Read Kissi Sakari 10 Bible Online

Sakari 10 - Kissi bible

Sakari 10

¹«La ɲuna Mɛlɛka mò tuisul niaa piɔɔ, mì piɔɔ a tuma sialte taselen. Mɛlɛka tuisi piɔɔ deŋiaa hoeyii fùkù-fùkoo ni. O tuisilnin niaa piɔɔ pɔ̀lɔ̀-pɔ̀lɔ̀ɔ́ taw, o tosanin mì billo vil o yondola vana-vana coo.

²Kani piɔmaa tongoniŋaa niaa co piɛiyo-a co niaa mulullo a sɔɔn lacòòvan. Mandea co vannda vunduma lacòòvan dimullo, à co lɔma sɔlaama lacòòvan dimio, à co vannda ɲɔɔloo a kpaavɛi. Lelan vannda ha kɔɛnnun a laasianndo ni maa n'cɔlu, a co o mɔnɛi nin maa saa nɔ vana mandaa le-a.

³Lelan, i tuulu kɔl taw a vanaa mandaa n'saa, i co simlacia sangaa tuisi coo. Kani ya Mɛlɛka-Nɔ-Kpaayaa-Kpow-vo, i nɔ yiyanndo saa nia kundaa coo, polale Yuda len pɛɛn. I co nda siinguu maa so ni latɔ́ɔ́-tɔ́ɔ́ le kɔlan cɔwvo tosaa.

⁴O polale Yuda len nin simlacia kpede a fulanin ni. A vanin a kala maa pow lebol tangulaa, maa pikii ciɛi-kola-toandaa, maa kpaasiaa cɔw.

⁵A vanin o cɔwvo nin maa kuubaa cɔw, mà nɛw loolio o nɛi a labɛngu. Lende nda tosanin cɔwvo ni. Kani Mɛlɛka vanin nda ikɛi, lelan, yaamɔaa ndaa vanin o soa coo mì siɛmbulan la bii nda.

⁶I lueinin polale Yuda len yoomuan, mì baŋa polale Yosɛf len. I minginin nda o la nda lo, kani ɲíí ndɛi co ya. A vanin vana ca kaa kabi bɛɛ yáà tuw-vɔ nda polon te. Ya co Mɛlɛka ni, Hala ndaa pɛɛn, i mululnin nda piɛilen.

⁷Cuavaa-imamaa Efraim-nda nɔnin kpaayaa maa kuubaa cɔw. A vanin a kɔlkɛndɔɔ mɛɛ vana kol mɔiyan ma va a kɔlkɛndɔɔ nuaa yɛ. Poaa ndaa canin kon mì nda bɛɛ dɔwnun ɲaale. A dɔawnunnin ɲaale taw o Mɛlɛka nin.

⁸I veelunin nda a hùíyé hɔŋndo, mì cuungiaa nda nɛɛ pilɛ. Kani i cii nda baŋa, a vangalanin vɛlɛ ma va sɛ́lɛ́ mɛɛ ndáà va paandu sɛ́lɛ́ yɛ.

⁹I sɛŋi nda vanaa súúla celen tɛɛn, kɛ a lonin nɛɛ levil lon polon mà loonun a ya. A calnin ndon a cuavaa ndaa, o kon kɔɔli, a muungunin o nda lo.

¹⁰I faŋanin nda Esipte, mì mingi nda nanu. I faŋanin nda Asiri, mì cuungiaa nda nanu, i lueinin nda o tàndá Kalaad-o nin a o lɛŋnde Liban-nden nin. Kɛ hali kon, fonda kon tiwnin nda le.

¹¹A taŋnin mɛmma ihɛlma imɔnɔan[3], Ya Mɛlɛka, i lɔanin tindima mɛmma ihɛllan, limun pee bɛndoo Nil kpow n velanin, kuundian vannda Asiri tambunin, tinda lemasa Esiptea puununnin nda o ba.

¹²I lueinin Israɛlla yoomuma fula ya Mɛlɛka o ba-an, a vanin kelaa o diola ya Mɛlɛka lan bɛngu. Ya Mɛlɛka dimi lende ni.»