Read Kissi Aasee 2 Bible Online

Aasee 2 - Kissi bible

Aasee 2

¹O vɔsi diinndɔɔ nin o masale Darius len bɛngu, o paale bidiin a lepilɛndɔlen coo, o paangii ŋɔmmɛwndɔɛi nin, mí sɔɛi Mɛlɛka-e tɛɛngulun vannda a sondo Hasee vana-tɛɛngaa-diom Hala-o-o aa:

²«Soo o Sorobabɛl masa ibungaa Yuda, po Sɛaltiɛ-lo lo, o Yosue bolle vanaa-solia-lasálàá, po Yehosadak-o lo a o vanaa tɔ̀a kpow lo, mà ɲuna nda aa:

³‹O niaa tɛɛn, vana pum co vɔ pá o ce mɛɛ Cɛiyo ho ndóò naŋ o tasendɔ yɛ-o? Vɛ̀ɛ̀ niaa co yɛ ndu nihau cɔu? Vɛ̀ɛ̀ la ce maa naŋɔɔ kon siŋnun ɲɛ fondoo le?

⁴Lelan, nɔm Sorobabɛl, luei yoomuan. Ya Mɛlɛka soaa nuaa ni. Nɔm Yosue bolle vanaa-solia-lasálàá, po Yehosadak-o bɛɛ, luei yoomuan. Niaa vanaa tɔ̀a lɛŋnden nin kpow, la lueinun yoomuan. Ya Mɛlɛka soaa nuaa ni. La tosa baalaa, Kani i co niaa ikɛi. Ya Mɛlɛka-Nɔ-Kpaayaa-Kpow-vo o soaa nuaa ni.

⁵Sɔɛi ya solin o sondo lɔ́ɔ́ niaa fula Esipte-o-e yɔŋnun ken ni. Kɔl nuu vanin niaa tɛɛn, lelan siòòŋii bíì niaa le:

⁶Kani nuaa ya Mɛlɛka-Nɔ-Kpaayaa-Kpow-vo dimi ni aa: ‹O lo cɔɔlu cobe mì hiilu halataalaa a lɛŋnden, mì hiiluu mɛmma ihɛllan a lɛŋnde kɔngɔlen.

⁷I hiiluunin vanaa-mangalaa-isɔɔa kpede, mì bolofaa ndaa kpow hin nanu, mì pei Cɛiyo ho a biiloo. Ya Mɛlɛka-Nɔ-Kpaayaa-Kpow-vo dimi lende ni.

⁸Ya nɔ volion a sianion ni. Diom ya Mɛlɛka-Nɔ-Kpaayaa-Kpow-vo soo-o co kon ni.

⁹Biilu Cɛiyo ho hiawnin biilu Cɛi tasoo, Mɛlɛka-Nɔ-Kpaayaa-Kpow-vo dimi lende ni. I kenin niaa kɔlɲuloo o fonda kon. Diom ya Mɛlɛka-Nɔ-Kpaayaa-Kpow-vo soo-o co kon ni.›»

¹⁰Paangii ŋɔmahiɔɔlundɔɛi va malɔ bidiin a lehiɔɔlu, o vɔsi diinndɔɔ nin o masale Darius len bɛngu, mí sɔɛi Mɛlɛka-e dimulun Hasee vana-tɛɛngaa-diom Hala-o aa:

¹¹«Nuaa Mɛlɛka-Nɔ-Kpaayaa-Kpow-vo dimi ni aa: ‹Ɲuna vanaa-solia-lasálàá mà muli sɔɛi he:

¹²Te vanndo vow pɛ visii sálài o doma ndɔɔ nin, mì doma kon pilan buloo, ɲɛdiaa pum, mɔiyan, cuɛiyan te kon te ɲɛdiaa súú-súù ka, vɛ̀ɛ̀ ɲɛ kon siŋnun pá ɲɛ siŋnun teengen le Mɛlɛka-o lelan?›» Mí vanaa-solia-lasálàá muli aa: «Ɛ-ɛ».

¹³Mí Hasee ɲuna nda vɛlɛ aa: «Te vanndo siŋnun pɛ vana nɔɔlɛiyo le vanaciee vílɛ́i o pilan-ndo, mò kɔ pilan ɲɛdiaa pum, vɛ̀ɛ̀ ɲɛdiaa kon siŋnun pá ɲɛ nɔɔlɛiyo lelan?» Mí vanaa-solia-lasálàá muli aa: «Oi, mò siŋnun o nɔɔlɛiyo.»

¹⁴Mí Hasee muli aa: «Lende vannda ha co ni, lende vanaa co o lɛŋnden nden nin-nda co ya Mɛlɛka o hɔl ni. Diom ya Mɛlɛka soo-o co kon ni. Lende baalala nda co tosaa a bala ndalan ndan la co ni. Ɲɛm nda co hunɔɔ ya o hɔl-lon kpow, n'nɔɔlɛiyon n co ni.»

¹⁵«La dɔw ɲɛ co hunɔɔ tosan o hau kɔɔli-o taasi ɲɛkɛndɛi. Lɔ́ɔ́ pá mì la kandu powtan hɛɛnduuo le Cɛi-Mɛlɛka-o mingio tangullo,

¹⁶yɛɛ nɛ va yɛ niaa tosalanndo? Te vanndo ndóò kɔɛ pɛ maalon cuaa panio bidiin o konda, tɔ́ daama ndóò komal ni. Te vanndo ndóò kɔɛ pɛ le mɔiyan litililan beleŋuɛɛnu kɔndɔɔ o doolaa nin, litililan bidiin daama ndóò komal ni.

¹⁷Ya Mɛlɛka, mí veesiaa ɲɛm niaa vaa-on, mí tosa mí n sia o tumndan coo, mí tuisi loeon delian lecoo. Kɛ a kon kpede, la muungu ya ibuŋ te.

¹⁸La dɔw ɲɛ co hunɔɔ tosan o hau kɔɔli-o taasi, paangii ŋɔmahiɔɔlundɔɛi co hau malɔ bidiin a lehiɔɔlu, paalen nden Cɛi nuu kilan ni, Ya Mɛlɛka pɛɛn. La dɔw taasi ɲɛkɛndɛi.

¹⁹Vɛ̀ɛ̀ ɲɛ lo lɛ pá o lakonda? Nakɔla n'rɛsɛnnda, nakɔla n'buumbuulan, nakɔla krenadieelan a nakɔla olivieelan la co lɛ komɔɔ le. Kɛ kandɔɔ hau, i co niaa duaa nuu tuisi coo.»

²⁰O paale bidiin a lehiɔɔlundɔlen coo, o paangii ken nin, mí sɔɛi Mɛlɛka-e dimulun vɛlɛ Hasee o bɛmbɛ diinndɔɔ aa:

²¹«Dimul Sorobabɛl co masa ibungaa Yuda-o maa i co halataalaa a lɛŋnden hiiluu.

²²I co kpɛŋɛla lemasala masaa kombiaa, mì tɛɛmbuu kpaaya masɛi vanaa-mangalaa-isɔɔa, mì yɔl ɲɛla ɲaanannda ndala soa nan-ndan a vanaa ɲaanun lan-nda. Soa a vanaa ɲaanun o soa coo-a viawnunnin lɛŋ. Vana-vana delnin o mɔɛi cɔvii puapilɛ ndɔɔ bɛngu.

²³Paale len, ya Mɛlɛka-Nɔ-Kpaayaa-Kpow-vo co sɔɛi nuaa ni, i cuanin nɔm Sorobabɛl po Sealtiɛl-lo, nɔm vana ni baalaa pɛɛn, ya Mɛlɛka-Nɔ-Kpaayaa-Kpow-vo co sɔɛi nuaa ni, mì siinguu nɔm maa kelɛi tampɔŋii lemasa, kani nɔm ya hɛli ni. Diom ya Mɛlɛka-Nɔ-Kpaayaa-Kpow-vo soo-o co kon ni.»