vóólun-vóólunn cɔwvo le kobila mayoomulan a cɛila coocoolan biyɔɔ.

¹⁷I tuisinin dɛnɛ palaa vanndacieea coo mà va kɔlan a nɛiyo nuwviaa maa vanaa sumɛi. Kani a cua hakio a ya Mɛlɛka. Kooma ndan ma sɛŋinnin maa cundu, mì nda pila tiw a vílɛ́iya maa bil.

¹⁸Volin ndan a sianin ndan nɔlanin nda ciindiaa o paale kɔltuwle Mɛlɛka len coo le few. Mɛlɛka loamnin lɛŋnden kpow a yinnde ndɔle paŋalaalen. Ì vanin sɔɛi kpundɛ bɛndu dɛ! Mɛlɛka co vanndacieea co o lɛŋnden coo-a kpow tɛɛmbuu.»