Read Kissi Sofoni 3 Bible Online

Sofoni 3 - Kissi bible

Sofoni 3

¹«Ndu kobi delɔɔ coo pɛ hoo nin-ndo, dɛnɛ palaa co ndu cum, kobi vanaa nila kalua a vanaa lakafaa co hoo nin-ndo pɛɛn.

²O tui Mɛlɛka diom te, o cɛl kanalannda ndɔlan te. O laalan Mɛlɛka ndɔɔ le, o sɔɔnguu Hala ndɔɔ ikɛi le.

³Simlacia co o kobi kalaa nin-nda, maa yàlàá co pɛɛliaa-a nda co ni, vanaa kialaa n'yamaa co lon-nda, maa tunaa yondoa dia icɔl pii-a nda co ni, idii niko a nɔ lɛ ɲɛ nda sɔam te.

⁴Vanaa kuundiannda a vanaa yiyaa ladúmbúa vanaa tɛɛngaa-diom-Hala-a ndɔa co ni. Vanaa-solia-lasálàà ndɔa co ɲɛ siŋnun teengen le Hala-o lebɛɛ ke le, a co tɔŋndo tɛɛmbuuo.

⁵Nduyɛ, Mɛlɛka co nda tɛɛn o kobi ndɔɔ nin, Mɛlɛka yɛ, o sandaa o co ni, O co dɛnɛ oo dɛnɛ tundan tosa le. Idii oo idii, o co yaman ndɔn kiolɔɔ, a paale siaalen bɛɛ, o co lon. Vana kɔlvesɛiyo ndu sina masinaa lasiɛmbu le.

⁶Mɛlɛka dimi aa: ‹I tɛɛmbuu vanaa-mangalaa-isɔɔa, mí koombiaa calta vanaa ndaa cɔwva. Nɛila ndalan o kobio tɛɛn la yimbu. Vana-vana co lɛ kei lecoo le. I pesi kobila ndalan, vana co lɛ lenin te. Hali vanndo ndu pilɛ, o co lɛ icali lenin te few.

⁷O kon mí yiyan maa o laan nin, a kenin ya bɛɛlen, a cɛlnin silala nilan, o kon calta ndalan la tembunin te. Àá! Mbɔ̀ i soŋ nda bɔɔ!› Kɛ nda, idii púŋ nda laasiaa dɛnnda ndalan a yɔŋ vɔɔn nda tosa-o ni.

⁸Lelan, Mɛlɛka dimi aa: ‹La cum-ndɔ! La cum paale ya cannin le seilen tɛndaa len. Lɔ́ɔ́ ya cuungiaanin vanaa-mangalaa-isɔɔa le yamɛi nii kiolɔɔ-o. I mɔɔsiaanin masɛi le kɔl ni tuwvo tuisio ndi coo, a le ndi fukpaa a kɔl ni fulaa. Kani i loamnin lɛŋnden kpow a yinnde nile paŋalaalen.›»

⁹«I dindinin cɔcɔn vanaa súúla celen, haliko ma piɛi ya, mà tosal-la vallo a diom pilɔɔ.

¹⁰Vanaa nia, hali a co o peela bɛndulan leeloo o lɛŋnde Kus len nin-nda, vanaa nia biilaa co a sɛŋiannda nɛɛ-nɛɛ ka-a, à hunnin mà cuu ya sálàlan.»

¹¹«Paale len, niaa vanaa co vanaa nia-a, siɛmbula bii lɛnin niaa le dɛnnda vɔɔnnda niaa tosa paandu a ya lan te. Kani i faŋanin vanaa yongaa niaa tɛɛn. O kon, la pɛnginin yongaa tosaa o pembii nii diandɛi coo.

¹²I mɛinin vanaa tuisiannda a vanaa bala fondoa yoomu niaa tɛɛn, á nuwviaanin nɛɛ viannannda o ya Mɛlɛka nin-nda pɛɛn.

¹³O Israɛlla tɛɛn yɛ, vanaa lonin yoomu-a tosa lɛnin dɛnɛ sandaa lepɛŋ te. A dimi lɛnin lacòò le. Vana tui lɛnin sɔɛi huiyaa vana fula nda o lasondo le. Kɛ a vanin cɔlua ndaa yɔɔ diólan, mì nda pila hinin pɛngio a kɔlɲuloo. Ɲɛ-ɲɛ hiiluu lɛnin nda kɔltan te.»

¹⁴«Lelan, la yonda a kɔlkɛndɔɔ, niaa vannda Siɔn. La deŋi a ɲaale bɛndoo, niaa Israɛlla. La naŋ kɔl mì la viow kponyoo taw, niaa vannda Yerusalɛm.

¹⁵Kani Mɛlɛka faŋa dɛnɛ palaa ndóò tuu le niaa tuisio coo-o, o tow yaamɔaa niaa polon. Mɛlɛka, o co masa Israɛlla-o co niaa tɛɛn. Lelan siòòŋii bii lɛnin niaa le dɛnɛ palaa le.

¹⁶Paale len, vannda vanin dimio Yerusalɛm aa: ‹Siòòŋii bii niaa le, niaa vannda Siɔn, la vu n'dial te.

¹⁷Kani Mɛlɛka, Hala niaa co niaa tɛɛn. Kuubanɔ co niaa baŋaa-o o co ni. O co a kɔlkɛndɔɔ taw le niaa, o mingi kaola ndɔɔ o sɛnɛi le niaa. A toɲa, o yonda a kɔlkɛndɔɔ mó dɔawnun ɲaale le niaa

¹⁸maa mɛɛ vana naŋ kɔl o paale kafolen coo yɛ.› I faŋa hau dɛnɛ palaa va niaa coo-o a siɛmbula va niaa coo lan.

¹⁹O telen kon, i saangiaanin vanaa tósal niaa dɛnɛ vɔɔndo-a kpede. I cɛwnin saa laandua namtaa mà cinda, i minginin a nda sɛŋi-a cuungiaa nɛɛ pilɛ. I siinguunin yungu nuu vanaa tɔ́ɔ́ bɛndu-a a vanaa bɛndua o lɛŋii nda vanin o siɛmbulan nin-nde kpow nin.

²⁰O telen kon, i minginin niaa nanu. A toɲa, i minginin niaa nanu mì siinguu niaa vanaa tɔ́ɔ́ bɛndu-a a vanaa bɛndua o vanaa súúla celeŋaa co o lɛŋnden coo-a kpow tɛɛn. I tosanin kon tuma ya mangalanin dɛnɛ niaa niaa pila o hɔl-lo. Dion ya Mɛlɛka soo-o co kon ni.»