Read Kissi Sakari 1 Bible Online

Sakari 1 - Kissi bible

Sakari 1

¹Vɔsi Darius cii vɔsilan tan tiɔn o masalen-ndo, o paangii ŋɔmaandɔɛi nin, mí Mɛlɛka soaa o vana-tɛɛngaa-diom Hala-o, Sakari po Berekia-o, po imama Ido-o Sakari kon va ni. Mí Mɛlɛka dimul ndu aa:

²«Mí Mɛlɛka tuulu sindɛ kɔl a fuɲaa niaa mamaa taw-taw.

³Lelan, dimul Israɛlla aa nuaa Mɛlɛka-Nɔ-Kpaayaa-Kpow-vo soo ni aa: ‹La muungu ya o ibuŋ, mì ya bɛɛ i mulul niaa hɔlla. Mɛlɛka-Nɔ-Kpaayaa-Kpow-vo dimi lende ni.

⁴La vial fuɲaa niaa mamaa a káà, mì la tosa maa nda le. Kani nda nda, vanaa-tɛɛngaa-diom Hala-a va sindɛ yondaa nda o lani, má va nda dimullo aa Mɛlɛka-Nɔ-Kpaayaa-Kpow-vo dimi aa: La mal kelala niaala vɔɔnndan a dɛnnda niaala vɔɔnndan. Kɛ a yeŋ nilan te, a bii sɔɛi ken te. Sɔɛi fula Mɛlɛka o sondo-e co hee ni.

⁵Kuɛɛ nɛ fuɲaa niaa mamaa kan co yɛ hau? Vanaa-tɛɛngaa-diom Hala-a kan yɛ, a co va yoomu le fɛɛn a fɛɛn?

⁶Nduyɛ, mí tɔŋndan a silala ya vow vanaa niaa baalaa, vanaa-tɛɛngaa-diom Hala-a o sondo lan la pilan fuɲaa niaa mamaa kɔltan. O kon, má muungu, má dimi aa mí Mɛlɛka-Nɔ-Kpaayaa-Kpow-vo tuu le naa tosallo mɛɛ kelala naalan a dɛnnda naalan la co yɛ.›»

⁷O paale bidiin a lehiɔɔlundɔlen coo, o paangii tɔ́ a ipilɛndɔɛi nin, paangii Sebat pɛɛn, o vɔsi diinndɔɔ nin o masale Darius len bɛngu, mí Mɛlɛka soaa o vana-tɛɛngaa-diom Hala-o Sakari lo, po Berekia-o, po imama Ido-o, mó dimi aa:

⁸«Cɛi icɔl, mí ca vundulen. Langbanɔɔ pum va icali o so siaŋaa coo, o va o yɔmii pɔmbɔɛi tɛɛn o kpolonndo nin, soa siaŋaa, soa pulpulla a soa humbua va isisi ndu kɔɔli.

⁹O kon, mí ɲuna aa: ‹Maalii nuu, kɔlɔ yɛɛ nɛ soa ha co yɛ?› Mí mɛlɛkanɔ va suukanndo a ya-o dimul-la aa: ‹I co nɔm kɔlɔ soa ha cɔm.›

¹⁰Mí langbanɔ va isisi o yɔmii pɔmbɔɛi tɛɛn-ndo cua sɔɛi, mó dimi aa: ‹Soa Mɛlɛka vem le balɔɔ o lɛŋnden coo-a ni.›

¹¹O kon, mí vanaa va o soa kan coo-a mulul mɛlɛkanɔ Hala va isisi o yɔmii pɔmbɔɛi tɛɛn-ndo, má dimi aa: ‹N balu lɛŋnden kpow, tofa vɔ, lɛŋnden kpede le co o kɔlɲuloo nin, le connun nila ɲulu.›

¹²Mí mɛlɛkanɔ Hala-o cua sɔɛi, mó dimi aa: ‹Éé Mɛlɛka-Nɔ-Kpaayaa-Kpow-vo! O co nihau vɔsilan belaŋɔmmɛw a co o kɔltuwvo nin a Yerusalɛm a á kobila co o tàndá Yuda-o nin-ndan. Mà lo kɛɔ le nda ɲííye tuinɔnndo háá lɔ́ɔ́ kuɛɛ nɛ?›

¹³Mí Mɛlɛka mulul mɛlɛkanɔ va suukanndo a ya-o diomnde kɛndɛ, mó dimul ndu sɔɔn ɲɔɔlan.

¹⁴O kon, mí mɛlɛkanɔ va suukanndo a ya-o dimul-la aa: ‹Yonda mà dimi aa: Mɛlɛka-Nɔ-Kpaayaa-Kpow-vo dimi aa: Paŋala bɛndu-bɛndoo co ya o kɔl le kaola ya kaola Yerusalɛm a Siɔn-ndo.

¹⁵Kɛ i tuulu kɔl taw a vanaa-mangalaa-isɔɔa cennun nda pila ɲɛ-a. Kani ɲɛ-pɔmbɔ koni yáà tuulu kɔl ni, kɛ nda nda, má hun cɔɔlu dɛnɛ palaa vanaa nia handɔɔ lecoo.

¹⁶Lelan, Mɛlɛka dimi aa: I muungu Yerusalɛm a ɲíí nii bɛnduei, cɛi biilaa nuu muungunin vɛlɛ tangulɔn ndon, a tuunin Yerusalɛm a yoolen le ndu tangullo. Sɔɛi fula Mɛlɛka-Nɔ-Kpaayaa-Kpow-vo o sondo-e co hee ni.›

¹⁷Yonda vɛlɛ mà dimi maa nuaa Mɛlɛka-Nɔ-Kpaayaa-Kpow-vo soo ni aa: ‹Kobila nilan la pianin vɛlɛ ca a ɲɛm kɛndɔn, i ɲɔɔlunin Siɔn, mì hɛli vɛlɛ Yerusalɛm.›»