Read Kissi Sofoni 2 Bible Online

Sofoni 2 - Kissi bible

Sofoni 2

¹«Éé niaa vanaa nɔ haa lasiɛmbu le-a! La muungu o niaa pila nin. La mɛɛndian kɔlta niaalan,

²lɔ́ɔ́ pá mì sɔɛi fula masa bɛndoo o sondo-e dimin, mì paalen le hiow mɛɛ foeende hiaw o hoeiye nin nuaa yɛ. Là cùm háá mì kɔltuw bɛndu Mɛlɛka-o tol niaa coo le, là cùm mì paale kɔltuwle Mɛlɛka len le komal niaa le.

³Lelan, niaa vanaa tuisiaŋaa co o lɛŋnden coo-a, la muli hɔlla o Mɛlɛka lo. Niaa vanaa dɛnɛ sandaa, la nuwviaa ɲɛ-ɲɛ co dɛnɛ sandaa, la kindin le vaa vanaa tuisiannda. O kon mì la sɔla baŋaa o paale kɔltuwle Mɛlɛka len coo.»

⁴«Vannda co hunɔɔ Kaasa piovɔɔ, Askelɔn co hunɔɔ itambu. Vanaa co icali Asdɔd-a co townɔn ipala déŋ, a toawnin vannda Ekrɔn mì kobio lo fondo.

⁵Dɛnɛ palaa co vanaa co icali o mɛmma ihɛllan kɔngɔ-a cum! Dɛnɛ palaa co le yungu hin fulaa Krɛte-o! Kani le sanga niaa sɔɛi Mɛlɛka-e dimin ni aa: ‹Sangaa co le Kanaan, lɛŋnde Filistia pɛɛn. I tɛɛmbuunin nɔm Kanaan, i solinin vanaa co icali nɔm nin-nda kpow.

⁶Tandala co o mɛmma ihɛllan kɔngɔ lan la siŋnunnin bil puiyaa a yasabaala vanaa mandaa n'cɔlua, mì la siŋnun vɛlɛ vɔ̀lɛ́lan le cɔlua mandaa.›

⁷Vanaa lonin yoomu o polale Yuda len ninnd-a, nda nɔnin tándàla lan ni. Lon nda vanin cɔlua ndaa yɔɔ diólan ni. Icɔl, a vanin pɛngio o cɛilan nin Askelɔn, kani Mɛlɛka Hala ndaa yiyannin nda coo, mò mangala dɛnɛ ndaa hɔlaa celen.»

⁸«I tuei yeowla fula yungoo Moab o sondo lan, mí tuɛi sɔɔn vɔɔŋun fula poaa Amɔnnda o sondo-on. À va yungu nuu yeowlan má va lɛŋnde yungu ni kon kiolɔɔ le lɛŋii ndɛi cɔɔloo.

⁹Lelan, le yoomu nuu, ya Mɛlɛka-Nɔ-Kpaayaa-Kpow-vo soo nuaa ni, ya Hala Israɛlla pɛɛn, Moab co hunɔɔ itambu mò siŋnun maa Sodɔm, mì poaa Amɔn-nda siŋnun maa Komɔr. Lɛŋnde ndalen le vanin maa yondo n'kayon, le siŋnunnin maa fonda ihɛl, maa fonda tambu le fɛɛn a fɛɛn-ndo. Vanaa lonin yoomu o yungu nuu nin-nda poondanin ɲɛm vanin lon-ndon, a sɔlanin lɛŋnde len kɛ́ɔ.

¹⁰Kon tosalannin Moabua a Amɔnnda le yonga ndaa, kani a yeow yungu Mɛlɛka-Nɔ-Kpaayaa-Kpow-vo-o, má kialu lɛŋnde ndɔlen le lɛŋnde ndalen cɔɔloo.

¹¹Kɛ, Mɛlɛka co nda fula o hɔl maa ɲɛ-vueinan, kani o tɛɛmbuunin halaa o lɛŋnden coo kpow. Vanaa-mangalaa-isɔɔa súúlan kpow, hali a co levil taw-va, vana-vana lonin o ndu lo mò baŋ vulan ndu Mɛlɛka o labɛngunin.»

¹²«Niaa vanaa co Kus-a bɛɛ, mɔɛi nii cɔwve co niaa buuluu.

¹³Mɛlɛka co baa siɛndi a ba luaŋ-ndo, mò diw vannda Asiri, mò pɛl Ninive le ndu mingio ciee-piɔ́mndo a lɛŋnde veselɛilen.

¹⁴Cɔlua vanin hinilan pɛngio lon, visia súúlan kpow a vanin ndon: hua a saiya bɛɛ a vanin lɔan o sungbuan bolle. Vana tuɛinin yowva caŋndo o diola pɔmbɔlan, ɲɔɔ vanin o tambɛiyo kandɔɔ o kèéden lacɛiyon, kani pɛngɛn yɔm sɛɛdre n vanin n'suingianndon.

¹⁵Àá! Ninive vannun a kɔlkɛndɔɔ, o vannun nila ɲulu o kɔlkɛsiaa nin. Vanaa va lenin-nda va dimio aa: ‹Naa n co naa ni! Vana-vana co maa naa le!› La tofa vɔ mɛɛ kobi kon siŋnun ciee-piɔ́mndo yɛ. La tofa vɔ mɛɛ o siŋnun bɛ̀mɛ́lta visia yɛ. Vana-vana kei pɛ ndu ikɛi, o kpinga a hùíyé hɔŋndo a á baa hiiloo.»