Read Kissi Sakari 11 Bible Online

Sakari 11 - Kissi bible

Sakari 11

¹«Niaa vanaa co Liban-nda, la kumbi diola niaalan, mì yinnden le luɛi, mì le lom yɔmii sɛɛdrei.

²Nɔm yɔm siprɛs, ŋɔɔcian taw, kani yɔm sɛɛdreo komba, vanaa nɔ kpaayaa-a tambu. Niaa yálánnde Basan, la somisomin. Kani bundɛ vanáà nɔla luɛyɔɔ nin too koombiaa mò muungu lɛŋ mɛ́-mɛ́.

³Vanaa mandaa n'cɔlua co cɛɛŋɔnndo, kani naŋɔɔ ndaa tambu. Yàlàà téndéa co pɛɛliaa, kani bundɛlan la tambu, bundɛla va o peo Yurdɛn demullo lan.»

⁴«Nuaa Mɛlɛka Hala nuu dimi ni aa: ‹Yɔɔ saa bɛnda le diinɔnndo-a diólan.

⁵Vanaa co nda piondɔɔ le diyɔɔ-a co cɔnnɔn maa a tɛɛmbuu isɔɔ le. Vana co nda pisio-o co dimio aa: Biiloo co le Mɛlɛka! Kani i siŋnun vana bolofaa. Vanaa co saa kan mandaa-a nɔ iɲíí a nda le.

⁶Lelan, ya bɛɛ, i nɔ lɛnin iɲíí a vanaa co icali o lɛŋnde len nin-nda le. Ya Mɛlɛka co sɔɛi nuaa ni. Tofa vɔ, i co vannda vɔngul nda pila o laba vellaa-velle, mì mal nda vɛlɛ masaa o ba. Masaa kan tɛɛmbuunin lɛŋnden. Kɛ ya, i helunin vana-vana nda o ba le.›»

⁷«O kon, mí va saa va le diyɔɔ-a yɔɔ diólan, saa yulaa n'saa ndáà nɔle diyɔɔ-a. Mí cua tindala mandaa n'saa lan tan tiɔn, mí ke o pilɛ diolan aa «Canyɛi», o pilɔɔ aa «Diom pilɔɔ.» Mí va saa yɔɔ diólan.

⁸O paangei ndii pilɛ bɛngu, mí toaw vanaa mandaa n'cɔlua yáá-a. O kon kɔɔli, i nɔla biuvɔnndo a saa le. Saa kan bɛɛ, mí dɛnɛ nuu fula nda iyeema.

⁹Mí dimi aa: ‹I co lɛ niaa manda le. O co vu-o ndu vu! O co luusian-ndo ndu luusian! A tɔ̀a co lo-a somian nda pila vellaa-velle!›

¹⁰O kon kɔɔli, mí cua tinda ni nɔ diolan aa «Canyɛi»-yo, mí yam ndu le kpema yáà yii a vanaa-mangalaa-isɔɔa kpow-vo tɛɛmbuuo.

¹¹Mí kpema kon tambu ɲinkon. Mí yulaa n'saa va ya mɛɛndanndo-a bii bila maa sɔɛi Mɛlɛka-e va tɛɛngɔn kon a dɛnnda nilan ni.

¹²Mí dimul nda aa: ‹Te ɲɔɔ hɛnan pɛ niaa, la yɔngu ya sala nuu. Te ɲɛ hɛnan yɛ niaa le, la yɔngu ya le.› O kon, má tuu volin latámán beleyaa le sala nuu.

¹³Mí Mɛlɛka dimul-la aa: ‹Cua volion mun, vɔngu kɛndɛ nda kelu ya hoo iyama-o, ma yoo vana cuavaa n'kpɛnɔɔ mun.› O kon, mí cua volin latámán beleyaan mun, mí vuu mun o Cɛi-Mɛlɛka-o nin le vana cuavaa n'kpɛnɔɔ.

¹⁴Ken cuvɔɔ, mí yam tinda ni diinndɔ nɔ diolan aa «Diom pilɔɔ»-o, le vanayɛi tɛɛmbuuo Yudaa nda Israɛlla tɛɛn.

¹⁵O kon, mí Mɛlɛka dimul-la aa: ‹Dovin nihau maa diɔm sondo vesɛi co cɔlua mandaa-o.

¹⁶Kani tofa vɔ, ya Mɛlɛka, i yɔngunin niaa vana manda n'cɔloo o lɛŋnden nden nin, o nɔnin lehɔl saa vanin yɛɛvɔɔ dɔwnɔnndo-a coo le few. Hali saa pilɛ luusian bɛɛ, o nuwviaanin ndu le, o pilɛ yɔŋulun bɛɛ, o cɛwnin ndu le, o downin a vanin kɛndia-a balo le. Kɛ o sɔamnin visin saa celulaa mò yimi a tɔ̀a buukulan.›

¹⁷Dɛnɛ palaa co le diɔm sondo vesɛi mandaa n'saa, o mal saa ndɔa-o! Màá mɔɛi cɔwve sɛɛsiaa ndu congoo, mì i pɛl ndu hɔlte ba kɛndɛlen! Màá congú ndɔɔ vu lekɛ́ndɛi! Màá hɔlte ndɔle ba kɛndɛlen le muungu tɔ́liɔ̀!»